തിരഞ്ഞെടുപ്പ് വോട്ടെണ്ണൽ ഉദ്യോഗസ്ഥരുടെ ആദ്യഘട്ട പട്ടിക ഇന്ന് തയ്യാറാകും പരിശീലനം ഏപ്രിൽ 29 മുതൽ
നിയമസഭാ തിരഞ്ഞെടുപ്പ് വോട്ടെണ്ണൽ നടപടികൾക്കായി ഉദ്യോഗസ്ഥരെ നിയമിക്കുന്ന ആദ്യഘട്ട റാൻഡമൈസേഷൻ ഇന്ന് നടക്കും. ഓർഡർ പോർട്ടൽ വഴി ഉദ്യോഗസ്ഥർക്ക് ഉത്തരവുകൾ ഡൗൺലോഡ് ചെയ്യാം.
Angel Varghese 
വോട്ടെണ്ണൽ ഉദ്യോഗസ്ഥരുടെ ആദ്യഘട്ട റാൻഡമൈസേഷൻ ഇന്ന് ഏപ്രിൽ 29 മുതൽ പരിശീലനം
കൊച്ചി: നിയമസഭാ തിരഞ്ഞെടുപ്പിന്റെ വോട്ടെണ്ണൽ നടപടികൾക്കായി കൗണ്ടിംഗ് സൂപ്പർവൈസർമാർ, കൗണ്ടിംഗ് അസിസ്റ്റന്റുമാർ, മൈക്രോ ഒബ്സർവർമാർ എന്നിവരെ നിയമിക്കുന്നതിനുള്ള ആദ്യഘട്ട റാൻഡമൈസേഷൻ ഇന്ന് (ഏപ്രിൽ 27, തിങ്കളാഴ്ച) നടക്കും. രാവിലെ 10 മണിക്ക് റിട്ടേണിംഗ് ഓഫീസർമാരുടെ സാന്നിധ്യത്തിലാണ് നടപടികൾ പൂർത്തിയാക്കുകയെന്ന് ജില്ലാ കളക്ടർ ജി. പ്രിയങ്ക അറിയിച്ചു.
സംസ്ഥാന തിരഞ്ഞെടുപ്പ് കമ്മീഷന്റെ 'ഓർഡർ പോർട്ടൽ' വഴിയാണ് നിയമന നടപടികൾ ഏകോപിപ്പിക്കുന്നത്. തിരഞ്ഞെടുക്കപ്പെട്ട ഉദ്യോഗസ്ഥരുടെ പട്ടിക റാൻഡമൈസേഷനിലൂടെ തയ്യാറാക്കും.
ഉത്തരവുകൾ ഇന്ന് തന്നെ വിതരണം ചെയ്യണം
ഓർഡർ പോർട്ടലിൽ നിന്നും നിയമന ഉത്തരവുകൾ ഡൗൺലോഡ് ചെയ്ത് ബന്ധപ്പെട്ട ഉദ്യോഗസ്ഥർക്ക് ഇന്ന് തന്നെ വിതരണം ചെയ്യേണ്ടതാണ്. ഉത്തരവ് കൈമാറിയ ശേഷം പോർട്ടലിൽ സ്റ്റാറ്റസ് അപ്ഡേറ്റ് ചെയ്യണമെന്ന് അധികൃതർ നിർദ്ദേശിച്ചു. ഉദ്യോഗസ്ഥർക്ക് സ്വന്തം മൊബൈൽ നമ്പർ ഉപയോഗിച്ച് പോർട്ടലിൽ ലോഗിൻ ചെയ്ത് നേരിട്ടും ഉത്തരവുകൾ ഡൗൺലോഡ് ചെയ്യാം. തങ്ങളുടെ കീഴിലുള്ള എല്ലാ ഉദ്യോഗസ്ഥർക്കും ഉത്തരവുകൾ ലഭിച്ചുവെന്ന് തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാർ ഉറപ്പുവരുത്തണം.
പരിശീലനം ഏപ്രിൽ 29 മുതൽ
നിയമനം ലഭിച്ച വോട്ടെണ്ണൽ ഉദ്യോഗസ്ഥർക്കുള്ള പരിശീലന പരിപാടികൾ ഏപ്രിൽ 29 മുതൽ കാക്കനാട് സിവിൽ സ്റ്റേഷനിൽ ആരംഭിക്കും. വോട്ടെണ്ണൽ നടപടികൾ പൂർണ്ണമായും സുതാര്യവും കൃത്യതയുള്ളതുമാക്കുന്നതിനായി വിപുലമായ സജ്ജീകരണങ്ങളാണ് ജില്ലാ ഭരണകൂടം ഒരുക്കിയിരിക്കുന്നത്.
