സപ്ലൈകോ ഇനി 24 മണിക്കൂറും പ്രവർത്തിക്കുംമന്ത്രി അനൂപ് ജേക്കബ്ബ്

സപ്ലൈകോയിൽ വൻ മാറ്റങ്ങൾ: 24 മണിക്കുറും പ്രവർത്തിക്കുന്ന കൺവീനിയന്റ് സ്റ്റോറുകൾ വരുന്നു

​കണ്ണൂർ: സംസ്ഥാനത്ത് 24 മണിക്കൂറും പ്രവർത്തിക്കുന്ന സപ്ലൈകോ കൺവീനിയന്റ് സ്റ്റോറുകൾ ആരംഭിക്കുമെന്ന് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ്ബ് അറിയിച്ചു. പാടിയോട്ടുചാലിൽ മാവേലി സ്റ്റോർ സപ്ലൈകോ സൂപ്പർ സ്റ്റോറായി ഉയർത്തുന്നതിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.

​സംസ്ഥാനത്തെ എല്ലാ മാവേലി സ്റ്റോറുകളും ഘട്ടങ്ങളായി സൂപ്പർ സ്റ്റോറുകളാക്കി മാറ്റാനാണ് സർക്കാർ ലക്ഷ്യമിടുന്നത്. ഉപഭോക്താക്കളുടെ മാറുന്ന താല്പര്യങ്ങൾക്കനുസരിച്ച് സപ്ലൈകോയിലും മാവേലി സ്റ്റോറുകളിലും കാലാനുസൃതമായ മാറ്റങ്ങൾ വരുത്തും. 24x7 കൺവീനിയന്റ് സ്റ്റോറുകൾ ആദ്യഘട്ടത്തിൽ മെട്രോ നഗരങ്ങളിലും തുടർന്ന് എല്ലാ ജില്ലാ ആസ്ഥാനങ്ങളിലും ആരംഭിക്കും.

​1,600-ലേറെ ഔട്ട്‌ലെറ്റുകളുള്ള വൻ ശൃംഖലയായ സപ്ലൈകോയെ സ്വയംപര്യാപ്തമാക്കുകയാണ് ലക്ഷ്യം. പുതിയ മാർക്കറ്റിംഗ് രീതികളിലൂടെയും പരസ്യവരുമാനത്തിലൂടെയും സ്ഥാപനത്തെ ലാഭത്തിലാക്കും. ഉപഭോക്താക്കൾക്ക് തങ്ങൾക്ക് ആവശ്യമായ സാധനങ്ങൾ സൂപ്പർ മാർക്കറ്റുകളിലേതുപോലെ സ്വയം തിരഞ്ഞെടുക്കാനുള്ള വിപുലമായ സൗകര്യമാണ് പുതിയ സൂപ്പർ സ്റ്റോറുകളിൽ ഒരുക്കിയിരിക്കുന്നത്. നിർജ്ജീവമായിരുന്ന ഭക്ഷ്യോപദേശക കമ്മിറ്റികൾ വീണ്ടും സജീവമാക്കുമെന്നും മന്ത്രി കൂട്ടിച്ചേർത്തു.

​ചടങ്ങിൽ വി. കുഞ്ഞികൃഷ്ണൻ എം.എൽ.എ അധ്യക്ഷത വഹിച്ചു. പെരിങ്ങോം-വയക്കര ഗ്രാമപഞ്ചായത്ത് പ്രസിഡന്റ് കെ. ലളിത ആദ്യവിൽപ്പന നിർവഹിച്ചു. പഞ്ചായത്ത് വൈസ് പ്രസിഡന്റ് കെ. കുഞ്ഞികൃഷ്ണൻ, ബ്ലോക്ക് പഞ്ചായത്ത് അംഗം രേഷ്മ വി. രാജു, വാർഡ് അംഗം റസിയ വാഴവളപ്പിൽ, സപ്ലൈകോ റീജ്യനൽ മാനേജർ ഷെൽജി ജോർജ്, ജില്ലാ സപ്ലൈ ഓഫീസർ ബിന്ദു കെ. എൻ എന്നിവരും വിവിധ രാഷ്ട്രീയ പാർട്ടി പ്രതിനിധികളും ചടങ്ങിൽ പങ്കെടുത്തു.