രാജാകേശവദാസ് നീന്തൽക്കുളം അന്താരാഷ്ട്ര നിലവാരത്തിലേക്ക്
നവീകരിച്ച ആലപ്പുഴ രാജാകേശവദാസ് നീന്തൽക്കുളം അന്താരാഷ്ട്ര മത്സര വേദിയാക്കി മാറ്റുമെന്ന് ജില്ലാ കളക്ടർ ഷാജി വി. നായർ. ജലദൗർലഭ്യം പരിഹരിക്കാൻ സി.എസ്.ആർ ഫണ്ട് ഉപയോഗിക്കുമെന്നും പ്രഖ്യാപനം.
Rajeev 
രാജാകേശവദാസ് നീന്തൽക്കുളം അന്താരാഷ്ട്ര മത്സരവേദിയാക്കും: ജില്ലാ കളക്ടർ
ആലപ്പുഴ: നവീകരിച്ച രാജാകേശവദാസ് നീന്തൽക്കുളം അന്താരാഷ്ട്ര മത്സര വേദിയാക്കി മാറ്റുമെന്ന് ജില്ലാ കളക്ടർ ഷാജി വി. നായർ വ്യക്തമാക്കി. നവീകരിച്ച കുളത്തിൻ്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
ജില്ലയിലെ കായിക മേഖലയിലെ പ്രതിസന്ധികൾ പഠിക്കുന്നതിനായി സംസ്ഥാന സ്പോർട്സ് കൗൺസിൽ സെക്രട്ടറിയുടെ സാന്നിധ്യത്തിൽ പ്രത്യേക ചർച്ച നടത്തും. ഇതിനായി അദ്ദേഹത്തെ ആലപ്പുഴയിലേക്ക് ക്ഷണിച്ചിട്ടുണ്ടെന്നും കളക്ടർ അറിയിച്ചു. നീന്തൽക്കുളത്തിലെ ജലദൗർലഭ്യത്തിന് ശാശ്വത പരിഹാരം കാണുന്നതിന് സി.എസ്.ആർ (CSR) ഫണ്ട് ഉപയോഗിച്ച് കുഴൽ കിണർ നിർമ്മിക്കുമെന്നും അദ്ദേഹം കൂട്ടിച്ചേർത്തു.
ഉദ്ഘാടനത്തോടനുബന്ധിച്ച് നീന്തൽ താരങ്ങളുടെ പ്രദർശന മത്സരവും ജില്ലാ കളക്ടർ ഫ്ലാഗ് ഓഫ് ചെയ്തു. തുടർന്ന് ദേശീയ മത്സരങ്ങളിൽ പങ്കെടുക്കുന്ന റോവിങ് താരങ്ങൾക്കുള്ള സ്പോർട്സ് കിറ്റുകളുടെ വിതരണവും അദ്ദേഹം നിർവഹിച്ചു.
ചടങ്ങിൽ ജില്ലാ സ്പോർട്സ് കൗൺസിൽ പ്രസിഡൻ്റ് വി.ജി. വിഷ്ണു അധ്യക്ഷത വഹിച്ചു. കൗൺസിൽ വൈസ് പ്രസിഡൻ്റ് കുര്യൻ ജെയിംസ്, എക്സിക്യൂട്ടീവ് അംഗങ്ങളായ ടി. ജയമോഹൻ, ഗ്രിസിൽഡ സേവ്യർ, പി.എസ്. ബാബു, സ്പോർട്സ് കൗൺസിൽ സെക്രട്ടറി ടി.പി. റോയ്, ജില്ലാ സ്പോർട്സ് ഓഫീസർ ഡോ. സി.വി. ബിജിലാൽ, സ്വിമ്മിംഗ് ചീഫ് കോച്ച് ഉണ്ണികൃഷ്ണൻ, റോവിങ് പരിശീലകരായ ബിനു കുര്യൻ, എൽബിസൺ തമ്പി, അക്വാട്ടിക് അസോസിയേഷൻ ഭാരവാഹികളായ സുജിത്ത്, അജയൻ തുടങ്ങിയവർ സന്നിഹിതരായിരുന്നു.
