ജനവാസ കേന്ദ്രത്തിന് ഭീഷണിയായ ക്വാറി പ്രവർത്തനം നിർത്തിവെക്കാൻ ഉത്തരവ്

വയത്തൂർ കോളിത്തട്ടിൽ അനധികൃത ക്വാറി പ്രവർത്തനം തടഞ്ഞു; ഇരിട്ടി തഹസിൽദാർ നോട്ടീസ് നൽകി

​കണ്ണൂർ: ഇരിട്ടി താലൂക്കിലെ വയത്തൂർ കോളിത്തട്ട് മേഖലയിൽ ജനവാസ കേന്ദ്രത്തിന് ഭീഷണിയായി പ്രവർത്തിച്ചു വന്ന ക്വാറിയുടെയും ക്രഷറിന്റെയും പ്രവർത്തനം ഉടൻ നിർത്തിവെക്കാൻ ഇരിട്ടി തഹസിൽദാർ ഉത്തരവിട്ടു. പ്രദേശത്തുനിന്നുള്ള പരിസ്ഥിതി-മലിനീകരണ പരാതികളെ തുടർന്ന് നടത്തിയ അന്വേഷണത്തിൽ ക്വാറി അനധികൃതമായാണ് പ്രവർത്തിക്കുന്നതെന്ന് കണ്ടെത്തിയതിനെ തുടർന്നാണ് നടപടി.

​ദുരന്തനിവാരണ നിയമത്തിലെ വിവിധ വകുപ്പുകൾ പ്രകാരമാണ് തഹസിൽദാർ നോട്ടീസ് അയച്ചിരിക്കുന്നത്. ജനങ്ങളുടെ ജീവനും സ്വത്തിനും സംരക്ഷണം നൽകുന്നതിനും ദുരന്ത സാധ്യതകൾ ഒഴിവാക്കുന്നതിനുമാണ് അടിയന്തരമായി പ്രവർത്തനം നിർത്തിവെക്കാൻ നിർദേശിച്ചിരിക്കുന്നത്. ക്വാറി പ്രവർത്തനം തുടർന്നാൽ ശക്തമായ നിയമനടപടികൾ സ്വീകരിക്കുമെന്നും നോട്ടീസിൽ മുന്നറിയിപ്പുണ്ട്.

​നേരത്തെയും ഈ ക്വാറിക്കെതിരെ വ്യാപക പരാതികൾ ഉയർന്നിരുന്നു. അനധികൃതമായി സ്ഫോടകവസ്തുക്കൾ ഉപയോഗിച്ച് ഖനനം നടത്തുന്നതായും കരിങ്കല്ല് കടത്തുന്നതായും കണ്ടെത്തിയതിനെ തുടർന്ന് അധികൃതർ ക്വാറിയിലെ വാഹനങ്ങൾ കസ്റ്റഡിയിലെടുക്കുകയും വൻ തുക പിഴ ഈടാക്കുകയും ചെയ്തിരുന്നു. എന്നിട്ടും പ്രവർത്തനം തുടർന്ന സാഹചര്യത്തിലാണ് ഇപ്പോൾ കർശന നിർദേശവുമായി റവന്യൂ വകുപ്പ് രംഗത്തെത്തിയിരിക്കുന്നത്.