കെയർ വിഷൻ ഡോക്യുമെൻ്റ് ഡോ. ടി.എം. തോമസ് ഐസക് പ്രകാശനം ചെയ്തു

കാലാവസ്ഥാ അതിജീവനത്തിന് പുനലൂർ നഗരസഭയുടെ 'കെയർ'; വിഷൻ ഡോക്യുമെൻ്റ് ഡോ. ടി.എം. തോമസ് ഐസക് പ്രകാശനം ചെയ്തു

​പുനലൂർ: നഗരസഭ ആവിഷ്കരിച്ചു നടപ്പിലാക്കുന്ന കാലാവസ്ഥാ അതിജീവന പദ്ധതിയായ 'കെയർ' (CARE)-ൻ്റെ വിഷൻ ഡോക്യുമെൻ്റ് പ്രകാശനം ചെയ്തു. രാജരോഹിണി ഓഡിറ്റോറിയത്തിൽ നടന്ന ചടങ്ങിൽ മുൻ ധനകാര്യ മന്ത്രിയും പരിസ്ഥിതി പ്രവർത്തകനുമായ ഡോ. ടി. എം. തോമസ് ഐസക് പ്രകാശന കർമ്മം നിർവഹിച്ചു. നഗരസഭാ ചെയർപേഴ്സൺ എം. എ. രാജഗോപാൽ ചടങ്ങിൽ അധ്യക്ഷത വഹിച്ചു.

​ആഗോളതാപനം മൂലം വർധിച്ചുവരുന്ന വേനൽച്ചൂട്, കാലാവസ്ഥാ വ്യതിയാനം, ജലക്ഷാമം തുടങ്ങിയ പ്രതിസന്ധികളെ നേരിടാനാണ് പുനലൂർ നഗരസഭ 'കെയർ' പദ്ധതിക്ക് രൂപം നൽകിയിരിക്കുന്നത്. പുനലൂരിനെ ഒരു കാർബൺ ന്യൂട്രൽ പ്രദേശമാക്കി മാറ്റുകയാണ് പദ്ധതിയുടെ പ്രധാന ലക്ഷ്യം.

​കാർബൺ ബഹിർഗമനം കുറയ്ക്കുക, ശാസ്ത്രീയ മാലിന്യ സംസ്കരണം, ഇലക്ട്രിക് വാഹനങ്ങളുടെയും പാരമ്പര്യേതര ഊർജ സ്രോതസ്സുകളുടെയും ഉപയോഗം പ്രോത്സാഹിപ്പിക്കുക തുടങ്ങിയ വിവിധ പ്രവർത്തനങ്ങൾ പദ്ധതിയുടെ ഭാഗമായി ഏകോപിപ്പിക്കും.

​പ്രധാന ലക്ഷ്യങ്ങളും പ്രവർത്തനങ്ങളും:

​പ്രദേശത്ത് ഒരു ലക്ഷം ഫലവൃക്ഷത്തൈകൾ നടീച്ചു പരിപാലിക്കും.

​കുടുംബശ്രീ, അയ്യങ്കാളി നഗര തൊഴിലുറപ്പ് പദ്ധതി പ്രവർത്തകരെ പങ്കാളികളാക്കി വിവിധ പരിസ്ഥിതി സൗഹൃദ പദ്ധതികൾ നടപ്പിലാക്കും.

​സ്‌കൂളുകൾ കേന്ദ്രീകരിച്ച് ഹരിത ക്ലബ്ബുകളുടെ പ്രവർത്തനം കൂടുതൽ വിപുലമാക്കും.

​കൃത്യവും ശാസ്ത്രീയവുമായ മാലിന്യ സംസ്കരണ സംവിധാനം നഗരസഭയിൽ ഉറപ്പാക്കും.

​പദ്ധതിയുടെ വിജയത്തിനായി നഗരസഭയോടൊപ്പം മുഴുവൻ ജനങ്ങളുടെയും കൂട്ടായ പിന്തുണ ഉണ്ടാകണമെന്ന് ചെയർപേഴ്സൺ എം. എ. രാജഗോപാൽ അഭ്യർത്ഥിച്ചു.

​ചടങ്ങിൽ വൈസ് ചെയർപേഴ്സൺ കെ. പ്രഭ സ്വാഗതം ആശംസിച്ചു. യു.ഡി.എഫ്. പാർലമെൻ്ററി പാർട്ടി ലീഡർ നെൽസൺ സെബാസ്റ്റ്യൻ മുഖ്യപ്രഭാഷണവും, സാഹിത്യകാരനും നഗരസഭ മുൻ ചെയർമാനുമായ അഡ്വ. ഡി. സുരേഷ്കുമാർ മുഖ്യാതിഥിയായും പങ്കെടുത്തു. സ്ഥിരം സമിതി അധ്യക്ഷരായ സുഭാഷ് ജി. നാഥ്, കെ. രാജശേഖരൻ, എസ്. അൻവർ, ടി. അനിത, കൗൺസിലർമാരായ ഷഫ്ന ഷാജഹാൻ, ആർ. റിയാസ്, റാണി ജേക്കബ്, രഞ്ജിത മോഹൻ, ജോസഫ് ദേവസ്യ, ഫാത്തിമ, നാസില ഷാജി, ഹരികൃഷ്ണൻ, സി.ഡി.എസ് അധ്യക്ഷ വസന്ത രഞ്ജൻ എന്നിവർ സംസാരിച്ചു. മുനിസിപ്പൽ സെക്രട്ടറി ഇൻ ചാർജ് ബിന്ദു എസ്. കരുണാകരൻ നന്ദി പറഞ്ഞു.