സ്വിമ്മിംഗ് പൂളിൽ കുട്ടി മുങ്ങിമരിച്ച സംഭവംഅസോസിയേഷന്റെ അനാസ്ഥയിൽ അന്വേഷണം

കലൂർ ഫ്ലാറ്റിലെ പൂളിൽ കുട്ടി മുങ്ങിമരിച്ച സംഭവം: അസോസിയേഷന്റെ അനാസ്ഥയിൽ അന്വേഷണത്തിന് ബാലാവകാശ കമ്മീഷൻ നിർദ്ദേശം

​കൊച്ചി: കലൂരിലെ അപ്പാർട്ട്മെന്റ് സ്വിമ്മിംഗ് പൂളിൽ വീണ് ആറുവയസ്സുകാരൻ മരണപ്പെട്ട സംഭവത്തിൽ സംസ്ഥാന ബാലാവകാശ സംരക്ഷണ കമ്മീഷൻ അപകടസ്ഥലം സന്ദർശിച്ച് അന്വേഷണ പുരോഗതി വിലയിരുത്തി. ജവഹർലാൽ നെഹ്റു സ്റ്റേഡിയത്തിന് പുറകുവശത്തുള്ള 'കെന്റ് ഹെയിൽ ഗാർഡൻ' (Kent Hail Garden) അപ്പാർട്ട്മെന്റിലാണ് ദാരുണമായ സംഭവം നടന്നത്. വിഷയത്തിന്റെ ഗൗരവം കണക്കിലെടുത്ത് കമ്മീഷൻ അംഗം കെ. കെ. ഷാജുവിന്റെ നേതൃത്വത്തിലുള്ള ഉന്നതതല സംഘമാണ് ഫ്ലാറ്റിലെത്തി പരിശോധന നടത്തിയത്.

​കുട്ടികൾ കളിക്കുന്ന സ്ഥലത്തിന് തൊട്ടടുത്ത് യാതൊരുവിധ സുരക്ഷാ മാനദണ്ഡങ്ങളും പാലിക്കാതെയും കൃത്യമായ പരിപാലനമില്ലാതെയും പൂൾ നിലനിർത്തിയതിൽ അപ്പാർട്ട്മെന്റ് ഓണേഴ്സ് അസോസിയേഷന്റെ ഭാഗത്തുനിന്ന് ഗുരുതര വീഴ്ചയുണ്ടായതായി സംഘം വിലയിരുത്തി. കേസിൽ പോലീസിനോട് വിശദവും കാര്യക്ഷമവുമായ അന്വേഷണം നടത്താൻ കമ്മീഷൻ നിർദ്ദേശം നൽകിയിട്ടുണ്ട്.

​കഴിഞ്ഞ ഓഗസ്റ്റ് 17-നാണ് കേസിനാസ്പദമായ സംഭവം നടന്നത്. കുട്ടിയുടെ മരണത്തിലേക്ക് നയിച്ച സാഹചര്യങ്ങളെ കേവലം ഒരു അപകടമരണമായി മാത്രം കാണുന്നത് സമൂഹത്തിന് തെറ്റായ സന്ദേശമാണ് നൽകുന്നതെന്ന് കമ്മീഷൻ നിരീക്ഷിച്ചു. സംസ്ഥാനത്തെ മറ്റ് ഫ്ലാറ്റുകളിലും ഇത്തരത്തിൽ സുരക്ഷാവീഴ്ചകൾ നിലനിൽക്കുന്നുണ്ടോ എന്ന് കർശനമായി പരിശോധിക്കേണ്ടതുണ്ടെന്നും അപകടങ്ങൾ മുൻകൂട്ടി കണ്ട് ആവശ്യമായ സുരക്ഷാ ക്രമീകരണങ്ങൾ ഫ്ലാറ്റുകളിൽ ഉറപ്പുവരുത്തണമെന്നും കമ്മീഷൻ വ്യക്തമാക്കി.

​മരണപ്പെട്ട കുട്ടിയുടെ കുടുംബാംഗങ്ങളെ നേരിട്ട് സന്ദർശിച്ച സംഘം അവരെ ആശ്വസിപ്പിക്കുകയും കേസിനാസ്പദമായ വിവരങ്ങൾ ശേഖരിക്കുകയും ചെയ്തു. കുടുംബത്തിന് ആവശ്യമായ സൈക്കോ-സോഷ്യൽ പിന്തുണ (Psycho-social intervention) ലഭ്യമാക്കാൻ നിർദ്ദേശം നൽകിയിട്ടുണ്ട്. സംഭവത്തിന്റെ തുടർനടപടികളുടെ ഭാഗമായി പരാതിക്കാരെയും പോലീസ് ഉദ്യോഗസ്ഥരെയും ഫ്ലാറ്റ് ഓണേഴ്സ് അസോസിയേഷൻ പ്രതിനിധികളെയും ഉൾപ്പെടുത്തി ഔദ്യോഗിക ഹിയറിങ് നടത്താനും കമ്മീഷൻ തീരുമാനിച്ചു.

​ചൈൽഡ് വെൽഫെയർ കമ്മിറ്റി ചെയർപേഴ്സൺ ഉല്ലാസ് മധു, അംഗം ജിൻസിമോൾ കുര്യൻ, ജില്ലാ ശിശു സംരക്ഷണ ഓഫീസർ ഡോ. ജയന്തി പി. നായർ, എറണാകുളം ടൗൺ നോർത്ത് പോലീസ് സ്റ്റേഷൻ എസ്.എച്ച്.ഒ. മനോജ് എം. എന്നിവരും കമ്മീഷനോടൊപ്പം ഉണ്ടായിരുന്നു.