സപ്ലൈകോ പഞ്ചസാര തട്ടിപ്പ് ഡെപ്യൂട്ടി മാനേജരടക്കം ഏഴ്പേർക്ക് സസ്പെൻഷൻ
സപ്ലൈകോ ഓണം ഗിഫ്റ്റ് കാർഡ് ദുരുപയോഗം ചെയ്ത് സ്വകാര്യ കമ്പനിക്ക് പഞ്ചസാര കൈമാറിയ സംഭവത്തിൽ സപ്ലൈകോ ഡെപ്യൂട്ടി മാനേജർ അടക്കം 7 പേരെ കൂടി സസ്പെൻഡ് ചെയ്തു. ഭക്ഷ്യമന്ത്രി അനൂപ് ജേക്കബിന്റെ നിർദ്ദേശപ്രകാരമാണ് നടപടി.
അനില എം കൃഷ്ണൻ 
ഗിഫ്റ്റ് കാർഡിന്റെ മറവിൽ പഞ്ചസാര തട്ടിപ്പ്: സപ്ലൈകോയിൽ ഡെപ്യൂട്ടി മാനേജർ ഉൾപ്പെടെ 7 പേർക്ക് കൂടി സസ്പെൻഷൻ
കൊച്ചി: ഓണത്തോടനുബന്ധിച്ച് സപ്ലൈകോ പുറത്തിറക്കിയ ഗിഫ്റ്റ് കാർഡുകൾ ദുരുപയോഗം ചെയ്ത് സ്വകാര്യ കമ്പനിക്ക് വൻതോതിൽ പഞ്ചസാര കൈമാറിയ സംഭവത്തിൽ കൂടുതൽ നടപടി. സപ്ലൈകോ ഹെഡ് ഓഫീസിലെ ഡെപ്യൂട്ടി മാനേജർ ഉൾപ്പെടെ ഏഴ് ജീവനക്കാരെ കൂടി അന്വേഷണവിധേയമായി സസ്പെൻഡ് ചെയ്തു. ഭക്ഷ്യമന്ത്രി അനൂപ് ജേക്കബിന്റെ നിർദ്ദേശപ്രകാരമാണ് ഉത്തരവ്.
സപ്ലൈകോ ഹെഡ് ഓഫീസിലെ ഡെപ്യൂട്ടി മാനേജർ സജീവ് പോൾ, വിവിധ മാവേലി സ്റ്റോറുകളിലെ ഇൻ-ചാർജുമാരായ അഞ്ജു വിജയൻ (അറക്കപ്പടി), സന്ധ്യ എ. എസ് (തുറവൂർ), ദിവ്യ എം. ആർ (പാലിശ്ശേരി), സൗമിനി എസ് (പോഞ്ഞാശ്ശേരി), മഞ്ജു ആന്റണി (കറുകുറ്റി), ബേസിൽ ചെറിയ എ (ശ്രീമൂലനഗരം) എന്നിവരെയാണ് സസ്പെൻഡ് ചെയ്തത്. പെരുമ്പാവൂർ ഡിപ്പോയിലെ മാവേലി കസ്റ്റോഡിയൻ രജീഷ് രവീന്ദ്രനെ മുൻപ് സസ്പെൻഡ് ചെയ്തിരുന്നു.
തട്ടിപ്പ് നടന്നത് ഇങ്ങനെ:
'കീർത്തി നിർമ്മൽ' എന്ന സ്വകാര്യ കമ്പനിക്ക് സപ്ലൈകോ ഓണം പദ്ധതി പ്രകാരം 1000 രൂപയുടെ 1000 കൂപ്പണുകൾ നൽകിയിരുന്നു. ഈ കൂപ്പണുകൾ ഉപയോഗിച്ച് മുഴുവൻ തുകയ്ക്കും സബ്സിഡിയില്ലാത്ത പഞ്ചസാര മാത്രം കൈമാറാൻ മാവേലി കസ്റ്റോഡിയൻ രജീഷ് രവീന്ദ്രൻ പെരുമ്പാവൂർ ഡിപ്പോയിൽ നിന്ന് വിവിധ വിൽപ്പനശാലകളിലേക്ക് പഞ്ചസാര ഇഷ്യൂ ചെയ്യുകയും ബില്ലടിക്കുകയും ചെയ്തു.
എന്നാൽ പഞ്ചസാര കൈമാറിയത് രേഖകളിൽ മാത്രമായിരുന്നു. യഥാർത്ഥ സ്റ്റോക്ക് ഡിപ്പോയിൽ തന്നെ സൂക്ഷിച്ച് ക്രമക്കേട് നടത്തുകയായിരുന്നുവെന്ന് സപ്ലൈകോ വിജിലൻസ് വിഭാഗം കണ്ടെത്തി. വിപണിയിൽ പഞ്ചസാരയ്ക്ക് വൻ വിലവർധനവുള്ള സമയത്താണ് ഈ നിയമവിരുദ്ധ വിൽപ്പന നടന്നത്.
സപ്ലൈകോ കേന്ദ്ര കാര്യാലയത്തിലെ ഉന്നതോദ്യോഗസ്ഥരുടെ അറിവോടെയാണ് ഇതെല്ലാം നടക്കുന്നതെന്ന് തെറ്റിദ്ധരിപ്പിച്ച് കീഴ്ജീവനക്കാരെ ക്രമക്കേടിന് പ്രേരിപ്പിച്ചതിനാണ് ഡെപ്യൂട്ടി മാനേജർ സജീവ് പോളിനെതിരെ നടപടിയെടുത്തത്. സപ്ലൈകോയിലെ ഇത്തരം ക്രമക്കേടുകൾ വച്ചുപൊറുപ്പിക്കില്ലെന്നും കുറ്റക്കാർക്കെതിരെ മുഖം നോക്കാതെ കടുത്ത നടപടി സ്വീകരിക്കുമെന്നും മന്ത്രി അനൂപ് ജേക്കബ് അറിയിച്ചു.
