കാണാതായ രാജേഷിന്റെയും ഹനീഫയുടെയും മൃതദേഹങ്ങൾ കണ്ടെത്തി
കണ്ണൂർ കാര്യങ്കോട്, കാഞ്ഞിരപ്പുഴ എന്നിവിടങ്ങളിൽ ഒഴുക്കിൽപ്പെട്ട് കാണാതായ തിരുവനന്തപുരം സ്വദേശി രാജേഷിന്റെയും പേരാവൂർ സ്വദേശി ഹനീഫയുടെയും മൃതദേഹങ്ങൾ കണ്ടെത്തി. ദിവസങ്ങൾ നീണ്ട തെരച്ചിലിനൊടുവിലാണ് മൃതദേഹങ്ങൾ ലഭിച്ചത്.
അനില എം കൃഷ്ണൻ 
കണ്ണൂരിൽ പുഴയിൽ കാണാതായ രണ്ടുപേരുടെ മൃതദേഹങ്ങൾ കണ്ടെടുത്തു; പ്രാർത്ഥനകൾ വിഫലം
കണ്ണൂർ: അതിശക്തമായ മഴയെ തുടർന്നുണ്ടായ കുത്തൊഴുക്കിൽപ്പെട്ട് കണ്ണൂർ ജില്ലയിലെ വിവിധ ഭാഗങ്ങളിൽ കാണാതായ രണ്ടുപേരുടെ മൃതദേഹങ്ങൾ കണ്ടെടുത്തു. ശനിയാഴ്ച കാര്യങ്കോട് പുഴയിലെ മീന്തുള്ളിയിൽ കാണാതായ തിരുവനന്തപുരം കല്ലിയൂർ സ്വദേശി ആർ. രാജേഷ് (36), കാഞ്ഞിരപ്പുഴയിൽ കാണാതായ പേരാവൂർ മണത്തണ കൊട്ടംചുരത്ത് വയൽപ്പീടികയിൽ ഹനീഫ (43) എന്നിവരുടെ മൃതദേഹങ്ങളാണ് ചൊവ്വാഴ്ച കണ്ടെത്തിയത്. മൂന്ന് ദിവസമായി തുടർന്ന തിരച്ചിലിനൊടുവിലാണ് ഇവരുടെ മൃതദേഹങ്ങൾ ലഭിച്ചത്.
ചൊവ്വാഴ്ച രാവിലെ 10.30-ഓടെ മണത്തണ വില്ലേജ് പരിധിയിൽ കാഞ്ഞിരപ്പുഴ സർവീസ് സ്റ്റേഷനു സമീപത്തുനിന്നാണ് ഹനീഫയുടെ മൃതദേഹം കണ്ടെടുത്തത്. പേരാവൂർ, ഇരിട്ടി, തലശ്ശേരി എന്നിവിടങ്ങളിൽ നിന്നുള്ള അഗ്നിശമന സേനാംഗങ്ങളും സിവിൽ ഡിഫൻസ്, ആപ്തമിത്ര വളണ്ടിയർമാരും ചേർന്നാണ് തിരച്ചിൽ നടത്തിയത്. ഇൻക്വസ്റ്റ് നടപടികൾക്ക് ശേഷം തലശ്ശേരി ജനറൽ ആശുപത്രിയിൽ പോസ്റ്റ്മോർട്ടം നടത്തി മൃതദേഹം കൊട്ടൻചുരം പള്ളി ഖബർസ്ഥാനിൽ സംസ്കരിച്ചു.
ഉച്ചയ്ക്ക് ഒരു മണിയോടെ കാര്യങ്കോട് പുഴയിലെ ഇടവരമ്പ് ഭാഗത്തുനിന്നാണ് രാജേഷിന്റെ മൃതദേഹം കണ്ടെത്തിയത്. മീന്തുള്ളി നീന്തൽ പരിശീലന കേന്ദ്രത്തിലെ ഇൻസ്ട്രക്ടറായ രാജേഷ് ശനിയാഴ്ച രാവിലെ മീന്തുള്ളി തുരുത്തിൽ ഒറ്റപ്പെട്ടുപോയ 61-കാരനെ രക്ഷിക്കാൻ ശ്രമിക്കുന്നതിനിടെയാണ് ഒഴുക്കിൽപ്പെട്ടത്.
രാജേഷിനായുള്ള തിരച്ചിലിനായി കേരള വനം വകുപ്പ് അഭ്യർത്ഥിച്ചതനുസരിച്ച് കർണാടകയിലെ വിരാജ്പേട്ട ഡിവിഷനിലുള്ള മൺറോത്ത് റേഞ്ചിൽ കർണാടക വനപാലകരും രംഗത്തിറങ്ങിയിരുന്നു. കേരള ഭാഗത്ത് കണ്ണൂർ ഡിവിഷൻ, തളിപ്പറമ്പ് റേഞ്ചിലെ വനപാലകരും റാഫ്റ്റിംഗ് സംഘവും അഗ്നിശമന സേനയുമാണ് തിരച്ചിൽ നടത്തിയത്. മൃതദേഹം പരിയാരം മെഡിക്കൽ കോളേജിൽ പോസ്റ്റ്മോർട്ടത്തിന് ശേഷം സ്വദേശമായ തിരുവനന്തപുരത്തേക്ക് കൊണ്ടുപോകും.
