ചേർത്തല ഡിവൈഎസ്പി വിജിലൻസ് കസ്റ്റഡിയിൽ 50,000 രൂപ കൈക്കൂലി വാങ്ങുന്നതിനിടെ അറസ്റ്റ്
വ്യവസായിയിൽ നിന്ന് 50,000 രൂപ കൈക്കൂലി വാങ്ങുന്നതിനിടെ ചേർത്തല ഡിവൈഎസ്പി അനിൽകുമാറിനെ ആലപ്പുഴ വിജിലൻസ് സംഘം പിടികൂടി. വിജിലൻസിനെ കണ്ട് ഓടി രക്ഷപ്പെടാൻ ശ്രമിച്ച ഡിവൈഎസ്പിയെ പിന്തുടർന്നാണ് ഉദ്യോഗസ്ഥർ കസ്റ്റഡിയിലെടുത്തത്
Rajeev 
ചേർത്തല: വ്യവസായിയിൽ നിന്ന് കൈക്കൂലി വാങ്ങുന്നതിനിടെ ചേർത്തല ഡിവൈഎസ്പി വിജിലൻസിന്റെ പിടിയിലായി. ചേർത്തല ഡിവൈഎസ്പി അനിൽകുമാറിനെയാണ് ആലപ്പുഴ വിജിലൻസ് സംഘം അറസ്റ്റ് ചെയ്തത്. ചേർത്തല തൈക്കലിലെ ഇയാളുടെ വാടകവീട്ടിൽ വെച്ചായിരുന്നു നാടകീയ രംഗങ്ങൾ അരങ്ങേറിയത്.
ഒരു കേസ് ഒത്തുതീർപ്പാക്കുന്നതിനായി വ്യവസായിയിൽ നിന്ന് രണ്ട് ലക്ഷം രൂപയാണ് ഡിവൈഎസ്പി കൈക്കൂലിയായി ആവശ്യപ്പെട്ടിരുന്നത്. ഇതിന്റെ ആദ്യ ഗഡുവായ 50,000 രൂപ വാങ്ങുന്നതിനിടെയാണ് വിജിലൻസ് സംഘം ഒളിഞ്ഞിരുന്ന് ഇയാളെ കൈയോടെ പിടികൂടിയത്.
പണം കൈമാറുന്നതിനിടെ വിജിലൻസ് സംഘത്തെ കണ്ട് ഭയന്ന അനിൽകുമാർ വീട്ടിൽ നിന്നും പുറത്തേക്ക് ഓടി രക്ഷപ്പെടാൻ ശ്രമിച്ചു. എന്നാൽ വിജിലൻസ് ഉദ്യോഗസ്ഥർ ഇയാളെ പിന്തുടർന്ന് ഓടിച്ചിട്ട് പിടികൂടുകയായിരുന്നു. പ്രതിയെ കൂടുതൽ ചോദ്യം ചെയ്യലിനായി വിജിലൻസ് ഓഫീസിലേക്ക് മാറ്റി. ഇയാളുടെ വീട്ടിൽ വിജിലൻസ് സംഘം വിശദമായ പരിശോധന നടത്തിവരികയാണ്.
