മുൻ മന്ത്രിയും കേരള കോൺഗ്രസ് നേതാവുമായ ടി.യു. കുരുവിള അന്തരിച്ചു അന്ത്യം കൊച്ചിയിലെ ആശുപത്രിയിൽ
മുൻ പൊതുമരാമത്ത് വകുപ്പ് മന്ത്രിയും കേരള കോൺഗ്രസ് (എം) വൈസ് ചെയർമാനുമായ ടി.യു. കുരുവിള (89) അന്തരിച്ചു. ന്യൂമോണിയയെ തുടർന്ന് കൊച്ചിയിലെ ആശുപത്രിയിൽ ചികിത്സയിലായിരുന്നു
Angel Varghese 
മുൻ മന്ത്രി ടി.യു. കുരുവിള അന്തരിച്ചു
കൊച്ചി: മുൻ പൊതുമരാമത്ത് വകുപ്പ് മന്ത്രിയും കേരള കോൺഗ്രസ് (എം) വൈസ് ചെയർമാനുമായ ടി.യു. കുരുവിള (89) അന്തരിച്ചു. ന്യൂമോണിയയും ശ്വാസതടസ്സവും ബാധിച്ചതിനെ തുടർന്ന് കഴിഞ്ഞ മെയ് 12-നാണ് അദ്ദേഹത്തെ കൊച്ചിയിലെ ആസ്റ്റർ മെഡ്സിറ്റി ആശുപത്രിയിൽ പ്രവേശിപ്പിച്ചത്. ആരോഗ്യനില ഗുരുതരമായതിനെ തുടർന്ന് തീവ്രപരിചരണ വിഭാഗത്തിൽ (ICU) ചികിത്സയിൽ ആയിരുന്നു
തദ്ദേശ തിരഞ്ഞെടുപ്പിലൂടെ രാഷ്ട്രീയത്തിലേക്ക് കടന്നുവന്ന അദ്ദേഹം നീണ്ട 14 വർഷക്കാലം കീരംപാറ പഞ്ചായത്ത് പ്രസിഡന്റായി സേവനമനുഷ്ഠിച്ചിട്ടുണ്ട്. മികച്ചൊരു സംഘാടകനും കർഷക നേതാവുമായിരുന്നു. 2006-ലെ വി.എസ്. അച്യുതാനന്ദൻ മന്ത്രിസഭയിൽ പി.ജെ. ജോസഫ് സ്ഥാനമൊഴിഞ്ഞതിനെ തുടർന്നാണ് അദ്ദേഹം പൊതുമരാമത്ത് വകുപ്പ് മന്ത്രിയായി ചുമതലയേറ്റത്. കോതമംഗലം മണ്ഡലത്തിൽ നിന്നും 2006, 2011 വർഷങ്ങളിൽ തുടർച്ചയായി നിയമസഭയിലേക്ക് തിരഞ്ഞെടുക്കപ്പെട്ടു.
മന്ത്രിസ്ഥാനത്തിന് പുറമെ കേരള സ്റ്റേറ്റ് ഹൗസിങ് ബോർഡ് ചെയർമാൻ, പ്ലാന്റേഷൻ കോർപ്പറേഷൻ ചെയർമാൻ, റബർ ബോർഡ് അംഗം എന്നീ നിലകളിലും അദ്ദേഹം ശ്രദ്ധേയമായ സംഭാവനകൾ നൽകിയിട്ടുണ്ട്. യാക്കോബായ സുറിയാനി സഭയുടെ മുൻ അത്മായ സെക്രട്ടറിയായിരുന്ന അദ്ദേഹത്തെ സഭയുടെ പരമോന്നത ബഹുമതിയായ 'ഷെവലിയാർ' പദവി നൽകി ആദരിച്ചിട്ടുണ്ട്.
1936 സെപ്റ്റംബർ 13-ന് കോതമംഗലം ഊന്നുകല്ലിൽ ചേലാട് തോമ്പയിൽ ഉതുപ്പിന്റെയും മറിയത്തിന്റെയും മകനായാണ് ജനനം. കീരംപാറ, വടവുകോട്, തിരുവല്ല എന്നിവിടങ്ങളിൽ സ്കൂൾ വിദ്യാഭ്യാസം പൂർത്തിയാക്കിയ ശേഷം ആലപ്പുഴ കാർമൽ പോളിടെക്നിക്കിൽ നിന്ന് എൻജിനീയറിങ് ഡിപ്ലോമ നേടി.
ഭാര്യ: ചിന്നമ്മ.
മക്കൾ: റീന, രേണു, റെമി, ഡോ. രേഖ, എൽദോ.
