ഇന്നത്തെ വിദ്യാർഥികൾ ധിഷണാപരമായി ഏറെ മുന്നിൽ ലോകത്തോടും മത്സരിക്കാൻ അവർക്ക് ശേഷിയുണ്ട് ജോൺ ബ്രിട്ടാസ് എംപി
പുതിയ കാലത്തെ വിദ്യാർത്ഥികൾ അറിവിലും നിലവാരത്തിലും ഏറെ മുന്നിലാണെന്ന് ജോൺ ബ്രിട്ടാസ് എംപി. കണ്ണൂർ ജില്ലാ പഞ്ചായത്തിന്റെ എസ്എസ്എൽസി, പ്ലസ് ടു വിജയോത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
A S Dinesh 
ഇന്നത്തെ വിദ്യാർഥികൾ ധിഷണാപരമായി ഏറെ മുന്നിലെന്ന് ജോൺ ബ്രിട്ടാസ് എംപി; കണ്ണൂർ ജില്ലാ പഞ്ചായത്ത് 'വിജയോത്സവം' ഉദ്ഘാടനം ചെയ്തു
കണ്ണൂർ: ഇന്നത്തെ വിദ്യാർത്ഥികളുടെ അറിവും ബോധവും നിലവാരവും അളക്കാൻ കഴിയുന്നതിനും അപ്പുറമാണെന്നും, ധിഷണാപരമായി പുതിയ കാലത്തെ തലമുറ ഒരുപാട് ദൂരം മുന്നോട്ടുപോയിട്ടുണ്ടെന്നും ജോൺ ബ്രിട്ടാസ് എംപി. എസ്എസ്എൽസി, പ്ലസ് ടു, വിഎച്ച്എസ്ഇ പരീക്ഷകളിൽ മികച്ച വിജയം കൊയ്ത സ്കൂളുകളെയും വിദ്യാർത്ഥികളെയും അനുമോദിക്കുന്നതിനായി കണ്ണൂർ ജില്ലാ പഞ്ചായത്ത് സംഘടിപ്പിച്ച 'വിജയോത്സവം' പരിപാടിയുടെ ജില്ലാതല ഉദ്ഘാടനം കണ്ണൂർ ദിനേശ് ഓഡിറ്റോറിയത്തിൽ നിർവഹിച്ച് സംസാരിക്കുകയായിരുന്നു അദ്ദേഹം.
പഴയ കാലത്തുനിന്നും സ്കൂൾ വിദ്യാഭ്യാസം ഇന്ന് ഏറെ കുതിച്ചു മുന്നേറിയിട്ടുണ്ടെന്ന് എംപി ചൂണ്ടിക്കാട്ടി. ലോകത്തിന്റെ ഏതു കോണിലുമുള്ള വിദ്യാർത്ഥികളോട് മത്സരിക്കാനുള്ള ക്ഷമത ഇന്ന് കേരളത്തിലെ ഒരു കുഗ്രാമത്തിലുള്ള കുട്ടിക്കുപോലുമുണ്ട്. വിവിധ വിഷയങ്ങൾ പഠിക്കുന്നതിനൊപ്പം തന്നെ ഇന്നത്തെ കാലത്ത് നൈപുണ്യം (Skill development) നേടലും പ്രധാനമാണ്. വിദ്യാഭ്യാസ മേഖലയിൽ പണ്ട് പിന്നാക്കമെന്ന് അറിയപ്പെട്ടിരുന്ന മലബാറിലെയും കണ്ണൂരിലെയും വിദ്യാർഥികൾ ഇപ്പോൾ മികച്ച വിജയം നേടുന്നതിൽ വലിയ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
ചടങ്ങിൽ ജില്ലാ പഞ്ചായത്ത് പ്രസിഡണ്ട് ബിനോയ് കുര്യൻ അധ്യക്ഷത വഹിച്ചു. കണ്ണൂർ വിദ്യാഭ്യാസ ജില്ലയിലെ കണ്ണൂർ നോർത്ത്, കണ്ണൂർ സൗത്ത്, പാപ്പിനിശ്ശേരി സബ്ജില്ലകളിലെ സ്കൂളുകളെയും വിദ്യാർത്ഥികളെയുമാണ് ചടങ്ങിൽ അനുമോദിച്ചത്. എസ്എസ്എൽസി പരീക്ഷയിൽ 100 ശതമാനം വിജയം നേടിയ 138 സ്കൂളുകൾ, മുഴുവൻ വിഷയങ്ങളിലും എ പ്ലസ് വാങ്ങിയ വിദ്യാർത്ഥികൾ, പ്ലസ് ടു പരീക്ഷയിൽ 100 ശതമാനം വിജയം നേടിയ കമ്പിൽ മാപ്പിള എച്ച്എസ്എസ്, നിർമലഗിരി റാണിജയ് എച്ച്എസ്എസ്, കാരക്കുണ്ട് ഡോൺബോസ്കോ എന്നീ സ്കൂളുകൾ, പ്ലസ് ടു പരീക്ഷയിൽ മുഴുവൻ മാർക്കും വാങ്ങിയ 9 വിദ്യാർത്ഥികൾ എന്നിവർ എംപിയിൽ നിന്നും മറ്റ് വിശിഷ്ടാതിഥികളിൽ നിന്നും ആദരം ഏറ്റുവാങ്ങി.
ചടങ്ങിൽ എംഎൽഎമാരായ ടി. ഒ. മോഹനൻ, കെ. വി. സുമേഷ്, കോർപറേഷൻ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ സോന ജയറാം, ജില്ലാ പഞ്ചായത്ത് പൊതുമരാമത്ത് സ്റ്റാൻഡിങ് കമ്മിറ്റി ചെയർപേഴ്സൺ എ. പ്രദീപൻ, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ബോബി എണ്ണച്ചേരിയിൽ, വിവിധ ജില്ലാ പഞ്ചായത്ത് അംഗങ്ങൾ, ജില്ലാ കളക്ടർ പി. വിഷ്ണുരാജ്, ഡി.ഡി.ഇ ഷൈനി ഡി. തുടങ്ങിയവർ പങ്കെടുത്തു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ പി. രവീന്ദ്രൻ സ്വാഗതവും, സെക്രട്ടറി റ്റൈനി സൂസൺ ജോൺ നന്ദിയും പറഞ്ഞു.
