സൈബർ ത്രില്ലർ ആവേശം അച്യുത അവതാരം ശ്രദ്ധ നേടി ഫസ്റ്റ് ലുക്ക് പോസ്റ്റർ

​കൊച്ചി: മലയാള സിനിമയിൽ പുതിയൊരു ദൃശ്യാനുഭവം വാഗ്ദാനം ചെയ്ത് സൈബർ-ത്രില്ലർ ചിത്രം ‘അച്യുത അവതാരം’ അണിയറയിൽ ഒരുങ്ങുന്നു. ചിത്രത്തിന്റെ ആകാംക്ഷ ജനിപ്പിക്കുന്ന ഫസ്റ്റ് ലുക്ക് പോസ്റ്റർ പുറത്തുവിട്ടു. തുളുനാടൻ വിശ്വാസത്തിന്റെ പശ്ചാത്തലത്തിൽ ഒരുങ്ങുന്ന ഈ ചിത്രം കന്നഡയിലെ പ്രമുഖ എഴുത്തുകാരനും ചലച്ചിത്ര പ്രവർത്തകനുമായ പുനീത് ആണ് സംവിധാനം ചെയ്യുന്നത്.

​റെയ്‌റ വെഞ്ചേഴ്‌സിന്റെ ബാനറിൽ രമേശ സി, രുദ്രമൂർത്തി, രാജേഷ് ആർ എന്നിവർ ചേർന്നാണ് ചിത്രം നിർമ്മിക്കുന്നത്. വർഷങ്ങളായി തമിഴ്, തെലുങ്ക് സിനിമകളിൽ അസോസിയേറ്റ് ഡയറക്ടറായി പ്രവർത്തിച്ചിട്ടുള്ള പുനീതിന്റെ ആദ്യ സ്വതന്ത്ര സംവിധാന സംരംഭമാണിത്. ചിത്രത്തിന്റെ തിരക്കഥ ഒരുക്കിയിരിക്കുന്നതും അദ്ദേഹം തന്നെയാണ്.

​"കനലിൽ ആടിത്തിമിർക്കുന്ന തീച്ചാമുണ്ഡി തെയ്യം പോലെ... എരിയുന്ന തീയിലേക്ക് ശാന്തമായി നൃത്തമാടുന്ന പോലെ..." എന്നാണ് ചിത്രത്തെക്കുറിച്ച് നിർമ്മാതാക്കൾ വിശേഷിപ്പിക്കുന്നത്. പുരാതന വിശ്വാസങ്ങളെയും ആധുനിക സൈബർ ലോകത്തെയും ബന്ധിപ്പിക്കുന്ന ഒരു വ്യത്യസ്ത പ്രമേയമായിരിക്കും ചിത്രമെന്നാണ് സൂചന.

​പ്രധാന താരങ്ങളും അണിയറ പ്രവർത്തകരും:

പ്രമുഖ നർത്തകിയും നടിയുമായ മാളവിക നന്ദൻ, ‘കാന്താര’യിലൂടെ ശ്രദ്ധേയനായ അവിനാശ്, സീമ ജി. നായർ എന്നിവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. ഇവർക്കൊപ്പം അന്യഭാഷാ താരങ്ങളും അണിനിരക്കുന്നു.

​ഛായാഗ്രഹണം: ആനന്ദ് മീനാക്ഷി (ദേശീയ അവാർഡ് ജേതാവ്)

​സംഗീതം: പ്രസന്ന കുമാർ എം.എസ് (വരികൾ: ഹരീഷ് മോഹനൻ)

​എഡിറ്റിംഗ്: പവൻ പൂവയ്യ, മഹേഷ് തോട്ട

​വി.എഫ്.എക്സ്: ഐഡന്റ് ലാബ്സ്

​കാസർകോടും പരിസര പ്രദേശങ്ങളിലുമായി ചിത്രീകരണം പൂർത്തിയാക്കിയ ചിത്രം മെയ് മാസത്തിൽ തിയേറ്ററുകളിൽ എത്തും. പി. ശിവപ്രസാദാണ് ചിത്രത്തിന്റെ പി.ആർ.ഒ. ഡിജിറ്റൽ മാർക്കറ്റിംഗ് വൈറ്റ് പേപ്പർ നിർവ്വഹിക്കുന്നു.