ടാങ്കർ ലോറികൾക്ക് ജലം വിൽക്കുന്നവർക്ക് രജിസ്ട്രേഷൻ നിർബന്ധം ലംഘിച്ചാൽ നടപടി
കേരളത്തിൽ ടാങ്കർ ലോറികൾക്ക് ജലം വിൽക്കുന്ന സ്വകാര്യ വ്യക്തികൾക്ക് ഭൂജലവകുപ്പിന്റെ രജിസ്ട്രേഷനും കളക്ടറുടെ എൻ.ഒ.സി.യും നിർബന്ധമാക്കി. അശാസ്ത്രീയമായ ഭൂഗർഭജല ചൂഷണം തടയുകയാണ് ലക്ഷ്യം.
അനില എം കൃഷ്ണൻ 
ടാങ്കർ ലോറികൾക്ക് ജലം വിൽക്കുന്നവർക്ക് രജിസ്ട്രേഷൻ നിർബന്ധം: ജില്ലാ കളക്ടർ
കൊച്ചി: ജില്ലയിൽ ടാങ്കർ ലോറികൾ വഴി വിതരണം ചെയ്യുന്നതിനായി സ്വകാര്യ സ്രോതസ്സുകളിൽ നിന്ന് ജലം വിൽക്കുന്നവർക്ക് ഇനി ഭൂജലവകുപ്പിന്റെ രജിസ്ട്രേഷൻ നിർബന്ധം. സ്വകാര്യ ജലവിൽപ്പന നിയമവിധേയമാക്കുന്നതിന്റെ ഭാഗമായി സർക്കാർ പുറപ്പെടുവിച്ച ഉത്തരവ് ജില്ലയിൽ നടപ്പിലാക്കുന്നതിനായി ചേർന്ന യോഗത്തിലാണ് ജില്ലാ കളക്ടർ ജി. പ്രിയങ്ക ഇക്കാര്യം അറിയിച്ചത്. ശാസ്ത്രീയ പഠനങ്ങളില്ലാതെ അമിതമായി ഭൂഗർഭജലം ചൂഷണം ചെയ്യുന്നത് തടയുകയാണ് ലക്ഷ്യം.
രജിസ്ട്രേഷൻ നടപടികൾ ഇങ്ങനെ:
ടാങ്കറുകൾക്ക് ജലം വിൽക്കാൻ താൽപ്പര്യമുള്ളവർ ഭൂജലവകുപ്പ് ജില്ലാ ഓഫീസിൽ നിശ്ചിത ഫീസ് അടച്ച് അപേക്ഷിക്കണം. ഉദ്യോഗസ്ഥർ ജലസ്രോതസ്സിൽ നേരിട്ടെത്തി 'യീൽഡ് ടെസ്റ്റ്' (Yield Test) നടത്തി പാരിസ്ഥിതിക ആഘാതമില്ലാതെ എത്രമാത്രം വെള്ളം പമ്പ് ചെയ്യാമെന്ന് നിശ്ചയിക്കും. ഈ റിപ്പോർട്ടിന്റെ അടിസ്ഥാനത്തിൽ ജില്ലാ കളക്ടർ നിരാക്ഷേപ പത്രം (NOC) അനുവദിക്കും.
സുസ്ഥിര നാളെയ്ക്കായി കരുതൽ:
അശാസ്ത്രീയമായ ജലചൂഷണം സമീപപ്രദേശങ്ങളിലെ കിണറുകളെയും മറ്റ് കുടിവെള്ള സ്രോതസ്സുകളെയും ബാധിക്കുന്നുവെന്ന വ്യാപക പരാതിയെത്തുടർന്നാണ് നടപടി. വരുംതലമുറയ്ക്കായി ഭൂഗർഭജലം സംരക്ഷിക്കേണ്ടത് അനിവാര്യമാണെന്നും സർക്കാർ ഉത്തരവ് ജില്ലയിൽ കർശനമായി നടപ്പിലാക്കാൻ ബന്ധപ്പെട്ട വകുപ്പുകൾക്ക് നിർദ്ദേശം നൽകിയതായും കളക്ടർ വ്യക്തമാക്കി. ഭൂജലവകുപ്പ് ജില്ലാ ഓഫീസർ ഡോ. ആർട്സ് കെ. പുരുഷോത്തം ഉൾപ്പെടെയുള്ള ഉദ്യോഗസ്ഥർ യോഗത്തിൽ പങ്കെടുത്തു.
