​കോതമംഗലം സിഐയെ ഭീഷണിപ്പെടുത്തി അർജുൻ ആയങ്കിയുടെ ജാമ്യം റദ്ദാക്കാൻ പൊലീസ് കോടതിയിൽ

​എസ്എച്ച്ഒയ്ക്ക് നേരെ സമൂഹമാധ്യമങ്ങളിലൂടെ ഭീഷണി: അർജുൻ ആയങ്കിയുടെ ജാമ്യം റദ്ദാക്കാൻ പൊലീസ് കോടതിയിൽ

​കോതമംഗലം: സോഷ്യൽ മീഡിയയിലൂടെ കോതമംഗലം എസ്എച്ച്ഒയെ (സിഐ) വ്യക്തിപരമായി അധിക്ഷേപിക്കുകയും ഭീഷണിപ്പെടുത്തുകയും ചെയ്ത ക്രിമിനൽ കേസ് പ്രതി അർജുൻ ആയങ്കിയുടെ ജാമ്യം റദ്ദാക്കാൻ പൊലീസ് നടപടി തുടങ്ങി. മുൻപ് അനുവദിച്ച ജാമ്യവ്യവസ്ഥകൾ പ്രതി ലംഘിച്ചുവെന്ന് കാട്ടി കോതമംഗലം പൊലീസ് മജിസ്‌ട്രേറ്റ് കോടതിയിൽ റിപ്പോർട്ട് നൽകി. ഈ ഹർജി അടുത്ത ദിവസങ്ങളിൽ തന്നെ കോടതി പരിഗണിക്കും. സിഐയെ ഭീഷണിപ്പെടുത്തിയ സംഭവത്തിൽ അർജുൻ ആയങ്കിക്കെതിരെ ഐടി ആക്ട് പ്രകാരം പൊലീസ് നേരത്തെ പുതിയ കേസെടുത്തിരുന്നു.

​സംഘടിത കുറ്റകൃത്യത്തിന് ഗൂഢാലോചന നടത്തിയെന്ന കേസിൽ അർജുൻ ആയങ്കി ഉൾപ്പെടെ ആറ് പേരെ കഴിഞ്ഞ മേയ് മൂന്നിനാണ് കോതമംഗലം പൊലീസ് അറസ്റ്റ് ചെയ്തത്. കണ്ണൂർ അഴീക്കൽ സ്വദേശി അർജുൻ ആയങ്കി (29), തിരുവനന്തപുരം സ്വദേശി ആദർശ് (29), പ്രണവ് (29), പള്ളുരുത്തി സ്വദേശി ധനീഷ് (39), ആലപ്പുഴ സ്വദേശി അരുൺ (ഡോൺ–38), ടാൻസൺ (34) എന്നിവരാണ് കേസിൽ അറസ്റ്റിലായിരുന്നത്. ഇവർ പുതിയ ക്രിമിനൽ പദ്ധതികൾ ആസൂത്രണം ചെയ്യാൻ ഒത്തുകൂടിയെന്നായിരുന്നു പൊലീസ് കണ്ടെത്തൽ. എന്നാൽ സുഹൃത്തിന്റെ വിവാഹത്തിൽ പങ്കെടുക്കാൻ എത്തിയതാണെന്നായിരുന്നു പ്രതികളുടെ വാദം

"ജോലിയിൽ നിന്ന് വിരമിച്ച ശേഷം സമാധാനമായി പെൻഷൻ വാങ്ങി ശിഷ്ടജീവിതം നയിക്കാൻ സിഐയെ അനുവദിക്കില്ല. തനിക്ക് നേരിടേണ്ടി വന്ന ഓരോ ദിവസത്തെയും ബുദ്ധിമുട്ടുകൾക്ക് കൃത്യമായി കണക്കുചോദിക്കും."

​ഈ കേസിൽ കോടതിയിൽ നിന്ന് ജാമ്യം നേടി പുറത്തിറങ്ങിയതിന് തൊട്ടുപിന്നാലെയാണ് അർജുൻ ആയങ്കി കോതമംഗലം സിഐ പ്രശാന്തിനെ ലക്ഷ്യമിട്ട് ഫേസ്ബുക്കിൽ പോസ്റ്റിട്ടത്. ഔദ്യോഗിക കൃത്യനിർവഹണം നടത്തിയ പൊലീസ് ഉദ്യോഗസ്ഥനെതിരെ വധഭീഷണിക്ക് സമാനമായ പോസ്റ്റിട്ടത് ഗുരുതരമായ ജാമ്യവ്യവസ്ഥ ലംഘനമാണെന്ന് പൊലീസ് കോടതിയെ അറിയിച്ചു.

​കോടതി നിർദേശങ്ങൾ ലംഘിച്ച് വീണ്ടും കുറ്റകൃത്യങ്ങളിൽ ഏർപ്പെട്ട പശ്ചാത്തലത്തിൽ പ്രതിയുടെ ജാമ്യം അടിയന്തരമായി റദ്ദാക്കണമെന്നാണ് പൊലീസിന്റെ ആവശ്യം. ഇതിനു പുറമെ പുതുതായി റജിസ്റ്റർ ചെയ്ത ഐടി ആക്ട് പ്രകാരമുള്ള കേസിലും പൊലീസ് നടപടികൾ വേഗത്തിലാക്കുമെന്നാണ് വിവരം.