ചലച്ചിത്ര പ്രവർത്തകയെ അപമാനിച്ച കേസ് പി.ടി. കുഞ്ഞുമുഹമ്മദിനെതിരെ കുറ്റപത്രം സമർപ്പിച്ചു
സംവിധായികയെ ലൈംഗികമായി അപമാനിച്ച കേസിൽ മുൻ എംഎൽഎ പി.ടി. കുഞ്ഞുമുഹമ്മദിനെതിരെ കന്റോൺമെന്റ് പോലീസ് കുറ്റപത്രം സമർപ്പിച്ചു. സിസിടിവി ദൃശ്യങ്ങൾ ഉൾപ്പെടെയുള്ള തെളിവുകൾ പോലീസ് കോടതിയിൽ ഹാജരാക്കി.
അനില എം കൃഷ്ണൻ 
ചലച്ചിത്ര പ്രവർത്തകയെ ലൈംഗികമായി അപമാനിച്ച കേസ്: മുൻ എംഎൽഎ പി.ടി. കുഞ്ഞുമുഹമ്മദിനെതിരെ കുറ്റപത്രം സമർപ്പിച്ചു
തിരുവനന്തപുരം: ഡോക്യുമെന്ററി സംവിധായികയെ ഹോട്ടൽ മുറിയിൽ വെച്ച് ലൈംഗികമായി അപമാനിച്ചെന്ന കേസിൽ സംവിധായകനും മുൻ സിപിഎം എംഎൽഎയുമായ പി.ടി. കുഞ്ഞുമുഹമ്മദിനെതിരെ പോലീസ് കുറ്റപത്രം സമർപ്പിച്ചു. തിരുവനന്തപുരം കന്റോൺമെന്റ് പോലീസാണ് കോടതിയിൽ കുറ്റപത്രം നൽകിയത്. അഞ്ച് വർഷം വരെ തടവുശിക്ഷ ലഭിക്കാവുന്ന ഗുരുതര വകുപ്പുകളാണ് ഇദ്ദേഹത്തിനെതിരെ ചുമത്തിയിരിക്കുന്നത്.
കഴിഞ്ഞ വർഷം നവംബർ ആറിന് തിരുവനന്തപുരത്തെ ഒരു ഹോട്ടലിലായിരുന്നു കേസിനാസ്പദമായ സംഭവം നടന്നത്. രാജ്യാന്തര ചലച്ചിത്ര മേളയുടെ (IFFK) മുന്നോടിയായുള്ള ഡോക്യുമെന്ററി സ്ക്രീനിംഗിനായി എത്തിയതായിരുന്നു പരാതിക്കാരിയായ ചലച്ചിത്ര പ്രവർത്തക. ഈ സമയത്ത് കുഞ്ഞുമുഹമ്മദ് താമസിച്ചിരുന്ന ഹോട്ടൽ മുറിയിൽ വെച്ച് തന്നെ കയറിപ്പിടിക്കുകയും ലൈംഗികമായി അപമാനിക്കുകയും ചെയ്തു എന്നാണ് പരാതി.
തനിക്കെതിരെയുള്ള ആരോപണങ്ങൾ വ്യാജമാണെന്ന കുഞ്ഞുമുഹമ്മദിന്റെ വാദങ്ങൾ പോലീസ് തള്ളി. പരാതിക്കാരി മജിസ്ട്രേറ്റിന് നൽകിയ രഹസ്യമൊഴിയിലും ആരോപണങ്ങളിൽ ഉറച്ചുനിന്നു. കൂടാതെ, സംഭവദിവസം കുഞ്ഞുമുഹമ്മദ് താമസിച്ചിരുന്ന മുറിയുടെ സമീപത്തുനിന്ന് പരാതിക്കാരി പരിഭ്രാന്തയായി ഓടിപ്പോകുന്ന സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. ഇത് കേസിലെ നിർണ്ണായക തെളിവായി കുറ്റപത്രത്തിൽ ഉൾപ്പെടുത്തിയിട്ടുണ്ട്.
സ്ത്രീത്വത്തെ അപമാനിക്കൽ, ലൈംഗിക അതിക്രമം എന്നീ വകുപ്പുകൾ പ്രകാരമാണ് കുറ്റപത്രം തയ്യാറാക്കിയിരിക്കുന്നത്. മലയാള സിനിമയിലെ പ്രമുഖ വ്യക്തിക്കെതിരെയുള്ള ഈ നീക്കം വലിയ ചർച്ചകൾക്കാണ് വഴിതെളിച്ചിരിക്കുന്നത്
