ലഹരിക്കേസിലെ തൊണ്ടിമുതൽ മാറ്റിയ സംഭവം: ആന്റണി രാജുവിന്റെ ശിക്ഷാവിധി സ്റ്റേ ചെയ്യാനാവില്ലെന്ന് സുപ്രീംകോടതി

തൊണ്ടിമുതൽ തിരിമറി കേസിൽ ശിക്ഷ തടയണമെന്ന് ആവശ്യപ്പെട്ട് മുൻമന്ത്രി ആന്റണി രാജു നൽകിയ അപ്പീൽ സുപ്രീംകോടതി തള്ളി. ഇതോടെ എം.എൽ.എ സ്ഥാനത്തുനിന്നുള്ള അയോഗ്യത തുടരും.

Angel Varghese

Apr 27, 2026 - 12:16 Updated: Apr 27, 2026 - 12:18

ലഹരിക്കേസിലെ തൊണ്ടിമുതൽ മാറ്റിയ സംഭവം: ആന്റണി രാജുവിന്റെ ശിക്ഷാവിധി സ്റ്റേ ചെയ്യാനാവില്ലെന്ന് സുപ്രീംകോടതി

തൊണ്ടിമുതൽ തിരിമറി: ആന്റണി രാജുവിന്റെ അപ്പീൽ സുപ്രീംകോടതി തള്ളി; തിരിച്ചടി തുടരുന്നു

തൊണ്ടിമുതൽ തിരിമറി കേസിൽ ശിക്ഷാവിധി സ്റ്റേ ചെയ്യണമെന്നാവശ്യപ്പെട്ട് മുൻമന്ത്രിയും ജനാധിപത്യ കേരള കോൺഗ്രസ് നേതാവുമായ ആന്റണി രാജു സമർപ്പിച്ച അപ്പീൽ സുപ്രീംകോടതി തള്ളി. നേരത്തെ ഹൈക്കോടതിയും ഇതേ ആവശ്യം തള്ളിയിരുന്നു. വിധി സ്റ്റേ ചെയ്യാത്ത സാഹചര്യത്തിൽ ആന്റണി രാജുവിൻ്റെ എം.എൽ.എ സ്ഥാനത്തുനിന്നുള്ള അയോഗ്യത നിലനിൽക്കും.

കോടതി വിധി ഇങ്ങനെ:

നെടുമങ്ങാട് ഒന്നാം ക്ലാസ് മജിസ്‌ട്രേട്ട് കോടതി കഴിഞ്ഞ ജനുവരിയിലാണ് ആന്റണി രാജുവിന് മൂന്ന് വർഷം തടവും 10,000 രൂപ പിഴയും വിധിച്ചത്. വിവിധ വകുപ്പുകളിലായി ആകെ എട്ടര വർഷം തടവുണ്ടെങ്കിലും ശിക്ഷ ഒരുമിച്ച് അനുഭവിച്ചാൽ മതിയാകും. ശിക്ഷാവിധി വന്നതോടെ ആന്റണി രാജുവിനെ എം.എൽ.എ സ്ഥാനത്തുനിന്ന് അയോഗ്യനാക്കിയിരുന്നു. ജനപ്രാതിനിധ്യ നിയമപ്രകാരം അടുത്ത ആറ് വർഷത്തേക്ക് അദ്ദേഹത്തിന് തിരഞ്ഞെടുപ്പിൽ മത്സരിക്കാനാവില്ല.

കേസിനാസ്പദമായ സംഭവം:

1990 ഏപ്രിൽ 4-നാണ് കേസിനാസ്പദമായ സംഭവം നടക്കുന്നത്. തിരുവനന്തപുരം വിമാനത്താവളത്തിൽ വെച്ച് ലഹരിമരുന്നുമായി പിടിയിലായ ഓസ്‌ട്രേലിയൻ പൗരൻ ആൻഡ്രു സൽവഡോർ സർവലിയെ സഹായിക്കാൻ തൊണ്ടിമുതലിൽ തിരിമറി നടത്തിയെന്നാണ് ആന്റണി രാജുവിനെതിരെയുള്ള കുറ്റം. പ്രതിയുടെ അടിവസ്ത്രത്തിൽ ഒളിപ്പിച്ച നിലയിലായിരുന്നു ലഹരിമരുന്ന് കണ്ടെത്തിയിരുന്നത്. വഞ്ചിയൂർ കോടതിയിൽ സൂക്ഷിച്ചിരുന്ന ഈ അടിവസ്ത്രം വെട്ടി ചെറുതാക്കി പ്രതിക്ക് പാകമാകില്ലെന്ന് വരുത്തിത്തീർത്ത് ആന്റണി രാജു പ്രതിയെ രക്ഷപ്പെടുത്തിയെന്നാണ് പ്രോസിക്യൂഷൻ കണ്ടെത്തിയത്.

കേസിലെ ഒന്നാം പ്രതി വഞ്ചിയൂർ കോടതിയിലെ തൊണ്ടി ക്ലർക്കായിരുന്ന കെ.എസ്. ജോസാണ്. ജോസിന് ആകെ ഒൻപതര വർഷം തടവും 15,000 രൂപ പിഴയുമാണ് കോടതി വിധിച്ചത്. വിശ്വാസ വഞ്ചന, തെളിവ് നശിപ്പിക്കൽ തുടങ്ങിയ ഗൗരവകരമായ കുറ്റങ്ങളാണ് ഇരുവർക്കുമെതിരെ തെളിയിക്കപ്പെട്ടത്. സുപ്രീംകോടതി കൂടി അപ്പീൽ തള്ളിയതോടെ ആന്റണി രാജുവിന് വൻ രാഷ്ട്രീയ തിരിച്ചടിയാണ് ഉണ്ടായിരിക്കുന്നത്.