മാനേജ്‌മെന്റുമായുള്ള ചർച്ച വിജയകരം, തിങ്കൾ, ചൊവ്വ ദിവസങ്ങളിൽ ബാങ്ക് തുറന്നു പ്രവർത്തിക്കും

തുടർച്ചയായ ബാങ്ക് അവധി ഒഴിവായി; എസ്‌ബിഐ പണിമുടക്ക് മാറ്റിവെച്ചു, ഉപഭോക്താക്കൾക്ക് ആശ്വാസം

​തിരുവനന്തപുരം: അടുത്ത തിങ്കൾ, ചൊവ്വ ദിവസങ്ങളിൽ നടത്താനിരുന്ന സ്റ്റേറ്റ് ബാങ്ക് ഓഫ് ഇന്ത്യ (എസ്‌ബിഐ) ജീവനക്കാരുടെ രാജ്യവ്യാപക പണിമുടക്ക് മാറ്റിവെച്ചു. ജീവനക്കാരുടെ സംഘടനകളും ബാങ്ക് മാനേജ്‌മെന്റും തമ്മിൽ നടത്തിയ അനുരഞ്ജന ചർച്ചകൾ വിജയകരമായതിനെ തുടർന്നാണ് സമരം പിൻവലിക്കാൻ തീരുമാനിച്ചതെന്ന് യൂണിയൻ ഭാരവാഹികൾ അറിയിച്ചു.

​ശനി, ഞായർ ദിവസങ്ങളിലെ ആഴ്ചയിലെ അവധിക്കും ബുധനാഴ്ചയിലെ ബക്രീദ് അവധിക്കും മധ്യേ തിങ്കളും ചൊവ്വായും പണിമുടക്ക് പ്രഖ്യാപിച്ചതോടെ തുടർച്ചയായി അഞ്ച് ദിവസം ബാങ്കിങ് ഇടപാടുകൾ തടസ്സപ്പെടുമെന്ന ആശങ്കയിലായിരുന്നു പൊതുജനം. എന്നാൽ സമരം മാറ്റിവെച്ചതോടെ തിങ്കൾ, ചൊവ്വ ദിവസങ്ങളിൽ ബാങ്കുകൾ സാധാരണ രീതിയിൽ പ്രവർത്തിക്കും. ഇത് ഉപഭോക്താക്കൾക്ക് വലിയ ആശ്വാസമാണ് നൽകുന്നത്.

​ജീവനക്കാർ മുന്നോട്ടുവെച്ച പ്രധാന ആവശ്യങ്ങൾ അനുഭാവപൂർവ്വം പരിഗണിക്കാമെന്ന് മാനേജ്‌മെന്റ് ഉറപ്പുനൽകിയ പശ്ചാത്തലത്തിലാണ് സമരം തൽക്കാലത്തേക്ക് നീട്ടിവെച്ചത്. സർക്കിൾ അടിസ്ഥാനമാക്കിയുള്ള ജീവനക്കാരുടെ നിർബന്ധിത സ്ഥലംമാറ്റം ഒഴിവാക്കുക, ബാങ്കുകളിലെ കടുത്ത ജീവനക്കാരുടെ കുറവ് പരിഹരിക്കാൻ അടിയന്തരമായി പുതിയ നിയമനങ്ങൾ നടത്തുക തുടങ്ങിയ ആവശ്യങ്ങളാണ് പ്രധാനമായും ചർച്ചയിൽ ഉയർന്നുവന്നത്.

​ഈ ആവശ്യങ്ങളിൽ ഉടൻ തന്നെ അനുകൂലമായ നടപടിയുണ്ടാകുമെന്ന് മാനേജ്‌മെന്റ് ചർച്ചയിൽ ഉറപ്പുനൽകിയിട്ടുണ്ട്. ഇന്നും (ശനി) നാളെയും (ഞായർ) ബാങ്ക് അവധിയാണെങ്കിലും, വരും ദിവസങ്ങളിൽ തടസ്സമില്ലാതെ ബാങ്കിങ് സേവനങ്ങൾ പൊതുജനങ്ങൾക്ക് ലഭ്യമാകുമെന്ന് അധികൃതർ വ്യക്തമാക്കി.