ലഹരി മാഫിയയുടെ വേരറുക്കാൻ ഓപറേഷൻ തൂഫാൻ ജനങ്ങളെ അണിനിരത്തുമെന്ന് മന്ത്രി രമേശ് ചെന്നിത്തല
കേരളത്തിലെ അന്താരാഷ്ട്ര മയക്കുമരുന്ന് മാഫിയയുടെ നീക്കങ്ങൾക്കെതിരെ ജനങ്ങളെ അണിനിരത്തി ഓപറേഷന് തൂഫാന് പദ്ധതിയുമായി ആഭ്യന്തര വകുപ്പ്. ആഭ്യന്തര മന്ത്രി രമേശ് ചെന്നിത്തല കുന്ദമംഗലത്ത് പദ്ധതി ഉദ്ഘാടനം ചെയ്തു.
അനില എം കൃഷ്ണൻ 
ലഹരിക്കെതിരെ മുഴുവന് ജനങ്ങളെയും അണിനിരത്തും: മന്ത്രി രമേശ് ചെന്നിത്തല
കോഴിക്കോട്: അന്താരാഷ്ട്ര മയക്കുമരുന്ന് ലോബി കേരളത്തില് പിടിമുറുക്കുന്ന സാഹചര്യത്തിൽ, കുട്ടികളെ ലഹരിക്കടിമകളാക്കാനുള്ള ആസൂത്രിത നീക്കങ്ങൾക്കെതിരെ മുഴുവന് ജനങ്ങളെയും അണിനിരത്തുമെന്ന് ആഭ്യന്തര മന്ത്രി രമേശ് ചെന്നിത്തല. ലഹരിക്കെതിരായ 'ഓപറേഷന് തൂഫാന്: ദി നാര്ക്കോ ഹണ്ട്' പദ്ധതിയുടെ ജില്ലാതല ഔദ്യോഗിക ഉദ്ഘാടനം കുന്ദമംഗലത്ത് നിര്വഹിച്ചു സംസാരിക്കുകയായിരുന്നു അദ്ദേഹം. ലഹരി മാഫിയക്കെതിരായ പോരാട്ടം വിജയിക്കണമെങ്കില് കുട്ടികളും രക്ഷിതാക്കളും പൊതുജനങ്ങളും ഒരുമിച്ച് മുന്നോട്ട് വരണമെന്നും മന്ത്രി കൂട്ടിച്ചേർത്തു.
മദ്യത്തിനും മയക്കുമരുന്നിനുമെതിരായ ശക്തമായ പോരാട്ടമാണ് 'ഓപറേഷന് തൂഫാ'നിലൂടെ ലക്ഷ്യമിടുന്നത്. മയക്കുമരുന്നിന്റെ വ്യാപനം കാരണം മാതാപിതാക്കള് കുട്ടികളെ സ്കൂളിലയക്കാന് പോലും ഭയപ്പെടുന്ന സാഹചര്യമാണുള്ളത്. പുതിയ കേരളം കെട്ടിപ്പടുക്കണമെങ്കില് ലഹരിവിമുക്തമായ പുതിയൊരു തലമുറയെ വളര്ത്തിയെടുക്കണം. സജീവമായ മയക്കുമരുന്ന് ലോബിയുടെ വേരറുക്കാന് കേരളത്തിലെ ചെറുപ്പക്കാരുടെ സേന മുന്നോട്ട് വരണമെന്നും മന്ത്രി അഭ്യര്ഥിച്ചു.
ചടങ്ങിൽ ലഹരിക്കെതിരായ ദീപശിഖ മന്ത്രി, എം.എ റസാഖ് മാസ്റ്റര് എം.എല്.എക്ക് കൈമാറി. വിവിധ പരീക്ഷകളിൽ (എസ്.എസ്.എല്.സി, ഹയര്സെക്കന്ഡറി, എല്.എസ്.എസ്, യു.എസ്.എസ്, എന്.എം.എം.എസ്) ഉന്നത വിജയം നേടിയവർക്കുള്ള ഉപഹാര സമര്പ്പണം, ലഹരിക്കെതിരായ 'വണ് മില്യണ് ഗോള്' ക്യാമ്പയിന്, 'എജ്യൂ കാര്ണിവല്' എന്നിവയുടെ ഉദ്ഘാടനവും മന്ത്രി ചടങ്ങിൽ നിര്വഹിച്ചു.
എം.എ റസാഖ് മാസ്റ്റര് എം.എല്.എ അധ്യക്ഷത വഹിച്ച ചടങ്ങില് എം.കെ രാഘവന് എം.പി മുഖ്യാതിഥിയായിരുന്നു. അഡ്വ. കെ പ്രവീണ്കുമാര് എം.എല്.എ, കുന്ദമംഗലം ബ്ലോക്ക് പഞ്ചായത്ത് പ്രസിഡന്റ് സി.കെ ഫസീല, ഗ്രാമപഞ്ചായത്ത് പ്രസിഡന്റ് സി.വി സംജിത്ത്, വൈസ് പ്രസിഡന്റ് വിനോദ് പടനിലം, ജില്ലാ പഞ്ചായത്ത് അംഗം സീന അശോകന്, വാര്ഡ് മെമ്പര് വി അനില്കുമാര്, നോര്ത്ത് സോണ് ഐ.ജി പുട്ട വിമലാദിത്യ, കോഴിക്കോട് സിറ്റി പൊലീസ് കമീഷണര് എ.പി ഷൗക്കത്തലി, മുന് എം.എല്.എ യു.സി രാമന്, എ.ഇ.ഒമാരായ കെ. രാജീവ്, ഷംജിത്ത് തുടങ്ങിയ പ്രമുഖർ ചടങ്ങിൽ സംബന്ധിച്ചു.
