റെക്കോർഡുകൾ തിരുത്തി മമ്മൂട്ടി ചിത്രം കളങ്കാവൽ

കളങ്കാവൽ: റെക്കോർഡുകൾ തിരുത്തി മുന്നോട്ട്; 45 രാജ്യങ്ങളിൽ പ്രദർശിപ്പിച്ച മമ്മൂട്ടി ചിത്രം

​മെഗാ സ്റ്റാർ മമ്മൂട്ടിയും വിനായകനും ഒന്നിച്ച 'കളങ്കാവൽ' ആഗോള തലത്തിൽ വൻ വിജയക്കുതിപ്പ് തുടരുന്നു. റിലീസ് ചെയ്ത് 11 ദിവസം പിന്നിടുമ്പോൾ ചിത്രം 72 കോടിയിലേക്ക് കുതിക്കുകയാണ്. 2025-ൽ ഏറ്റവും കൂടുതൽ രാജ്യങ്ങളിൽ പ്രദർശിപ്പിച്ച മമ്മൂട്ടി ചിത്രം എന്ന ചരിത്ര നേട്ടവും 'കളങ്കാവൽ' സ്വന്തമാക്കി.

​കൊച്ചി: മമ്മൂട്ടി കമ്പനിയുടെ നിർമ്മാണത്തിൽ നവാഗതനായ ജിതിൻ ജോസ് സംവിധാനം ചെയ്ത ചിത്രമാണ് 'കളങ്കാവൽ'. റിലീസ് ദിനം മുതൽ മികച്ച പ്രതികരണം നേടിയ ചിത്രം ഇന്ത്യൻ ആഭ്യന്തര മാർക്കറ്റിലും വിദേശ മാർക്കറ്റിലും ഒരുപോലെ ശ്രദ്ധേയമായ മുന്നേറ്റമാണ് നടത്തുന്നത്.

​ചരിത്രം കുറിച്ച് ഓവർസീസ് കളക്ഷൻ

​ജി.സി.സി (GCC) രാജ്യങ്ങൾ ഒഴികെയുള്ള വേൾഡ് വൈഡ് ഓവർസീസിൽ നിന്ന് മാത്രം 08 കോടിയോളം രൂപയാണ് ചിത്രം ഇതിനകം നേടിയത്. ഇത് കളങ്കാവലിന്റെ ആഗോള സ്വീകാര്യതയുടെ സൂചനയാണ്. റിലീസ് ചെയ്ത് 11 ദിവസങ്ങൾ പിന്നിടുമ്പോഴും ചിത്രം തിയറ്ററുകളിൽ വൻ വിജയമായി തുടരുകയാണ്.

​ഏറ്റവും കൂടുതൽ രാജ്യങ്ങളിൽ

​പ്രദർശന രാജ്യങ്ങളുടെ എണ്ണത്തിലും 'കളങ്കാവൽ' റെക്കോർഡ് സ്ഥാപിച്ചു. നിലവിൽ 45 രാജ്യങ്ങളിലാണ് ചിത്രം പ്രദർശിപ്പിക്കുന്നത്. 2025-ൽ ഇത്രയധികം രാജ്യങ്ങളിൽ പ്രദർശിപ്പിച്ച മമ്മൂട്ടി ചിത്രം എന്ന ബഹുമതിയും 'കളങ്കാവൽ' സ്വന്തമാക്കി.

​വിതരണം ചെയ്തത് ആർ.എഫ്.ടി ഫിലിംസ്

​കൊടും കുറ്റവാളിയായ സയനൈഡ് മോഹന്റെ കഥയിൽ നിന്ന് പ്രചോദനം ഉൾക്കൊണ്ടാണ് ചിത്രം ഒരുക്കിയിരിക്കുന്നത്. ചിത്രത്തിന്റെ വേൾഡ് വൈഡ് റിലീസിൻ്റെ ഓവർസീസ് റൈറ്റ്സ് (ജി.സി.സി ഒഴികെയുള്ള) ഹംസിനി എൻ്റർടെയിൻമെൻ്റുമായി സഹകരിച്ച് ആർ.എഫ്.ടി ഫിലിംസ് ആണ് സ്വന്തമാക്കിയത്. 2014-ൽ യൂ.കെ കേന്ദ്രമാക്കി പ്രമുഖ വ്യവസായിയും മലയാളിയുമായ റൊണാൾഡ് തൊണ്ടിക്കൽ തുടക്കം കുറിച്ച സിനിമാ വിതരണ ശൃംഖലയാണ് ആർ.എഫ്.ടി ഫിലിംസ്. കഴിഞ്ഞ 11 വർഷങ്ങളായി ഓവർസീസ് വിതരണ രംഗത്ത് നിറസാന്നിധ്യമായ ഈ ടീം ആണ് ഏറ്റവും കൂടുതൽ ഓവർസീസ് രാജ്യങ്ങളിൽ മലയാളം സിനിമ റിലീസിനെത്തിച്ചിട്ടുള്ളത്.