ചേന്ദമംഗലത്തിന് ഇനി കൈത്തറി ഗ്രാമം ഉദ്ഘാടനം മന്ത്രി പി. രാജീവ് നിർവഹിച്ചു
ചേന്ദമംഗലം കൈത്തറി ഗ്രാമം ഉദ്ഘാടനം ചെയ്തു കൈത്തറി മേഖലയെ അന്താരാഷ്ട്ര നിലവാരത്തിലേക്ക് ഉയർത്തുമെന്ന് മന്ത്രി പി. രാജീവ്
അനില എം കൃഷ്ണൻ 
ചേന്ദമംഗലം കൈത്തറി ഗ്രാമം ഉദ്ഘാടനം ചെയ്തു; കൈത്തറി മേഖലയെ അന്താരാഷ്ട്ര നിലവാരത്തിലേക്ക് ഉയർത്തുമെന്ന് മന്ത്രി പി. രാജീവ്
ചേന്ദമംഗലം: കൈത്തറിയുടെ നിർമ്മാണം, വിപണനം, ടൂറിസം എന്നിവ സമന്വയിപ്പിച്ച് ഈ മേഖലയെ ദേശീയ-അന്തർദേശീയ തലങ്ങളിൽ ശക്തിപ്പെടുത്തുമെന്ന് വ്യവസായ വകുപ്പ് മന്ത്രി പി. രാജീവ് പറഞ്ഞു. ചേന്ദമംഗലം കൈത്തറി ഗ്രാമം പദ്ധതിയുടെ ആദ്യ രണ്ട് ഘട്ടങ്ങളുടെ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം. പ്രതിസന്ധികൾ നേരിടുന്ന കൈത്തറി മേഖലയെ പരിഷ്കരിക്കുന്നതിനായി വിദഗ്ധ സമിതിയെ നിയോഗിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
ചേന്ദമംഗലം നിവാസികളുടെ ദീർഘകാല സ്വപ്നമായ ഈ പദ്ധതി, കിഴക്കുംപുറം കോറ്റാട്ടാലിൽ പെരിയാർ തീരത്ത് ഒന്നര ഏക്കറിലാണ് ഒരുക്കിയിരിക്കുന്നത്. വിപണനം, പ്രദർശനം, വിനോദസഞ്ചാരം എന്നിവയ്ക്ക് ഒരുപോലെ പ്രാധാന്യം നൽകുന്നതാണ് ഗ്രാമം. ഭൗമ സൂചികാ പദവി (GI Tag) ലഭിച്ച ചേന്ദമംഗലം മുണ്ടിന്റെ പൈതൃകം സംരക്ഷിക്കുന്നതിനൊപ്പം വിനോദസഞ്ചാര സാധ്യതകളും ഇവിടെ പ്രയോജനപ്പെടുത്തും.
കണ്ണൂർ ആസ്ഥാനമായ ഇന്ത്യൻ ഇൻസ്റ്റിറ്റ്യൂട്ട് ഓഫ് ഹാൻഡ്ലൂം ടെക്നോളജി (IIHT) മുഖേന നാല് ഘട്ടങ്ങളിലായി നടപ്പിലാക്കുന്ന പദ്ധതിയുടെ ആകെ ചെലവ് 19.25 കോടി രൂപയാണ്. അടുത്ത ഘട്ടങ്ങളിൽ ഇന്ത്യയിലെ കൈത്തറി ചരിത്രം പറയുന്ന മ്യൂസിയവും ബോട്ട് ജെട്ടിയും പൂർത്തിയാകും. സന്ദർശകർക്ക് നെയ്ത്ത് നേരിട്ട് കാണാനും ഇഷ്ടപ്പെട്ട വസ്ത്രങ്ങൾ നെയ്തെടുപ്പിക്കാനും ഇവിടെ സൗകര്യമുണ്ടാകും.
പ്രതിപക്ഷ നേതാവ് വി.ഡി. സതീശൻ ചടങ്ങിൽ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് പി.ആർ. ഷൈജൻ, ഗ്രാമപഞ്ചായത്ത് പ്രസിഡന്റ് പി.എ. ഹരിദാസൻ, ഹാൻഡ്ലൂം ആൻഡ് ടെക്സ്റ്റൈൽസ് ഡയറക്ടർ ഡോ. കെ.എസ്. കൃപകുമാർ തുടങ്ങി പ്രമുഖർ ചടങ്ങിൽ പങ്കെടുത്തു.
