പോലീസ് സ്റ്റേഷൻ സംവിധാനം കാര്യക്ഷമമാക്കാൻ എസ്.ഐ.മാർക്ക് പരിശീലനം
പോലീസ് സ്റ്റേഷനുകളിലെ ഇൻസ്പെക്ടർ എസ്.എച്ച്.ഒ സംവിധാനം പുനസംഘടിപ്പിക്കുന്നതിന്റെ ഭാഗമായി എറണാകുളം റൂറൽ ജില്ലയിലെ സബ് ഇൻസ്പെക്ടർമാർക്ക് പരിശീലനം നൽകി. ജില്ലാ പോലീസ് ആസ്ഥാനത്ത് നടന്ന പരിപാടിയിൽ പ്രമുഖർ ക്ലാസുകൾ എടുത്തു.
അനില എം കൃഷ്ണൻ 
എറണാകുളം റൂറൽ ജില്ലയിലെ സബ് ഇൻസ്പെക്ടർമാർക്ക് പ്രത്യേക പരിശീലനം നൽകി
കൊച്ചി: പോലീസ് സ്റ്റേഷനുകളിലെ ഇൻസ്പെക്ടർ എസ്.എച്ച്.ഒ (SHO) സംവിധാനം കൂടുതൽ ശക്തവും കുറ്റമറ്റതുമാക്കുന്നതിന്റെ ഭാഗമായി എറണാകുളം റൂറൽ ജില്ലയിലെ സബ് ഇൻസ്പെക്ടർമാർക്കായി പ്രത്യേക പരിശീലന ക്യാമ്പ് സംഘടിപ്പിച്ചു. ജില്ലാ പോലീസ് ആസ്ഥാനത്ത് നടന്ന ചടങ്ങ് റൂറൽ ജില്ലാ പോലീസ് മേധാവി കെ.എസ്. സുദർശൻ നേതൃത്വം നൽകി ഉദ്ഘാടനം ചെയ്തു.
പരിപാടിയിൽ ഉന്നത പോലീസ് ഉദ്യോഗസ്ഥരും വിവിധ മേഖലകളിലെ വിദഗ്ധരും ക്ലാസുകൾ നയിച്ചു. സൗത്ത് സോൺ ഐ.ജി. സ്പർജൻ കുമാർ, റേഞ്ച് ഡി.ഐ.ജി. ജി.എച്ച്. യതീഷ് ചന്ദ്ര, ക്രൈംബ്രാഞ്ച് എസ്.പി. എം.ജെ. സോജൻ, അഡീഷണൽ എസ്.പി. ജെ. ഉമേഷ് കുമാർ എന്നിവർ പരിശീലന പരിപാടിയിൽ മുഖ്യ പങ്കാളികളായി.
ഇതിനുപുറമെ, കുറ്റാന്വേഷണവും നിയമപരമായ വശങ്ങളും ഉൾപ്പെടെയുള്ള വിവിധ വിഷയങ്ങളിൽ വിദഗ്ധർ ക്ലാസുകൾ എടുത്തു. റിട്ടയേർഡ് എസ്.പി.മാരായ കെ.എം. ജിജിമോൻ, ബിജി ജോർജ്, ജോസഫ് സാജു, റിട്ട. അഡീഷണൽ എസ്.പി. വി.കെ. രാജു, ഗവൺമെന്റ് പ്ലീഡർ അഡ്വ. എ. സിന്ധു, സയന്റിഫിക് ഓഫീസർ നീതു പോൾ, എ.എസ്.ഐ. പി.എൻ. നിജു, ഐ കോപ്സ് മാസ്റ്റർ ട്രെയിനർ രൂപേഷ്, എയർടെൽ നോഡൽ ഓഫീസർ വാസുദേവൻ എന്നിവർ പരിശീലന ക്ലാസുകൾക്ക് നേതൃത്വം നൽകി. പോലീസ് ഉദ്യോഗസ്ഥരുടെ പ്രവർത്തനക്ഷമത വർദ്ധിപ്പിക്കുന്നതിനും ജനപക്ഷ പോലീസ് സേവനം ഉറപ്പാക്കുന്നതിനുമാണ് ഈ പുനസംഘടനാ പരിശീലനം സംഘടിപ്പിച്ചത്.
