വിനോദയാത്ര ദുരന്തമായി കിഴക്കമ്പലത്ത് പാർക്കിലെ വെള്ളച്ചാലിൽ വീണ് അഞ്ചുവയസ്സുകാരൻ മരിച്ചു

കിഴക്കമ്പലം: കിഴക്കമ്പലം പഴങ്ങനാട് ജംഗിൾ പാർക്കിൽ സ്‌കൂൾ വിനോദയാത്രയ്‌ക്കെത്തിയ അഞ്ചു വയസുകാരൻ വെള്ളച്ചാലിൽ വീണു മരിച്ചു. കോട്ടയം ചെങ്ങളം സൗത്ത് വലിയകളപ്പത്തറ വീട്ടിൽ മുഹമ്മദ് നസീറിന്റെയും ആരിഫയുടെയും മകൻ മുഹമ്മദ് ആദം ആണ് മരിച്ചത്. കൊച്ചിയിലെ പ്രമുഖ പ്രീ-സ്‌കൂളിലെ വിദ്യാർത്ഥിയാണ്.

​ചൊവ്വാഴ്ച ഉച്ചയ്ക്ക് 1.15-ഓടെയായിരുന്നു അപകടം. സ്കൂളിന്റെ പാലാരിവട്ടം, മാമല കേന്ദ്രങ്ങളിൽ നിന്നുള്ള 25 കുട്ടികളാണ് അധ്യാപകർക്കൊപ്പം പാർക്കിലെത്തിയത്. സംസാരവൈകല്യമുള്ള ആദത്തിന്റെ പഠനത്തിനായി മാതാവും മുത്തശ്ശിയും തമ്മനത്ത് വീടെടുത്ത് താമസിച്ചുവരികയായിരുന്നു. കുട്ടിക്ക് പ്രത്യേക ശ്രദ്ധ ആവശ്യമായതിനാൽ ഒരു അധ്യാപികയുടെ സംരക്ഷണയിലായിരുന്നു ആദം.

​ഭക്ഷണം കഴിക്കുന്നതിനായി കുട്ടികളെ മുറിയിലേക്ക് മാറ്റുന്നതിനിടെ മറ്റൊരു കുട്ടി ഓടിപ്പോയപ്പോൾ, ആദത്തെ മുറിയിൽ നിർത്തി അധ്യാപിക ആ കുട്ടിയുടെ പിന്നാലെ പോയി. തിരികെ വന്ന് ഭക്ഷണം നൽകി കഴിഞ്ഞ് എണ്ണമെടുത്തപ്പോഴാണ് ആദത്തെ കാണാനില്ലെന്ന് തിരിച്ചറിഞ്ഞത്. തുടർന്ന് നടത്തിയ തിരച്ചിലിൽ പാർക്കിന്റെ പിന്നിലുള്ള വെള്ളച്ചാലിൽ കുട്ടിയെ കണ്ടെത്തുകയായിരുന്നു. ഉടൻ തന്നെ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

​ബോട്ട് സവാരിക്കായി പുതുതായി നിർമ്മിച്ച വെള്ളച്ചാലിൽ വീണാണ് അപകടം നടന്നത്. പാർക്കിൽ ആവശ്യമായ സുരക്ഷാ ക്രമീകരണങ്ങൾ ഉണ്ടായിരുന്നുവോ എന്ന് തടിയിട്ടപറമ്പ് പൊലീസ് അന്വേഷിച്ചുവരികയാണ്. വിദേശത്തുള്ള പിതാവിനെ വിവരമറിയിച്ചിട്ടുണ്ട്. മൃതദേഹം പോസ്റ്റ്മോർട്ടത്തിനായി കളമശേരി മെഡിക്കൽ കോളേജ് ആശുപത്രിയിലേക്ക് മാറ്റി.