പെരുമ്പാവൂരിൽ പൊതുസ്ഥലത്തിരുന്ന് ലഹരിമരുന്ന് ഉപയോഗിച്ച രണ്ട് അതിഥി തൊഴിലാളികൾ അറസ്റ്റിൽ ഹെറോയിനും പിടിച്ചെടുത്തു
പെരുമ്പാവൂരിൽ പൊതുസ്ഥലത്തിരുന്ന് സിറിഞ്ച് ഉപയോഗിച്ച് രാസലഹരി ഉപയോഗിച്ച രണ്ട് അസം സ്വദേശികളെ പോലീസ് അറസ്റ്റ് ചെയ്തു. ഇവരിൽ നിന്ന് ആറ് ബോട്ടിൽ ഹെറോയിനും കണ്ടെടുത്തു. വീഡിയോ വൈറലായതിനെ തുടർന്നാണ് നടപടി.
അനില എം കൃഷ്ണൻ 
പെരുമ്പാവൂരിൽ പൊതുസ്ഥലത്തിരുന്ന് മയക്കുമരുന്ന് കുത്തിവെച്ച രണ്ട് അസം സ്വദേശികൾ അറസ്റ്റിൽ; ഹെറോയിനും പിടിച്ചെടുത്തു
പെരുമ്പാവൂർ: പൊതുസ്ഥലത്തിരുന്ന് പരസ്യമായി രാസലഹരി ഉപയോഗിച്ച രണ്ട് അതിഥി തൊഴിലാളികളെ പെരുമ്പാവൂർ പോലീസ് അറസ്റ്റ് ചെയ്തു. അസം മൊറിഗാവ് സ്വദേശി അനമുൽ ഹഖ് (29), നാഗോൺ സ്വദേശി അസറുൽ ഇസ്ലാം (21) എന്നിവരെയാണ് പെരുമ്പാവൂർ എഎസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘം (ഡാൻസാഫ്) പിടികൂടിയത്. പ്രതികളിൽ നിന്ന് ആറ് ബോട്ടിൽ ഹെറോയിനും പോലീസ് കണ്ടെടുത്തു.
കഴിഞ്ഞ ദിവസം പെരുമ്പാവൂരിലെ ഒരു പൊതുസ്ഥലത്തിരുന്ന് ഇവർ സിറിഞ്ച് ഉപയോഗിച്ച് ലഹരിമരുന്ന് ശരീരത്തിൽ കുത്തിവെക്കുന്ന ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിച്ചിരുന്നു. ദൃശ്യങ്ങൾ ശ്രദ്ധയിൽപ്പെട്ടതിനെ തുടർന്ന് എറണാകുളം റൂറൽ ജില്ലാ പോലീസ് മേധാവി അടിയന്തരമായി കേസെടുക്കാൻ നിർദ്ദേശം നൽകുകയായിരുന്നു.
തുടർന്ന് നടത്തിയ ഊർജ്ജിതമായ അന്വേഷണത്തിലാണ് ഒളിവിൽ പോകാൻ ശ്രമിച്ച പ്രതികളെ പോലീസ് സംഘം വലയിലാക്കിയത്. ഇവർക്ക് ലഹരിമരുന്ന് എവിടെ നിന്നാണ് ലഭിച്ചത് എന്നതിനെക്കുറിച്ചും പെരുമ്പാവൂർ കേന്ദ്രീകരിച്ച് പ്രവർത്തിക്കുന്ന ലഹരി മാഫിയകളെക്കുറിച്ചും പോലീസ് അന്വേഷണം ശക്തമാക്കിയിട്ടുണ്ട്. പ്രതികളെ കോടതിയിൽ ഹാജരാക്കും.
