പ്രധാനമന്ത്രിയുടെ സന്ദർശനം മാർച്ച് 11 ന് കൊച്ചിയിൽ കർശന ഗതാഗത നിയന്ത്രണം
പ്രധാനമന്ത്രിയുടെ കൊച്ചി സന്ദർശനത്തോടനുബന്ധിച്ച് 2026 മാർച്ച് 11 ന് നഗരത്തിൽ ഏർപ്പെടുത്തിയിരിക്കുന്ന ഗതാഗത നിയന്ത്രണങ്ങൾ, ബസ് റൂട്ടുകളിലെ മാറ്റം, പാർക്കിംഗ് സൗകര്യങ്ങൾ എന്നിവയെക്കുറിച്ചുള്ള വിശദവിവരങ്ങൾ.
അനില എം കൃഷ്ണൻ 
കൊച്ചി: പ്രധാനമന്ത്രിയുടെ സന്ദർശനത്തോടനുബന്ധിച്ച് മാർച്ച് 11-ന് കൊച്ചി നഗരത്തിൽ കർശന ഗതാഗത നിയന്ത്രണങ്ങൾ ഏർപ്പെടുത്തിയതായി സിറ്റി പോലീസ് അറിയിച്ചു. നേവൽ ബേസ്, മറൈൻ ഡ്രൈവ്, കലൂർ ജവഹർലാൽ നെഹ്റു സ്റ്റേഡിയം എന്നീ കേന്ദ്രങ്ങളെ ബന്ധിപ്പിച്ചാണ് പ്രധാനമായും നിയന്ത്രണങ്ങൾ.
പ്രധാന റൂട്ടുകളും സമയവും
റൂട്ട് I (12:00 PM - 12:30 PM): നേവൽ ബേസ് മുതൽ മറൈൻ ഡ്രൈവ് വരെ (തേവര, രവിപുരം, എം.ജി റോഡ് വഴി). രാവിലെ 11 മുതൽ ഡൈവേഴ്ഷൻ ആരംഭിക്കും.
റൂട്ട് II (12:50 PM - 01:20 PM): മറൈൻ ഡ്രൈവ് മുതൽ കലൂർ സ്റ്റേഡിയം വരെ (ബാനർജി റോഡ്, കച്ചേരിപ്പടി വഴി).
റൂട്ട് III (03:05 PM - 03:30 PM): കലൂർ സ്റ്റേഡിയം മുതൽ നേവൽ ബേസ് വരെ (എം.ജി. റോഡ്, തേവര വഴി).
ബസുകൾക്കുള്ള വഴിതിരിച്ചുവിടൽ
ഫോർട്ട് കൊച്ചി ഭാഗത്തുനിന്ന് വരുന്നവ: ബി.ഒ.ടി ഈസ്റ്റിൽ നിന്ന് തിരിഞ്ഞ് കുണ്ടന്നൂർ, വൈറ്റില, ഇടപ്പള്ളി വഴി പോകണം.
ആലുവ/കാക്കനാട് ഭാഗത്തുനിന്ന് വരുന്നവ: ഇടപ്പള്ളിയിൽ നിന്ന് തിരിഞ്ഞ് കുണ്ടന്നൂർ വഴി തോപ്പുംപടിയിലേക്ക് പോകണം.
ചെറുവാഹനങ്ങൾക്കുള്ള മാറ്റങ്ങൾ
ഹൈക്കോടതി ഭാഗത്തുനിന്ന് ഫോർട്ട് കൊച്ചിയിലേക്ക് പോകേണ്ടവർ മാധവ ഫാർമസി, ചിറ്റൂർ റോഡ്, പനമ്പിള്ളി നഗർ വഴി തിരിഞ്ഞുപോകണം. ബോൾഗാട്ടി ഭാഗത്തുനിന്നുള്ളവർ പച്ചാളം വഴി ഇടപ്പള്ളിയിലെത്തണം.
പാർക്കിംഗ് ക്രമീകരണങ്ങൾ
വടക്കൻ മേഖല: ബോൾഗാട്ടി, വല്ലാർപാടം ബസിലിക്ക ഗ്രൗണ്ട്, എൽ.എൻ.ജി ടെർമിനൽ പരിസരം.
തെക്കൻ മേഖല: ഡി.എച്ച്. ഗ്രൗണ്ട്, മഹാരാജാസ് കോളേജ് ഗ്രൗണ്ട്, എറണാകുളത്തപ്പൻ ഗ്രൗണ്ട്.
പ്രത്യേക ശ്രദ്ധയ്ക്ക്
ഭാരവാഹനങ്ങൾക്ക് മാർച്ച് 10-ന് രാത്രി 10 മണി മുതൽ നഗരത്തിൽ പ്രവേശനമുണ്ടാകില്ല. എന്നാൽ ആംബുലൻസ് ഉൾപ്പെടെയുള്ള അടിയന്തര സേവനങ്ങൾക്ക് തടസ്സമില്ലാതെ കടന്നുപോകാൻ സൗകര്യമൊരുക്കുമെന്ന് പോലീസ് അറിയിച്ചു. നഗരത്തിലേക്ക് വരുന്നവർ യാത്രകൾ മുൻകൂട്ടി പ്ലാൻ ചെയ്യണമെന്ന് ട്രാഫിക് പോലീസ് അഭ്യർത്ഥിച്ചു.
