​നിതിൻ രാജിന്റെ മരണം ലോൺ ആപ്പ് മാഫിയ പിടിയിൽ നോയിഡയിൽ നിന്ന് മൂന്ന് പേരെ സൈബർ പോലീസ് പിടികൂടി

നിതിൻ രാജിന്റെ മരണം: ലോൺ ആപ്പ് മാഫിയ പിടിയിൽ; നോയിഡയിൽ നിന്ന് മൂന്ന് പേരെ സൈബർ പോലീസ് പൊക്കി

​കണ്ണൂർ: അഞ്ചരക്കണ്ടി ഡെന്റൽ കോളജ് വിദ്യാർത്ഥി നിതിൻ രാജിന്റെ ആത്മഹത്യയിലേക്ക് നയിച്ച ലോൺ ആപ്പ് ഭീഷണിയിൽ നിർണ്ണായക വഴിത്തിരിവ്. കോളജ് അധ്യാപികയെ ഫോണിലൂടെ നിരന്തരം ഭീഷണിപ്പെടുത്തിയ സംഘത്തെ ഉത്തർപ്രദേശിലെ നോയിഡയിൽ നിന്ന് സൈബർ പോലീസ് പിടികൂടി. 'ഇൻസ്റ്റന്റ് ഫണ്ട്സ്' (Instant Funds) എന്ന നിയമവിരുദ്ധ ലോൺ ആപ്പിന്റെ നടത്തിപ്പുകാരായ ഉത്തർപ്രദേശ് സ്വദേശികളായ ഋഷികേഷ് തിവാരി (32), പ്രശാന്ത് ഖേവൽ (28), ഹരിയാന ഫരിദാബാദ് സ്വദേശി പ്രകാശ് ജയ് (54) എന്നിവരാണ് പിടിയിലായത്.

​അധ്യാപികയെ ലക്ഷ്യമിട്ട് ഭീഷണി

നിതിൻ രാജ് ലോൺ ആപ്പ് വഴി പണമെടുത്തിരുന്നു. തിരിച്ചടവ് മുടങ്ങിയതോടെ, റഫറൻസ് നമ്പറായി നൽകിയിരുന്ന അധ്യാപികയുടെ ഫോണിലേക്ക് സംഘം നിരന്തരം വിളിക്കാൻ തുടങ്ങി. ഒരു മണിക്കൂറിനുള്ളിൽ നിരവധി കോളുകളാണ് അധ്യാപികയ്ക്ക് വന്നത്. നമ്പർ ബ്ലോക്ക് ചെയ്താലും പുതിയ നമ്പറുകളിൽ നിന്ന് ശല്യം തുടർന്നു. പണം അടച്ചില്ലെങ്കിൽ അപകീർത്തിപ്പെടുത്തുമെന്ന ഭീഷണി രൂക്ഷമായതോടെ അധ്യാപിക പോലീസിൽ പരാതി നൽകുകയായിരുന്നു.

​ഹൈടെക് തട്ടിപ്പ് കേന്ദ്രം

ഒരു ഐടി പാർക്കിന് സമാനമായ സജ്ജീകരണങ്ങളോടെ 40-ഓളം ജീവനക്കാരുമായിട്ടായിരുന്നു നോയിഡയിൽ ഈ കേന്ദ്രം പ്രവർത്തിച്ചിരുന്നത്. ഒരേസമയം 30 സിം കാർഡുകൾ വരെ ഉപയോഗിക്കാൻ കഴിയുന്ന 'സിം ബോക്സുകൾ' വഴിയാണ് ഇവർ ആളുകളെ വിളിച്ചിരുന്നത്. ഇതുകാരണം നമ്പറുകൾ ട്രാക്ക് ചെയ്യുന്നത് പ്രയാസകരമായിരുന്നു. എങ്കിലും ഒരു നമ്പറിന്റെ സാന്നിധ്യം തിരിച്ചറിഞ്ഞ സൈബർ സെൽ നോയിഡ പോലീസിന്റെ സഹായത്തോടെ സ്ഥാപനം വളയുകയായിരുന്നു. പരിശോധനയിൽ നിരവധി സിം കാർഡുകളും സിം ബോക്സുകളും പോലീസ് കസ്റ്റഡിയിലെടുത്തു.