വർക്കലയുടെ സ്വപ്ന പദ്ധതി യാഥാർത്ഥ്യമായി ഗവ. ഐ.ടി.ഐ മന്ദിരം മാർച്ച് രണ്ടിന് മന്ത്രി വി. ശിവൻകുട്ടി ഉദ്ഘാടനം ചെയ്യും.
വർക്കല ഗവ. ഐ.ടി.ഐക്കായി 5.60 കോടി രൂപ ചെലവിൽ നിർമ്മിച്ച ആധുനിക ബഹുനില മന്ദിരം മാർച്ച് രണ്ടിന് ഉദ്ഘാടനം ചെയ്യും. നാല് നിലകളിലായി 16300 സ്ക്വയർ ഫീറ്റ് വിസ്തീർണ്ണമുള്ള കെട്ടിടത്തിന്റെ സവിശേഷതകൾ അറിയാം.
അനില എം കൃഷ്ണൻ 
വർക്കല ഗവ. ഐ.ടി.ഐക്ക് ഇനി സ്വന്തം ഹൈടെക് മന്ദിരം; ഉദ്ഘാടനം മാർച്ച് രണ്ടിന്
വർക്കല: മണ്ഡലത്തിലെ ജനങ്ങളുടെയും വിദ്യാർത്ഥികളുടെയും ദീർഘകാലത്തെ കാത്തിരിപ്പിന് വിരാമമിട്ട് വർക്കല ഗവൺമെന്റ് ഐ.ടി.ഐയുടെ പുതിയ ബഹുനില മന്ദിരം യാഥാർത്ഥ്യമായി. മാർച്ച് 2-ാം തീയതി രാവിലെ 11 മണിക്ക് പൊതുവിദ്യാഭ്യാസ-തൊഴിൽ വകുപ്പ് മന്ത്രി വി. ശിവൻകുട്ടി കെട്ടിടത്തിന്റെ ഉദ്ഘാടനം നിർവ്വഹിക്കുമെന്ന് അഡ്വ. വി. ജോയി എം.എൽ.എ അറിയിച്ചു.
2018-ൽ അഡ്വ. വി. ജോയി എം.എൽ.എയുടെ നിരന്തരമായ പരിശ്രമഫലമായാണ് വർക്കലയിൽ ഗവ. ഐ.ടി.ഐ അനുവദിച്ചത്. തുടർന്ന് ഏകദേശം ഒരേക്കർ സ്ഥലത്ത് 5.60 കോടി രൂപ ചെലവഴിച്ചാണ് ആധുനിക സൗകര്യങ്ങളോടു കൂടിയ ഈ കെട്ടിട സമുച്ചയം നിർമ്മിച്ചിരിക്കുന്നത്. 16,300 സ്ക്വയർ ഫീറ്റ് വിസ്തീർണ്ണത്തിൽ നാല് നിലകളിലായാണ് മന്ദിരം ഒരുങ്ങിയിരിക്കുന്നത്.
കെട്ടിടത്തിന്റെ പ്രധാന സവിശേഷതകൾ:
സെല്ലാർ ഫ്ലോർ: വിശാലമായ സ്റ്റോർ, ഇലക്ട്രിക്കൽ റൂം, ജനറേറ്റർ റൂം.
ഗ്രൗണ്ട് ഫ്ലോർ: ഐ.ടി ലാബ്, ലൈബ്രറി, ഫസ്റ്റ് എയ്ഡ് റൂം, ലേഡീസ് റെസ്റ്റ് റൂം, ക്ലാസ് റൂമുകൾ, വിപുലമായ ടോയ്ലറ്റ് സൗകര്യങ്ങൾ.
ഒന്നാം നില: റിസപ്ഷൻ, വെയിറ്റിംഗ് ഏരിയ, അഡ്മിനിസ്ട്രേഷൻ ഓഫീസ്, പ്ലേസ്മെന്റ് സെൽ, പ്രിൻസിപ്പൽ റൂം.
രണ്ടാം നില: എൻജിനീയറിങ് ഡ്രോയിങ് ഹാൾ, സ്റ്റാഫ് റൂമുകൾ (ലേഡീസ് & ജെന്റ്സ്), യൂട്ടിലിറ്റി റൂം.
റോഡിൽ നിന്നും ഒന്നാം നിലയിലേക്ക് നേരിട്ട് പ്രവേശിക്കാൻ കോൺക്രീറ്റ് ബ്രിഡ്ജും സജ്ജീകരിച്ചിട്ടുണ്ട്. മുറ്റത്ത് ഇന്റർലോക്ക് ടൈലുകൾ പാകുകയും സ്റ്റോൺ പിച്ചിങ് നടത്തി ഹാൻഡ് റെയിലുകൾ സ്ഥാപിക്കുകയും ചെയ്തതോടെ കെട്ടിടത്തിന് മനോഹരമായ കാഴ്ചയാണ് ലഭിക്കുന്നത്. വർക്കലയുടെ വിദ്യാഭ്യാസ മേഖലയിൽ വലിയൊരു നാഴികക്കല്ലാകും ഈ പുതിയ മന്ദിരമെന്ന് എം.എൽ.എ പറഞ്ഞു.
