ചൂരൽമല പുനരധിവാസം യാഥാർത്ഥ്യത്തിലേക്ക് എൽസ്റ്റൺ ടൗൺഷിപ്പിൽ വെളിച്ചവും വെള്ളവുമെത്തി, വീടുകൾ ഉടൻ കൈമാറും
മുണ്ടക്കൈ–ചൂരൽമല ഉരുൾപൊട്ടൽ അതിജീവിതർക്കായി എൽസ്റ്റൺ എസ്റ്റേറ്റിൽ ഒരുങ്ങുന്ന ടൗൺഷിപ്പിൽ വീടുകൾ പൂർത്തിയായി. കുടിവെള്ളം, വൈദ്യുതി, സോളാർ സംവിധാനങ്ങൾ സജ്ജം.
അനില എം കൃഷ്ണൻ 
ചൂരൽമല പുനരധിവാസം: എൽസ്റ്റൺ ടൗൺഷിപ്പിൽ വെളിച്ചവും വെള്ളവുമെത്തി; വീടുകളുടെ കൈമാറ്റം ഉടൻ
കൽപ്പറ്റ: മുണ്ടക്കൈ–ചൂരൽമല ഉരുൾപൊട്ടൽ ദുരന്തബാധിതർക്കായി സംസ്ഥാന സർക്കാർ എൽസ്റ്റൺ എസ്റ്റേറ്റിൽ നിർമ്മിക്കുന്ന പുനരധിവാസ ടൗൺഷിപ്പ് യാഥാർത്ഥ്യത്തിലേക്ക്. ആദ്യഘട്ടത്തിൽ പട്ടയം കൈമാറിയ 178 വീടുകളിൽ വൈദ്യുതി, കുടിവെള്ള കണക്ഷനുകൾ പൂർത്തിയായി. ഗുണമേന്മ പരിശോധനകൾക്ക് ശേഷം ഉടൻ തന്നെ വീടുകൾ ഗുണഭോക്താക്കൾക്ക് കൈമാറും.
ടൗൺഷിപ്പിലെ നാലാം സോണിൽ നിർമ്മിച്ച 9.5 ലക്ഷം ലിറ്റർ ശേഷിയുള്ള കൂറ്റൻ ജലസംഭരണി കമ്മീഷൻ ചെയ്തു. ഇവിടെ നിന്നുള്ള പൈപ്പ് ലൈനുകൾ വഴി വീടുകളിലെ ടാങ്കുകളിൽ വെള്ളം നിറച്ചു തുടങ്ങി. വൈദ്യുതി വിതരണത്തിനായി 315 കിലോവാട്ടിന്റെ രണ്ട് ട്രാൻസ്ഫോർമറുകളും 11 കെവി ഭൂഗർഭ കേബിൾ ശൃംഖലയും സജ്ജമാക്കിയിട്ടുണ്ട്. കൂടാതെ, ഓരോ വീടിനും 2 കിലോവാട്ട് ശേഷിയുള്ള സോളാർ പാനലുകളും സ്ഥാപിച്ചിട്ടുണ്ട്. മേഖലയിലെ ദീർഘകാല ആവശ്യങ്ങൾക്കായി 110 കിലോവാട്ട് സബ്സ്റ്റേഷന്റെ നിർമ്മാണവും ആരംഭിച്ചു.
നിർമ്മാണത്തിൽ അതീവ ജാഗ്രതയാണ് സർക്കാർ പുലർത്തുന്നത്. വീടുകളുടെ ടെറസിൽ 24 മണിക്കൂർ വെള്ളം കെട്ടിനിർത്തിയുള്ള 'പോണ്ടിങ് ടെസ്റ്റ്' രണ്ട് തവണ പൂർത്തിയാക്കി. സ്വിമ്മിങ് പൂളുകളിൽ ഉപയോഗിക്കുന്ന തരം വാട്ടർ പ്രൂഫിംഗും ഫൈബർ മെഷും ഉപയോഗിച്ചാണ് ചോർച്ച ഒഴിവാക്കിയിരിക്കുന്നത്. ഊരാളുങ്കൽ ലേബർ കോൺട്രാക്ട് സൊസൈറ്റിയും കിഫ്കോണും സംയുക്തമായാണ് അവസാനഘട്ട പരിശോധനകൾ നടത്തുന്നത്. വരും ദിവസങ്ങളിൽ ഗുണഭോക്താക്കളെ നേരിട്ട് വിളിച്ച് ബോധ്യപ്പെടുത്തിയ ശേഷമേ താക്കോൽ കൈമാറൂ.
പുതിയ വീടുകളിലേക്ക് മാറുമ്പോൾ ആവശ്യമായ ഫർണിച്ചറുകളും ഗൃഹോപകരണങ്ങളും വാങ്ങാൻ ഓരോ കുടുംബത്തിനും സർക്കാർ ഒരു ലക്ഷം രൂപ വീതം അനുവദിച്ചു. ഗുണഭോക്താക്കൾക്ക് ഇഷ്ടമുള്ള സാധനങ്ങൾ വാങ്ങി ബില്ല് സമർപ്പിക്കുന്ന മുറയ്ക്ക് തുക അക്കൗണ്ടിലെത്തും.
ടൗൺഷിപ്പിലെ 11.72 കിലോമീറ്റർ നീളുന്ന റോഡുകളുടെ നിർമ്മാണവും പത്ത് ബയോ സ്വീവേജ് ട്രീറ്റ്മെന്റ് പ്ലാന്റുകളുടെ (STP) പണിയും അവസാന ഘട്ടത്തിലാണ്. 300-ലധികം വീടുകളുടെ വാർപ്പ് ഇതിനോടകം പൂർത്തിയായിട്ടുണ്ട്.
