കളക്ടേഴ്സ് സൂപ്പർ 100 നാലാം അധ്യായത്തിന് തുടക്കം പദ്ധതി ഉദ്ഘാടനം ചെയ്ത് മന്ത്രി ബിന്ദു കൃഷ്ണ
പിന്നാക്ക വിഭാഗങ്ങളിലെ പെൺകുട്ടികൾക്കായി തിരുവനന്തപുരം ജില്ലാ ഭരണകൂടവും കനൽ ചാരിറ്റബിൾ ട്രസ്റ്റും ചേർന്ന് നടപ്പിലാക്കുന്ന കളക്ടേഴ്സ് സൂപ്പർ 100 പദ്ധതിയുടെ നാലാം എഡിഷൻ മന്ത്രി ബിന്ദു കൃഷ്ണ ഉദ്ഘാടനം ചെയ്തു.
Mathew P M 
കളക്ടേഴ്സ് സൂപ്പർ 100 നാലാം അധ്യായത്തിന് തുടക്കം; പദ്ധതി ഉദ്ഘാടനം ചെയ്ത് മന്ത്രി ബിന്ദു കൃഷ്ണ
തിരുവനന്തപുരം: പിന്നാക്ക വിഭാഗങ്ങളിലെ പെൺകുട്ടികൾക്ക് ശാസ്ത്ര, സാങ്കേതിക മേഖലകളിൽ മികച്ച അവസരങ്ങൾ ഉറപ്പുവരുത്തുന്നതിനായി തിരുവനന്തപുരം ജില്ലാ ഭരണകൂടത്തിന്റെ സഹായത്തോടെ കനൽ ഇന്നൊവേഷൻസ് ചാരിറ്റബിൾ ട്രസ്റ്റ് നടത്തുന്ന 'കളക്ടേഴ്സ് സൂപ്പർ 100' പദ്ധതിയുടെ നാലാം എഡിഷൻ തുടക്കമായി. പാളയം മഹാത്മാ അയ്യങ്കാളി ഹാളിൽ നടന്ന ചടങ്ങിൽ വനിതാ ശിശുവികസന വകുപ്പ് മന്ത്രി ബിന്ദു കൃഷ്ണ പദ്ധതിയുടെ ഉദ്ഘാടനം നിർവഹിച്ചു.
നിശ്ചയദാർഢ്യത്തോടെ മുന്നേറിയാൽ ഏതൊരു പ്രതിസന്ധിയെയും മറികടന്ന് ലക്ഷ്യസ്ഥാനത്ത് എത്തിച്ചേരാൻ സാധിക്കുമെന്നും ലക്ഷ്യങ്ങളെ വളർത്തിയെടുത്ത് വിജയത്തിലെത്തിക്കാൻ കുട്ടികൾക്ക് കഴിയണമെന്നും മന്ത്രി ഉദ്ഘാടന പ്രസംഗത്തിൽ പറഞ്ഞു. സാമൂഹിക പ്രതിബദ്ധതയുള്ള പദ്ധതികളുമായി മുന്നോട്ടുവരുന്ന തിരുവനന്തപുരം ജില്ലാ ഭരണകൂടത്തിനേയും കനൽ സൊസൈറ്റിയുടെ അണിയറപ്രവർത്തകരെയും മന്ത്രി അഭിനന്ദിച്ചു. കുട്ടികളുടെ ഉന്നമനത്തിനായി പ്രവർത്തിക്കുന്ന കൂട്ടായ്മയ്ക്ക് എല്ലാവിധ പിന്തുണയും നൽകിയ ജില്ലാ ഭരണകൂടത്തിന്റെ നിലപാട് മാതൃകാപരമാണെന്നും അവർ കൂട്ടിച്ചേർത്തു.
ഒൻപത് മുതൽ 12 വരെ ക്ലാസുകളിൽ പഠിക്കുന്ന പിന്നാക്ക വിഭാഗങ്ങളിലെ പെൺകുട്ടികളെ ലക്ഷ്യമിട്ടാണ് കനൽ ഈ പദ്ധതി രൂപകൽപ്പന ചെയ്തിരിക്കുന്നത്. വനിതാ ശിശുവികസന വകുപ്പ്, ട്രെൻസർ ടെക്നോളജി സൊല്യൂഷൻസ് എന്നിവരുടെ സാമ്പത്തിക സഹായത്തോടെയാണ് പദ്ധതി നടപ്പിലാക്കുന്നത്.
പാളയം മഹാത്മാ അയ്യങ്കാളി ഹാളിൽ നടന്ന ചടങ്ങിൽ സബ് കളക്ടർ ആൽഫ്രഡ് ഒ.വി, അസിസ്റ്റന്റ് കളക്ടർ വിഷ്ണോയി ദിനേശ് ഹപുരം, വനിതാ ശിശു വികസന വകുപ്പ് ജില്ലാ ഓഫീസർ ഷിംന, ഫിഷറീസ് വകുപ്പ് ഡെപ്യൂട്ടി ഡയറക്ടർ ഷീജ മേരി എ.പി, ജില്ലാ പട്ടികജാതി വികസന ഓഫീസർ സരിൻ എസ്. എസ്, വിദ്യാഭ്യാസ വകുപ്പ് ഡെപ്യൂട്ടി ഡയറക്ടർ ബിജു ആർ, കനൽ ഇന്നവേഷൻ ഡയറക്ടർ അഡ്വ. ആൻസൻ പി ഡി അലക്സാണ്ടർ, ട്രെൻസർ ടെക്നോളജി സൊല്യൂഷൻസ് എച്ച്.ആർ. മാനേജർ ശാലിനി ലക്ഷ്മി തുടങ്ങിയ പ്രമുഖർ സന്നിഹിതരായിരുന്നു.
