കേരള ടൂറിസത്തിൽ റെക്കോർഡ് കുതിപ്പ് സഞ്ചാരികളുടെ എണ്ണം 2 കോടി കടന്നു വൈപ്പിൻ ബീച്ച് കോറിഡോർ പദ്ധതിക്ക് തുടക്കമായി
കേരളത്തിലേക്കുള്ള വിനോദസഞ്ചാരികളുടെ എണ്ണം രണ്ട് കോടി കടന്നതായി മന്ത്രി പി.എ. മുഹമ്മദ് റിയാസ്. വൈപ്പിൻ ബീച്ച് കോറിഡോർ വികസന പദ്ധതിയുടെ ഉദ്ഘാടനം മന്ത്രി നിർവഹിച്ചു.
Angel Varghese 
കേരളം ലോകരാജ്യങ്ങളോട് മത്സരിക്കുന്നു; വിനോദസഞ്ചാരികളുടെ എണ്ണത്തിൽ വൻ വർധന: മന്ത്രി പി.എ. മുഹമ്മദ് റിയാസ്
കൊച്ചി: കേരളത്തിലേക്കുള്ള വിനോദസഞ്ചാരികളുടെ എണ്ണത്തിൽ റെക്കോർഡ് വർധനയുണ്ടായതായും ടൂറിസം മേഖലയിൽ കേരളം ഇന്ന് മത്സരിക്കുന്നത് അയൽ സംസ്ഥാനങ്ങളോടല്ല, മറിച്ച് ലോകരാജ്യങ്ങളോടാണെന്നും വിനോദസഞ്ചാര-പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ്. വൈപ്പിൻകരയുടെ ടൂറിസം മുഖച്ഛായ മാറ്റുന്ന 'വൈപ്പിൻ ബീച്ച് കോറിഡോർ' പദ്ധതിയുടെ നിർമ്മാണോദ്ഘാടനം ഓൺലൈനായി നിർവഹിച്ച് സംസാരിക്കുകയായിരുന്നു അദ്ദേഹം.
2025-ൽ കേരളം സന്ദർശിച്ച വിനോദസഞ്ചാരികളുടെ എണ്ണം രണ്ട് കോടി പിന്നിട്ടതായും മന്ത്രി അറിയിച്ചു. വിദേശ സഞ്ചാരികളുടെ എണ്ണത്തിൽ വലിയ കുതിച്ചുചാട്ടമാണ് ഉണ്ടായത്. എല്ലാ വിഭാഗം സഞ്ചാരികളും ഒരേപോലെ ഇഷ്ടപ്പെടുന്ന ആഗോള കേന്ദ്രമായി കേരളം മാറിയെന്നും അദ്ദേഹം കൂട്ടിച്ചേർത്തു.
വൈപ്പിൻ ബീച്ച് കോറിഡോർ പദ്ധതി
സംസ്ഥാന വിനോദസഞ്ചാര വകുപ്പ് 2.97 കോടി രൂപ ചെലവഴിച്ചാണ് വൈപ്പിൻ ബീച്ച് കോറിഡോർ വികസന പദ്ധതി നടപ്പിലാക്കുന്നത്. വൈപ്പിൻകരയിലെ പ്രധാന ടൂറിസം കേന്ദ്രങ്ങളായ ചെറായി, കുഴുപ്പിള്ളി, മുനമ്പം എന്നീ ബീച്ചുകളുടെ നവീകരണവും അടിസ്ഥാന സൗകര്യ വികസനവുമാണ് ഇതിലൂടെ ലക്ഷ്യമിടുന്നത്.
കെ.എൻ. ഉണ്ണികൃഷ്ണൻ എം.എൽ.എ അധ്യക്ഷത വഹിച്ച ചടങ്ങിൽ വൈപ്പിൻ ബ്ലോക്ക് പഞ്ചായത്ത് പ്രസിഡന്റ് പ്രൊഫ. കെ.കെ. ജോഷി, പള്ളിപ്പുറം ഗ്രാമപഞ്ചായത്ത് പ്രസിഡന്റ് ഇ.കെ. ജയൻ, കുഴുപ്പിള്ളി ഗ്രാമപഞ്ചായത്ത് പ്രസിഡന്റ് ലിജി തദേവൂസ് തുടങ്ങിയവർ പങ്കെടുത്തു.
