നിയമസഭാ തിരഞ്ഞെടുപ്പ്: സംസ്ഥാനത്ത് 79.70% പോളിങ് വോട്ടെണ്ണൽ നാളെ എട്ടു മണി മുതൽ

കേരള നിയമസഭാ തിരഞ്ഞെടുപ്പിന്റെ വോട്ടെണ്ണൽ നാളെ നടക്കും. സംസ്ഥാനത്ത് 79.70% പോളിങ് രേഖപ്പെടുത്തിയതായി മുഖ്യതിരഞ്ഞെടുപ്പ് ഓഫിസർ രത്തൻ യു. ഖേൽക്കർ അറിയിച്ചു.

അനില എം കൃഷ്ണൻ

May 3, 2026 - 15:24

നിയമസഭാ തിരഞ്ഞെടുപ്പ്: സംസ്ഥാനത്ത് 79.70% പോളിങ് വോട്ടെണ്ണൽ നാളെ എട്ടു മണി മുതൽ

രത്തൻ യു. ഖേൽക്കർ

നിയമസഭാ തിരഞ്ഞെടുപ്പ്: സംസ്ഥാനത്ത് 79.70% പോളിങ്; വോട്ടെണ്ണൽ നാളെ എട്ടു മണി മുതൽ

തിരുവനന്തപുരം: കേരള നിയമസഭാ തിരഞ്ഞെടുപ്പിന്റെ വോട്ടെണ്ണൽ നാളെ നടക്കാനിരിക്കെ, സംസ്ഥാനത്തെ അന്തിമ പോളിങ് ശതമാനം സംബന്ധിച്ച വിവരങ്ങൾ മുഖ്യതിരഞ്ഞെടുപ്പ് ഓഫിസർ രത്തൻ യു. ഖേൽക്കർ പുറത്തുവിട്ടു. ഇതുവരെയുള്ള കണക്കുകൾ പ്രകാരം സംസ്ഥാനത്ത് 79.70 ശതമാനം പോളിങ് രേഖപ്പെടുത്തി. അന്തിമ പോളിങ് ശതമാനം വരാൻ വൈകുന്നത് വിമർശനങ്ങൾക്ക് വഴിവെച്ച സാഹചര്യത്തിലാണ് വോട്ടെണ്ണലിന്റെ തലേദിവസം കമ്മിഷൻ കണക്കുകൾ വ്യക്തമാക്കിയത്.

തിങ്കളാഴ്ച രാവിലെ എട്ടു മണിയോടെ വോട്ടെണ്ണൽ നടപടികൾ ആരംഭിക്കും. ആദ്യം തപാൽ വോട്ടുകളും (Postal Ballot) എട്ടരയോടെ വോട്ടിങ് മെഷീനുകളിലെ (EVM) വോട്ടുകളും എണ്ണിത്തുടങ്ങും. കൃത്യത ഉറപ്പുവരുത്തിയ ശേഷം മാത്രമേ അടുത്ത റൗണ്ടുകളിലേക്ക് കടക്കാവൂ എന്ന് ഉദ്യോഗസ്ഥർക്ക് കർശന നിർദേശം നൽകിയിട്ടുണ്ട്.

വോട്ടെണ്ണൽ സജ്ജീകരണങ്ങൾ

ഉദ്യോഗസ്ഥർ: 140 റിട്ടേണിങ് ഓഫിസർമാരും 1340 അഡീഷണൽ റിട്ടേണിങ് ഓഫിസർമാരും ഉൾപ്പെടെ ആകെ 15,465 ഉദ്യോഗസ്ഥർ.

സുരക്ഷ: 32,301 പൊലീസ് ഉദ്യോഗസ്ഥരെ സുരക്ഷയ്ക്കായി വിന്യസിച്ചു.

നിരീക്ഷണം: 4208 സൂക്ഷ്മനിരീക്ഷകരും തുല്യ എണ്ണം കൗണ്ടിങ് സൂപ്പർവൈസർമാരും രംഗത്തുണ്ടാകും.

നിബന്ധന: വോട്ടെണ്ണൽ കേന്ദ്രങ്ങളിൽ പ്രവേശിക്കാൻ ക്യൂ ആർ കോഡുള്ള തിരിച്ചറിയൽ കാർഡ് നിർബന്ധമാണ്.

സംസ്ഥാനത്ത് ആകെ 58,984 സർവീസ് വോട്ടുകളാണുള്ളത്. ഇതിൽ മെയ് ഒന്നാം തീയതി വരെ 20,028 എണ്ണം തിരികെ ലഭിച്ചു. വോട്ടെണ്ണൽ ദിവസം എത്തുന്ന സർവീസ് വോട്ടുകളും പരിഗണിക്കുമെന്ന് അദ്ദേഹം അറിയിച്ചു. തിരഞ്ഞെടുപ്പ് പെരുമാറ്റച്ചട്ടം മെയ് 6 വരെ തുടരുമെന്നും മുഖ്യതിരഞ്ഞെടുപ്പ് ഓഫിസർ കൂട്ടിച്ചേർത്തു.