പിണറായി വിജയന്റെ മൊബൈൽ കണക്ഷൻ പൊതുഭരണ വകുപ്പ് വിച്ഛേദിച്ചു; സംഭവം മുൻകൂട്ടി അറിയിക്കാതെയെന്ന് ആക്ഷേപം
പിണറായി വിജയൻ കഴിഞ്ഞ 10 വർഷമായി ഉപയോഗിച്ചിരുന്ന ഔദ്യോഗിക മൊബൈൽ നമ്പർ പൊതുഭരണ വകുപ്പ് കട്ട് ചെയ്തു. മുൻകൂട്ടി അറിയിക്കാതെയാണ് നടപടിയെന്ന് ആക്ഷേപം.
Angel Varghese 
തിരുവനന്തപുരം: മുൻ മുഖ്യമന്ത്രി പിണറായി വിജയന് അനുവദിച്ചിരുന്ന ഔദ്യോഗിക മൊബൈൽ ഫോൺ നമ്പർ പൊതുഭരണ വകുപ്പ് വിച്ഛേദിച്ചു. കഴിഞ്ഞ 10 വർഷക്കാലമായി അദ്ദേഹം തുടർച്ചയായി ഉപയോഗിച്ചുകൊണ്ടിരുന്ന നമ്പരാണ് ഇപ്പോൾ പൊതുഭരണ വകുപ്പ് റദ്ദാക്കിയിരിക്കുന്നത്.
മുഖ്യമന്ത്രി സ്ഥാനമൊഴിഞ്ഞ ശേഷവും ഔദ്യോഗിക ആവശ്യങ്ങൾക്കും പാർട്ടി നേതാക്കളുമായും പൊതുജനങ്ങളുമായുള്ള നിരന്തര ആശയവിനിമയങ്ങൾക്കുമായി പിണറായി വിജയൻ ഇതേ നമ്പർ തന്നെയാണ് ഉപയോഗിച്ചു വന്നിരുന്നത്. എന്നാൽ, ഈ നടപടിയെക്കുറിച്ച് അദ്ദേഹത്തിനൊപ്പമുള്ളവർക്കോ ഓഫീസിനോ മുൻകൂട്ടി യാതൊരുവിധ അറിയിപ്പും നൽകിയിരുന്നില്ലെന്ന് ആക്ഷേപമുണ്ട്.
അതേസമയം, രാഷ്ട്രീയ കേന്ദ്രങ്ങളിൽ വലിയ ചർച്ചകൾക്ക് വഴിവെച്ച ഈ സംഭവത്തിൽ പൊതുഭരണ വകുപ്പിന്റെ ഭാഗത്തുനിന്നും ഇതുവരെ ഔദ്യോഗിക വിശദീകരണങ്ങളൊന്നും ലഭ്യമായിട്ടില്ല. ഫോൺ നമ്പർ പെട്ടെന്ന് വിച്ഛേദിക്കപ്പെട്ടതിനെക്കുറിച്ച് പ്രതികരിക്കാൻ പിണറായി വിജയന്റെ ഓഫീസും നിലവിൽ തയ്യാറായിട്ടില്ല.
