സപ്ലൈകോ ഗോ കൺവീനിയൻസ് സ്റ്റോർ പ്രവർത്തനമാരംഭിച്ചു ആദ്യ സ്റ്റോർ വൈറ്റില ഹബ്ബിൽ
ജനത്തിരക്കുള്ള കേന്ദ്രങ്ങളിൽ സപ്ലൈകോ ആരംഭിക്കുന്ന സപ്ലൈകോ ഗോ കൺവീനിയൻസ് സ്റ്റോർ ശൃംഖലയുടെ ഉദ്ഘാടനം വൈറ്റില ഹബ്ബിൽ നടന്നു. ഇൻഫോപാർക്ക്, വിമാനത്താവളം എന്നിവടങ്ങളിലും ഉടൻ പുതിയ സ്റ്റോറുകൾ എത്തും.
സപ്ലൈകോ കൺവീനിയൻസ് സ്റ്റോർ 'സപ്ലൈകോ ഗോ' പ്രവർത്തനമാരംഭിച്ചു
കൊച്ചി: കാലാനുസൃതമായ മാറ്റങ്ങൾ ഉൾക്കൊണ്ട് സപ്ലൈകോ നടപ്പിലാക്കുന്ന പുതിയ കൺവീനിയൻസ് സ്റ്റോർ ശൃംഖലയായ 'സപ്ലൈകോ ഗോ'യുടെ ആദ്യ സ്റ്റോർ വൈറ്റില മൊബിലിറ്റി ഹബ്ബിൽ പ്രവർത്തനമാരംഭിച്ചു. ഭക്ഷ്യ പൊതുവിതരണ വകുപ്പ് മന്ത്രി അനൂപ് ജേക്കബ് സ്റ്റോറിന്റെ ഉദ്ഘാടനം നിർവഹിച്ചു.
മാറുന്ന കാലത്തിന് അനുയോജ്യമായ വിവിധ വിപണന മാതൃകകൾ സ്വീകരിക്കുന്നതിന്റെ ഭാഗമായാണ് കൺവീനിയൻസ് സ്റ്റോറുകൾ ആരംഭിക്കുന്നതെന്ന് മന്ത്രി പറഞ്ഞു. ക്ലസ്റ്റർ മാതൃകയിലാണ് ഇവ നടപ്പാക്കുന്നത്. എറണാകുളം നഗരത്തിലെ ജനത്തിരക്കേറിയ മേഖലകളിൽ ആറോളം 'സപ്ലൈകോ ഗോ' സ്റ്റോറുകൾ ഉടൻ തുറക്കും. കൊച്ചി അന്താരാഷ്ട്ര വിമാനത്താവളം, ഇൻഫോപാർക്ക് എന്നിവിടങ്ങൾക്ക് പുറമെ കോഴിക്കോട്, തിരുവനന്തപുരം ജില്ലകളിലും പദ്ധതി വ്യാപിപ്പിക്കുമെന്നും മന്ത്രി വ്യക്തമാക്കി. ഉത്സവകാലങ്ങളിൽ മാത്രമല്ല, എല്ലാ സമയത്തും വിപണിയിടപെടലിൽ സപ്ലൈകോ ജാഗ്രത പുലർത്തുന്നുണ്ടെന്നും അദ്ദേഹം കൂട്ടിച്ചേർത്തു.
സർക്കാരിന്റെ നൂറുദിന കർമ്മപദ്ധതിയിൽ ഉൾപ്പെടുത്തിയാണ് വൈറ്റില മൊബിലിറ്റി ഹബ്ബിലെ ബസ് ബേയ്ക്ക് സമീപം പുതിയ സ്റ്റോർ സജ്ജമാക്കിയിരിക്കുന്നത്. യാത്രക്കാർക്ക് ആവശ്യമായ ഭക്ഷ്യോൽപ്പന്നങ്ങൾ, ലഘുഭക്ഷണങ്ങൾ, പാനീയങ്ങൾ, വ്യക്തിഗത അവശ്യവസ്തുക്കൾ തുടങ്ങിയവ ഇവിടെ ലഭ്യമാണ്.
ടി. ജെ. വിനോദ് എം.എൽ.എ ചടങ്ങിൽ അധ്യക്ഷത വഹിച്ചു. വിലക്കയറ്റം തടയുന്നതിൽ സപ്ലൈകോ നിർണായക പങ്കാണ് വഹിക്കുന്നതെന്ന് അദ്ദേഹം അഭിപ്രായപ്പെട്ടു.
സപ്ലൈകോ മാനേജിംഗ് ഡയറക്ടർ വി. എം. ജയകൃഷ്ണൻ, ജനറൽ മാനേജർ എം. യു. ബിജു, നഗരസഭാ കൗൺസിലർ വി. പി. ചന്ദ്രൻ, രാഷ്ട്രീയ പാർട്ടി നേതാക്കളായ ഹംസ മൂലയിൽ, ഇ. എം. മൈക്കിൾ തുടങ്ങിയവർ ചടങ്ങിൽ പങ്കെടുത്തു.
പൾസ് പോളിയോ ദിനാചരണം എറണാകുളം ജില്ലയിൽ 1.61 ലക്ഷം കുട്ടികൾക്ക് തുള്ളിമരുന്ന് നൽകും
കുഞ്ഞുങ്ങൾക്കായുള്ള സൗജന്യ ചികിത്സാ കൂട്ടായ്മകൾ മാതൃകാപരം മുഖ്യമന്ത്രി വി ഡി സതീശൻ
കൊലക്കേസ് പ്രതിയെ കാപ്പ ചുമത്തി വിയ്യൂർ ജയിലിൽ അടച്ചു നടപടി ജാമ്യത്തിലിറങ്ങി വീണ്ടും കവർച്ച നടത്തിയതോടെ
പ്രതിസന്ധികൾ മറികടന്ന് കബഡിയിൽ സ്വർണം നേടി അട്ടപ്പാടിയിലെ പെൺപട
സൗന്ദര്യവർദ്ധക ക്രീം ഉപയോഗിച്ച 17 കാരിക്ക് വൃക്കരോഗം ബാലാവകാശ കമ്മിഷൻ സ്വമേധയാ കേസെടുത്തു
അംഗീകാരമില്ലാത്ത കളരിപ്പയറ്റ് ചാമ്പ്യൻഷിപ്പ് കായികതാരങ്ങൾ ശ്രദ്ധിക്കണം 
