നഗരങ്ങളിലെ ശുചിത്വ പരിപാലനം ഊർജിതമാക്കണം സ്വച്ഛ് ഭാരത് മിഷൻ ശിൽപശാല മേയർ വി.കെ മിനിമോൾ ഉദ്ഘാടനം ചെയ്തു
സ്വച്ഛ് ഭാരത് മിഷൻ (നഗരം) 2.0 പദ്ധതിയുടെയും മാലിന്യ സംസ്കരണ പ്രവർത്തനങ്ങളുടെയും കാര്യക്ഷമമായ നടത്തിപ്പിനായി ശുചിത്വ മിഷന്റെ നേതൃത്വത്തിൽ മേഖലാതല ശിൽപശാല സംഘടിപ്പിച്ചു.
അനില എം കൃഷ്ണൻ 
സ്വച്ഛ് ഭാരത് മിഷൻ 2.0: നഗരങ്ങളിലെ മാലിന്യസംസ്കരണം ശക്തമാക്കാൻ മേഖലാതല ശിൽപശാല നടന്നു
കൊച്ചി: സ്വച്ഛ് ഭാരത് മിഷൻ (നഗരം) 2.0 പദ്ധതിയുടെയും നഗരപ്രദേശങ്ങളിലെ മാലിന്യ സംസ്കരണ പ്രവർത്തനങ്ങളുടെയും കാര്യക്ഷമമായ നടത്തിപ്പ് ഉറപ്പാക്കുന്നതിനായി ശുചിത്വ മിഷന്റെ നേതൃത്വത്തിൽ മേഖലാതല ശിൽപശാല സംഘടിപ്പിച്ചു. എറണാകുളം ടൗൺ ഹാളിൽ നടന്ന ശില്പശാല കൊച്ചി കോർപ്പറേഷൻ മേയർ അഡ്വ. വി.കെ. മിനിമോൾ ഉദ്ഘാടനം ചെയ്തു.
മാലിന്യമുക്ത നഗരങ്ങൾ സൃഷ്ടിക്കുക എന്ന ലക്ഷ്യത്തോടെ നടപ്പിലാക്കുന്ന സ്വച്ഛ് ഭാരത് മിഷൻ 2.0 പദ്ധതിയുടെ പ്രവർത്തന പുരോഗതി ശിൽപശാലയിൽ വിലയിരുത്തി. നഗരസഭകളുടെ ഉത്തരവാദിത്വങ്ങൾ, ഹരിത കർമ്മസേനയുടെ പ്രവർത്തനങ്ങൾ കൂടുതൽ ഊർജിതമാക്കൽ, ശുചിത്വ റാങ്കിംഗ് മെച്ചപ്പെടുത്തൽ, വിവിധ കേന്ദ്ര-സംസ്ഥാന പദ്ധതികളുടെ ഏകോപനം തുടങ്ങിയ പ്രധാന വിഷയങ്ങൾ ചർച്ചയായി. നഗരങ്ങളിലെ മാലിന്യ സംസ്കരണ സംവിധാനങ്ങളുടെ കാര്യക്ഷമത വർദ്ധിപ്പിക്കുന്നതിനും പദ്ധതികൾ സമയബന്ധിതമായി പൂർത്തിയാക്കുന്നതിനും ആവശ്യമായ മാർഗനിർദേശങ്ങൾ ശിൽപശാലയിൽ അവതരിപ്പിച്ചു.
വിവിധ ജില്ലകളിലെ തദ്ദേശസ്വയംഭരണ സ്ഥാപന പ്രതിനിധികളുടെ പങ്കാളിത്തം കൊണ്ട് ശില്പശാല ശ്രദ്ധേയമായി. ശുചിത്വ മിഷൻ ജില്ലാ കോ-ഓഡിനേറ്റർ ഡോ. ശീതൾ ജി. മോഹൻ, കേരള മുനിസിപ്പൽ ചെയർമെൻസ് ചേംബർ ചെയർമാൻ എം.പി. ജാക്സൺ, ശുചിത്വ മിഷൻ ഡയറക്ടർ (ഓപ്പറേഷൻസ്) ജഹാംഗീർ, ശുചിത്വ മിഷൻ എക്സ്പേർട്ട് (കപ്പാസിറ്റി ബിൽഡിംഗ്) ആർ. എസ്. അമീർഷാ എന്നിവർ സംസാരിച്ചു.
കേരള മുനിസിപ്പൽ ചെയർമെൻസ് ചേംബർ എക്സിക്യൂട്ടീവ് അംഗങ്ങളായ ജമാൽ മണക്കാട്, രമേശ് ഡി. കുറുപ്പ് എന്നിവരും കോട്ടയം, എറണാകുളം, പാലക്കാട്, തൃശൂർ, ഇടുക്കി ജില്ലകളിലെ നഗരസഭാ അധ്യക്ഷന്മാർ, ആരോഗ്യ സ്റ്റാൻഡിംഗ് കമ്മിറ്റി അധ്യക്ഷന്മാർ, സെക്രട്ടറിമാർ, സിറ്റി മിഷൻ മാനേജർമാർ തുടങ്ങിയവരും ശിൽപശാലയിൽ പങ്കെടുത്തു. നഗരങ്ങളിലെ ശുചിത്വ പരിപാലനത്തിൽ ജനപങ്കാളിത്തം ഉറപ്പാക്കിക്കൊണ്ടുള്ള തുടർപ്രവർത്തനങ്ങൾക്ക് ശിൽപശാല രൂപം നൽകി.
