ഡോക്ടറെ വിളിച്ചുവരുത്തി മർദിച്ച കേസ്: നടൻ ബിബിൻ പെരുമ്പിള്ളിക്കും നടി അതുല്യ ചന്ദ്രയ്ക്കും ജാമ്യം

ഡോക്ടറെ ഫ്ലാറ്റിലേക്ക് വിളിച്ചുവരുത്തി മർദിച്ച് മോചനദ്രവ്യം ആവശ്യപ്പെട്ടെന്ന കേസിൽ നടൻ ബിബിൻ പെരുമ്പിള്ളി, നടി അതുല്യ ചന്ദ്ര എന്നിവർക്ക് കോടതി ജാമ്യം അനുവദിച്ചു. അതേസമയം, നടി നൽകിയ പീഡന പരാതിയിൽ ഡോക്ടർ ഒളിവിലാണ്.

ഡോക്ടറെ വിളിച്ചുവരുത്തി മർദിച്ച കേസ്: നടൻ ബിബിൻ പെരുമ്പിള്ളിക്കും നടി അതുല്യ ചന്ദ്രയ്ക്കും ജാമ്യം
ഡോക്ടറെ വിളിച്ചുവരുത്തി മർദിച്ച കേസ്: നടൻ ബിബിൻ പെരുമ്പിള്ളിക്കും നടി അതുല്യ ചന്ദ്രയ്ക്കും ജാമ്യം

​ഡോക്ടറെ വിളിച്ചുവരുത്തി മർദിച്ച കേസ്: നടൻ ബിബിൻ പെരുമ്പിള്ളിക്കും നടി അതുല്യ ചന്ദ്രയ്ക്കും ജാമ്യം; പരാതിക്കാരനായ ഡോക്ടർ ബലാത്സംഗ കേസിൽ ഒളിവിൽ

കൊച്ചി: ഡോക്ടറെ ഫ്ലാറ്റിലേക്ക് വിളിച്ചുവരുത്തി മർദിക്കുകയും മോചനദ്രവ്യം ആവശ്യപ്പെടുകയും ചെയ്തെന്ന കേസിൽ അറസ്റ്റിലായ നടൻ ബിബിൻ പെരുമ്പിള്ളി, നടി അതുല്യ ചന്ദ്ര, സുഹൃത്ത് കെ.ബി. വിഷ്ണു എന്നിവർക്ക് കോടതി ജാമ്യം അനുവദിച്ചു. എല്ലാ തിങ്കളാഴ്ചയും വ്യാഴാഴ്ചയും അന്വേഷണ ഉദ്യോഗസ്ഥനു മുമ്പാകെ ഹാജരാകണമെന്നും കോടതിയുടെ അനുമതിയില്ലാതെ വിദേശത്തേക്ക് പോകരുതെന്നും അടക്കമുള്ള കർശന ഉപാധികളോടെയാണ് ജാമ്യം. അതേസമയം, കേസിലെ പരാതിക്കാരനായ ഡോ. ജോൺസൺ കെ. വർഗീസ് ബലാത്സംഗ കേസിൽ ഒളിവിലാണ്. ഇയാളുടെ മുൻകൂർ ജാമ്യഹർജി തിങ്കളാഴ്ച കോടതി പരിഗണിക്കും.

ഈ മാസം രണ്ടിന് വൈകിട്ട് 6.30-ഓടെ ബന്ധുവിന് അസുഖമാണെന്ന് പറഞ്ഞ് ഫ്ലാറ്റിലേക്ക് വിളിച്ചുവരുത്തിയ ശേഷം തന്നെ തടഞ്ഞുവച്ച് മർദിച്ചുവെന്നാണ് ഡോ. ജോൺസൺ കടവന്ത്ര പൊലീസിൽ നൽകിയ പരാതി. മൂന്ന് ലക്ഷം രൂപ വിലവരുന്ന മൊബൈൽ ഫോണുകൾ, സ്മാർട്ട് വാച്ച്, ഇയർപോഡ് എന്നിവ തട്ടിയെടുത്തെന്നും മൂന്ന് കോടി രൂപ മോചനദ്രവ്യം ആവശ്യപ്പെട്ടെന്നും പരാതിയിൽ പറയുന്നു. ഒടുവിൽ ഒരു കോടി രൂപ നൽകാമെന്ന് സമ്മതിച്ചതിനെത്തുടർന്ന് മൂന്ന് ദിവസത്തിനകം 25 ലക്ഷം രൂപ നൽകണമെന്ന നിബന്ധനയോടെ വിട്ടയച്ചെന്നായിരുന്നു പൊലീസ് റിപ്പോർട്ട്.

കുടുംബ ഡോക്ടർ കൂടിയായ ജോൺസൺ, രണ്ടാം പ്രതിയായ അതുല്യയുടെ ബന്ധുവിനെ പീഡിപ്പിക്കുകയും ദൃശ്യങ്ങൾ ഫോണിൽ പകർത്തുകയും ചെയ്തതിനെത്തുടർന്നാണ് സംഭവങ്ങളുടെ തുടക്കമെന്ന് പ്രതിഭാഗം കോടതിയിൽ വാദിച്ചു. വിവരം അറിഞ്ഞ കുടുംബാംഗങ്ങൾ ഡോക്ടറെ വിളിച്ചുവരുത്തി ചോദ്യം ചെയ്തപ്പോൾ ഇയാൾ കുറ്റം സമ്മതിക്കുകയും ചിത്രങ്ങളൊന്നും പകർത്തിയിട്ടില്ലെന്ന് കാണിച്ച് ഫോൺ കൈമാറുകയുമായിരുന്നു.

​ഡോക്ടറുടെ ഫോണിൽ രോഗികളുടേത് ഉൾപ്പെടെ ഒട്ടേറെ നഗ്നദൃശ്യങ്ങൾ ഉണ്ടെന്നും ഇത് പുറത്തുവരുമെന്ന ഭീതിയിലാണ് തങ്ങൾക്കെതിരെ വ്യാജ പരാതി നൽകിയതെന്നും അതുല്യയുടെ അഭിഭാഷകൻ ചൂണ്ടിക്കാട്ടി. അതുല്യയുടെ ബന്ധുവിന്റെ പരാതിയിൽ ഡോക്ടർക്കെതിരെ ഇൻഫോപാർക്ക് പൊലീസ് ബലാത്സംഗത്തിന് കേസെടുത്തിട്ടുണ്ട്.

തെളിവുകൾ നശിപ്പിക്കാൻ സാധ്യതയുള്ളതിനാൽ ജാമ്യം നൽകരുതെന്നായിരുന്നു പ്രോസിക്യൂഷന്റെ വാദം. എന്നാൽ, ആരോപണങ്ങൾ ഗൗരവകരമാണെങ്കിലും അത് മാത്രം ജാമ്യം നിഷേധിക്കാൻ കാരണമാകില്ലെന്ന് കോടതി വ്യക്തമാക്കി. നവംബർ അഞ്ച് മുതൽ 15 ദിവസമായി പ്രതികൾ കസ്റ്റഡിയിലാണെന്നും ഇനി കസ്റ്റഡി ചോദ്യം ചെയ്യലിന്റെ ആവശ്യമില്ലെന്നും കോടതി നിരീക്ഷിച്ചു. പരാതിക്കാരന്റെ ഫോൺ മറ്റൊരു സ്റ്റേഷനിൽ ഏൽപ്പിച്ചിട്ടുണ്ടെന്ന കാര്യം പരിഗണിച്ച കോടതി, ഫോണുകൾ തട്ടിയെടുത്തതാണോ സ്വമേധയാ കൈമാറിയതാണോ എന്നത് വിചാരണ വേളയിലെ തെളിവുകളുടെ അടിസ്ഥാനത്തിലേ തീരുമാനിക്കാനാകൂ എന്നും വ്യക്തമാക്കി.