കോടികളുടെ ലഹരിമരുന്ന് കേസ് തെളിവെടുപ്പിന് കൊണ്ടുപോകുന്നതിനിടെ പ്രതി ട്രെയിനിൽ നിന്ന് ചാടി രക്ഷപ്പെട്ടു
കോഴിക്കോട് മുക്കത്ത് കോടികളുടെ ലഹരിമരുന്നുമായി പിടിയിലായ പ്രതി മുഹമ്മദ് ഹനീഫ തെളിവെടുപ്പിനായി ഡൽഹിയിലേക്ക് കൊണ്ടുപോകുന്നതിനിടെ വഡോദരയ്ക്ക് സമീപം രാജധാനി എക്സ്പ്രസിൽ നിന്ന് ചാടി രക്ഷപ്പെട്ടു
കോടികളുടെ ലഹരിമരുന്ന് കേസ്: തെളിവെടുപ്പിന് കൊണ്ടുപോകുന്നതിനിടെ പ്രതി ട്രെയിനിൽ നിന്ന് ചാടി രക്ഷപ്പെട്ടു
കോഴിക്കോട്: കോടികൾ വിലമതിക്കുന്ന മാരക ലഹരിമരുന്നുമായി പിടിയിലായ കേസ് പ്രതി പൊലീസ് കസ്റ്റഡിയിൽ നിന്ന് ഓടുന്ന ട്രെയിനിൽ ചാടി രക്ഷപ്പെട്ടു. മുക്കം പൂളപ്പൊയിൽ സ്വദേശി മുഹമ്മദ് ഹനീഫയാണ് ഗുജറാത്തിലെ വഡോദരയ്ക്ക് സമീപം രാജധാനി എക്സ്പ്രസിൽ നിന്ന് പുറത്തേക്ക് ചാടിയത്. ശനിയാഴ്ച പുലർച്ചെ 12.30 ഓടെയായിരുന്നു സംഭവം.
മുക്കം ഇൻസ്പെക്ടർ നിബിൻ ജോയിയുടെ നേതൃത്വത്തിലുള്ള നാലംഗ പൊലീസ് സംഘവും ഡാൻസാഫ് (DANSAF) ഉദ്യോഗസ്ഥരും ചേർന്ന് പ്രതിയെ തെളിവെടുപ്പിനായി ഡൽഹിയിലേക്ക് കൊണ്ടുപോകുന്നതിനിടെയാണ് നാടകീയ രംഗങ്ങൾ അരങ്ങേറിയത്. കൈവിലങ്ങോടെയാണ് പ്രതി ട്രെയിനിൽ നിന്ന് പുറത്തേക്ക് ചാടിയതെന്നാണ് വിവരം. രക്ഷപ്പെട്ട ഹനീഫയ്ക്കായി ഗുജറാത്ത് റെയിൽവേ പൊലീസിന്റെ സഹായത്തോടെ കേരള പൊലീസ് തിരച്ചിൽ ഊർജിതമാക്കിയിട്ടുണ്ട്.
കഴിഞ്ഞ ഏപ്രിൽ രണ്ടിനാണ് വിപണിയിൽ കോടികൾ വിലമതിക്കുന്ന 2.803 കിലോഗ്രാം എംഡിഎംഎയുമായി (MDMA) ഹനീഫയെ പൊലീസ് പിടികൂടിയത്. മുക്കം മിനി സിവിൽ സ്റ്റേഷൻ പരിസരത്ത് വെച്ച് 500 ഗ്രാം ലഹരിമരുന്നുമായാണ് ഇയാൾ ആദ്യം വലയിലായത്. തുടർന്ന് ഇയാൾ താമസിച്ചിരുന്ന വാടകവീട്ടിൽ നടത്തിയ വിശദമായ പരിശോധനയിലാണ് ബാക്കി ലഹരിമരുന്ന് കൂടി കണ്ടെടുത്തത്. മേയ് ഒന്നിന് ഈ വാടകവീട്ടിലെത്തിച്ച് പ്രതിയുടെ പ്രാഥമിക തെളിവെടുപ്പ് പൊലീസ് പൂർത്തിയാക്കിയിരുന്നു. ഇതിന് ശേഷമാണ് ലഹരിമരുന്നിന്റെ പ്രധാന ഉറവിടം തേടി ഡൽഹിയിലേക്ക് യാത്ര തിരിച്ചത്.
ഡൽഹി, ബെംഗളൂരു എന്നിവിടങ്ങളിൽ നിന്നാണ് കേരളത്തിലേക്ക് വൻതോതിൽ ലഹരിമരുന്ന് എത്തിച്ചിരുന്നതെന്ന് പ്രതി പൊലീസിനോട് സമ്മതിച്ചിരുന്നു. ഈ കേസുമായി ബന്ധപ്പെട്ട് ഹനീഫയ്ക്കൊപ്പം താമസിച്ചിരുന്ന ഒരു സ്ത്രീയെയും പൊലീസ് നേരത്തെ അറസ്റ്റ് ചെയ്തിരുന്നു. പ്രതിയുടെ രക്ഷപ്പെടലോടെ ലഹരിമരുന്ന് മാഫിയയുടെ പ്രധാന ഉറവിടം തേടിയുള്ള അന്വേഷണത്തിന് താല്കാലിക തിരിച്ചടിയേറ്റിരിക്കുകയാണ്
പൾസ് പോളിയോ ദിനാചരണം എറണാകുളം ജില്ലയിൽ 1.61 ലക്ഷം കുട്ടികൾക്ക് തുള്ളിമരുന്ന് നൽകും
കുഞ്ഞുങ്ങൾക്കായുള്ള സൗജന്യ ചികിത്സാ കൂട്ടായ്മകൾ മാതൃകാപരം മുഖ്യമന്ത്രി വി ഡി സതീശൻ
കൊലക്കേസ് പ്രതിയെ കാപ്പ ചുമത്തി വിയ്യൂർ ജയിലിൽ അടച്ചു നടപടി ജാമ്യത്തിലിറങ്ങി വീണ്ടും കവർച്ച നടത്തിയതോടെ
പ്രതിസന്ധികൾ മറികടന്ന് കബഡിയിൽ സ്വർണം നേടി അട്ടപ്പാടിയിലെ പെൺപട
സൗന്ദര്യവർദ്ധക ക്രീം ഉപയോഗിച്ച 17 കാരിക്ക് വൃക്കരോഗം ബാലാവകാശ കമ്മിഷൻ സ്വമേധയാ കേസെടുത്തു
അംഗീകാരമില്ലാത്ത കളരിപ്പയറ്റ് ചാമ്പ്യൻഷിപ്പ് കായികതാരങ്ങൾ ശ്രദ്ധിക്കണം 
