18 വർഷത്തെ കാത്തിരിപ്പ് തീർന്നു; മമ്മൂട്ടിയും മോഹൻലാലും ഒന്നിച്ച ‘പേട്രിയറ്റ്’ ഇന്ന് മുതൽ ZEE5 ൽ, ഒപ്പം വൻ താരനിരയും
മഹേഷ് നാരായണൻ സംവിധാനം ചെയ്ത് മമ്മൂട്ടിയും മോഹൻലാലും പ്രധാന വേഷങ്ങളിലെത്തുന്ന പേട്രിയറ്റ് ജൂൺ 5 മുതൽ ZEE5 ൽ ഒടിടി സ്ട്രീമിങ് ആരംഭിക്കുന്നു.
A S Dinesh 
കാത്തിരിപ്പിന് വിരാമം; മമ്മൂട്ടിയും മോഹൻലാലും ഒന്നിച്ച ‘പേട്രിയറ്റ്’ ഇന്ന് മുതൽ ZEE5-ൽ
തിരുവനന്തപുരം: മലയാള സിനിമയിലെ സുവർണ്ണ കൂട്ടുകെട്ടായ മമ്മൂട്ടിയും മോഹൻലാലും 18 വർഷത്തെ നീണ്ട ഇടവേളയ്ക്ക് ശേഷം വീണ്ടും ഒന്നിച്ച ദൃശ്യവിസ്മയം ‘പേട്രിയറ്റ്’ ഒടിടിയിലെത്തുന്നു. പ്രമുഖ ഒടിടി പ്ലാറ്റ്ഫോമായ ZEE5-ലൂടെ ജൂൺ 5 ആയ ഇന്ന് മുതൽ ചിത്രം സ്ട്രീമിങ് ആരംഭിക്കും. മലയാളത്തിന് പുറമെ ഹിന്ദി, തെലുങ്ക്, തമിഴ്, കന്നഡ എന്നീ അഞ്ച് ഭാഷകളിലാണ് ചിത്രം പ്രേക്ഷകരിലേക്ക് എത്തുന്നത്.
പ്രശസ്ത സംവിധായകൻ മഹേഷ് നാരായണൻ ഒരുക്കുന്ന ഈ ബിഗ് ബഡ്ജറ്റ് ചിത്രം പ്രഖ്യാപനം മുതൽക്കേ സിനിമാലോകത്ത് വലിയ ചർച്ചയായിരുന്നു. അൻപതിലധികം സിനിമകളിൽ ഒന്നിച്ച് അഭിനയിച്ചിട്ടുണ്ടെങ്കിലും, വലിയൊരു ഇടവേളയ്ക്ക് ശേഷമാണ് ഇരുതാരങ്ങളും തുല്യപ്രാധാന്യമുള്ള വേഷങ്ങളിൽ ഒരേ ഫ്രെയിമിൽ പ്രത്യക്ഷപ്പെടുന്നത്. ചിത്രത്തിൽ 'ഡാനിയൽ ജെയിംസ്' എന്ന സയന്റിഫിക് ഡയറക്ടറുടെ വേഷത്തിലാണ് മമ്മൂട്ടി എത്തുന്നത്.
ആന്റോ ജോസഫ്, കെ.ജി. അനിൽകുമാർ എന്നിവർ ചേർന്ന് നിർമ്മിച്ച ചിത്രത്തിന്റെ സഹനിർമ്മാതാക്കൾ സി.ആർ. സലീം, സുഭാഷ് ജോർജ് മാനുവൽ എന്നിവരാണ്. സംവിധാനത്തിന് പുറമെ ചിത്രത്തിന്റെ തിരക്കഥ, സംഭാഷണം, എഡിറ്റിങ് എന്നിവ നിർവഹിച്ചിരിക്കുന്നതും മഹേഷ് നാരായണൻ തന്നെയാണ്. 'പെരിസ്കോപ്പ്' എന്ന പ്രോഗ്രാമിങ്ങിലൂടെ ജനങ്ങളെ നിരീക്ഷിക്കാൻ ചിലർ നടത്തുന്ന നിയമവിരുദ്ധ ശ്രമങ്ങളും, അതിനെ ചെറുക്കാൻ സാമൂഹിക ഉത്തരവാദിത്തമുള്ള ഒരു കൂട്ടം ആളുകൾ നടത്തുന്ന പോരാട്ടവുമാണ് ചിത്രത്തിന്റെ പ്രമേയം.
മലയാളത്തിലെ വൻ താരനിരയാണ് ചിത്രത്തിൽ അണിനിരക്കുന്നത്. ഫഹദ് ഫാസിൽ, കുഞ്ചാക്കോ ബോബൻ, രേവതി, സറിൻ ഷിഹാബ്, ജിനു ഏബ്രഹാം, ഇന്ദ്രൻസ്, ദർശന രാജേന്ദ്രൻ, ഗ്രേസ് ആന്റണി, ഷഹീൻ സിദ്ദിഖ്, സനൽ അമൻ, വിനീത് തട്ടിൽ, ഗീതി സംഗീത എന്നിവർക്കൊപ്പം ലേഡി സൂപ്പർസ്റ്റാർ നയൻതാര ഒരു സർപ്രൈസ് കഥാപാത്രമായി ചിത്രത്തിലെത്തുന്നുണ്ട്.
കഥ പൂർത്തിയായ ശേഷമാണ് ഓരോ കഥാപാത്രത്തിനും അനുയോജ്യരായ താരങ്ങളെ തിരഞ്ഞെടുത്തതെന്ന് സംവിധായകൻ മഹേഷ് നാരായണൻ വ്യക്തമാക്കി. ആദ്യമായി കഥ കേൾക്കുമ്പോൾ വിചാരിച്ചതിലും വലിയ ക്യാൻവാസിലാണ് ചിത്രം യാഥാർത്ഥ്യമായതെന്ന് മമ്മൂട്ടി പറഞ്ഞു. ഇത്രയും വലിയൊരു ചിത്രത്തിന്റെ ഭാഗമാകാൻ കഴിഞ്ഞതിൽ വലിയ സന്തോഷമുണ്ടെന്ന് മോഹൻലാലും കൂട്ടിച്ചേർത്തു. ഇന്ത്യയൊട്ടാകെയുള്ള സിനിമാപ്രേമികൾ ഏറെ ആകാംഷയോടെ കാത്തിരിക്കുന്ന 'പേട്രിയറ്റ്' ഇന്നുമുതൽ പ്രേക്ഷകർക്ക് ZEE5-ലൂടെ ആസ്വദിക്കാം.
