മത്സ്യത്തൊഴിലാളിയുടെ പോരാട്ടത്തിന് വിജയം ഇൻഷുറൻസ് കമ്പനി 3.5 ലക്ഷം രൂപ നൽകണമെന്ന് മലപ്പുറം ജില്ലാ ഉപഭോക്തൃ കമ്മീഷൻ
കടൽക്ഷോഭത്തിൽ ബോട്ട് തകർന്ന മത്സ്യത്തൊഴിലാളിയുടെ ക്ലെയിം നിരസിച്ച യുണൈറ്റഡ് ഇന്ത്യ ഇൻഷുറൻസ് കമ്പനിക്ക് 3.5 ലക്ഷം രൂപ പിഴ ചുമത്തി മലപ്പുറം ജില്ലാ ഉപഭോക്തൃ കമ്മീഷൻ.
അനില എം കൃഷ്ണൻ 
ബോട്ട് അപകടം: മത്സ്യത്തൊഴിലാളിക്ക് 3.5 ലക്ഷം രൂപ ഇൻഷുറൻസ് നൽകാൻ ഉപഭോക്തൃ കമ്മീഷൻ വിധി
മലപ്പുറം: കടുത്ത കടൽക്ഷോഭത്തിൽ ബോട്ട് തകർന്നുണ്ടായ നഷ്ടത്തിന് ഇൻഷുറൻസ് തുക നിഷേധിച്ച കമ്പനിയുടെ നടപടിക്കെതിരെ ഉപഭോക്തൃ കമ്മീഷന്റെ ശക്തമായ ഇടപെടൽ. ആനങ്ങാടി സ്വദേശിയായ മത്സ്യത്തൊഴിലാളിക്ക് ഇൻഷുറൻസ് തുകയും നഷ്ടപരിഹാരവുമടക്കം 3,50,000 രൂപ നൽകാൻ മലപ്പുറം ജില്ലാ ഉപഭോക്തൃ കമ്മീഷൻ ഉത്തരവിട്ടു. യുണൈറ്റഡ് ഇന്ത്യ ഇൻഷുറൻസ് കമ്പനിക്കെതിരെയാണ് വിധി.
2023 നവംബർ എട്ടിനാണ് ശക്തമായ കടൽക്ഷോഭത്തെ തുടർന്ന് മത്സ്യത്തൊഴിലാളിയുടെ ബോട്ട് കടലിൽ മുങ്ങി തകർന്നത്. മൂന്ന് ലക്ഷം രൂപയ്ക്ക് ബോട്ട് ഇൻഷുർ ചെയ്തിരുന്നെങ്കിലും സാങ്കേതിക കാരണങ്ങൾ പറഞ്ഞ് കമ്പനി ക്ലെയിം നിരസിക്കുകയായിരുന്നു. എന്നാൽ ഇൻഷുറൻസ് കമ്പനി മതിയായ കാരണമില്ലാതെയാണ് ക്ലെയിം തള്ളിയതെന്ന് ഉപഭോക്തൃ കമ്മീഷൻ കണ്ടെത്തി.
ഇൻഷുർ ചെയ്ത തുകയായ 3,00,000 രൂപയ്ക്ക് പുറമെ, ഇൻഷുറൻസ് കമ്പനിയുടെ ഭാഗത്തുനിന്നുണ്ടായ സേവനത്തിലെ വീഴ്ചയ്ക്ക് നഷ്ടപരിഹാരമായി 50,000 രൂപയും, കോടതി ചെലവിലേക്ക് 5,000 രൂപയും കമ്പനി പരാതിക്കാരന് നൽകണം. വിധി വന്ന് 45 ദിവസത്തിനകം ഈ തുക നൽകിയില്ലെങ്കിൽ, ഒൻപതു ശതമാനം പലിശ സഹിതം തുക ഈടാക്കി നൽകണമെന്നും വിധിന്യായത്തിൽ വ്യക്തമാക്കുന്നു.
മലപ്പുറം ജില്ലാ ഉപഭോക്തൃ കമ്മീഷൻ പ്രസിഡന്റ് കെ. മോഹൻദാസ്, അംഗങ്ങളായ പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവരടങ്ങിയ ബെഞ്ചാണ് ഈ സുപ്രധാന വിധി പ്രസ്താവിച്ചത്.
