ബ്രഹ്മപുരത്ത് പുകഞ്ഞത് രാഷ്ട്രീയപ്പോര് അമിത് ഷായുടെ ഇടപെടലെന്ന് സുരേഷ് ഗോപി തള്ളിക്കളഞ്ഞ് എം.ബി. രാജേഷ്
കൊച്ചി ബ്രഹ്മപുരത്തെ ബിപിസിഎൽ സിബിജി (CBG) പ്ലാന്റ് ഉദ്ഘാടന വേദിയിൽ പദ്ധതിയുടെ ക്രെഡിറ്റിനെച്ചൊല്ലി കേന്ദ്ര സംസ്ഥാന മന്ത്രിമാർ തമ്മിൽ വാക്പോര്. അമിത് ഷായുടെ ഇടപെടലെന്ന് സുരേഷ് ഗോപി; പദ്ധതി പ്രഖ്യാപിച്ചത് നേരത്തെയെന്ന് എം.ബി. രാജേഷ്.
അനില എം കൃഷ്ണൻ 
കൊച്ചി: ബ്രഹ്മപുരത്ത് ബിപിസിഎൽ (BPCL) സ്ഥാപിച്ച കംപ്രസ്ഡ് ബയോഗ്യാസ് (CBG) പ്ലാന്റിന്റെ ഉദ്ഘാടന വേദിയിൽ പദ്ധതിയുടെ പിതൃത്വത്തെച്ചൊല്ലി രാഷ്ട്രീയ വാക്പോര്. പ്ലാന്റ് യാഥാർത്ഥ്യമായത് കേന്ദ്ര ഇടപെടലിലൂടെയാണെന്ന് കേന്ദ്രമന്ത്രി സുരേഷ് ഗോപി അവകാശപ്പെട്ടപ്പോൾ, പദ്ധതി സംസ്ഥാന സർക്കാരിന്റെ നേരത്തെയുള്ള തീരുമാനമാണെന്ന് മന്ത്രി എം.ബി. രാജേഷ് തിരിച്ചടിച്ചു. മുഖ്യമന്ത്രി പിണറായി വിജയൻ ഓൺലൈനായി പ്ലാന്റ് ഉദ്ഘാടനം ചെയ്തു.
അമിത് ഷായുടെ ഇടപെടൽ: സുരേഷ് ഗോപി
2023-ൽ ബ്രഹ്മപുരത്തുണ്ടായ തീപിടിത്തത്തിന് പിന്നാലെ കേന്ദ്രമന്ത്രി അമിത് ഷായുമായി നടത്തിയ ചർച്ചകളാണ് പദ്ധതിയിലേക്ക് നയിച്ചതെന്ന് സുരേഷ് ഗോപി പറഞ്ഞു. തൃശൂർ വടക്കുന്നാഥ ക്ഷേത്ര മൈതാനത്തെത്തിയ അമിത് ഷായോട് താൻ നേരിട്ട് വിഷയം അവതരിപ്പിച്ചുവെന്നും മോദി 2.0 സർക്കാർ നടപ്പാക്കിയ ഈ പദ്ധതിയിൽ രാഷ്ട്രീയമില്ലാത്ത ഇടപെടലുകളാണ് നടന്നതെന്നും അദ്ദേഹം ഓർമ്മിപ്പിച്ചു. ഇതിന് അമിത് ഷായ്ക്കും പ്രധാനമന്ത്രിക്കും സദസ്സ് കൈയ്യടിക്കണമെന്നും അദ്ദേഹം ആവശ്യപ്പെട്ടു.
മറുപടിയുമായി എം.ബി. രാജേഷും പി. രാജീവും
സുരേഷ് ഗോപിയുടെ അവകാശവാദത്തിന് പിന്നാലെ മറുപടിയുമായി മന്ത്രി എം.ബി. രാജേഷ് രംഗത്തെത്തി. അമിത് ഷാ കേരളത്തിൽ വരുന്നതിന് മുൻപ് തന്നെ നിയമസഭയിൽ ബ്രഹ്മപുരം പദ്ധതി പ്രഖ്യാപിച്ചിരുന്നുവെന്ന് അദ്ദേഹം പറഞ്ഞു. ബിപിസിഎൽ പ്രതിനിധികൾ മന്ത്രി പി. രാജീവിനെയാണ് താൽപ്പര്യം അറിയിച്ചത്. തുടർന്ന് തിരുവനന്തപുരത്ത് നടന്ന യോഗത്തിലാണ് പദ്ധതി ഉറപ്പിച്ചത്. സംസ്ഥാന സർക്കാർ ചെയ്ത കാര്യങ്ങൾക്ക് ജനങ്ങൾ താനേ കൈയ്യടിക്കുമെന്നും അത് ചോദിച്ചു വാങ്ങേണ്ട കാര്യമില്ലെന്നും രാജേഷ് പരിഹസിച്ചു.
കേന്ദ്ര സർക്കാരിന് ഇങ്ങനെയൊരു പദ്ധതിയുള്ള കാര്യം സുരേഷ് ഗോപി നേരത്തെ അറിയിച്ചിരുന്നെങ്കിൽ നടപടികൾ കൂടുതൽ വേഗത്തിലാക്കാമായിരുന്നുവെന്ന് മന്ത്രി പി. രാജീവും പ്രതികരിച്ചു.
