തരംഗ് 2K26 ഉദ്ഘാടനം ചെയ്തു സർഗാത്മകത മനുഷ്യബന്ധങ്ങളെ ദൃഢമാക്കുമെന്ന് മന്ത്രി ആർ. ബിന്ദു
ഐ.എച്ച്.ആർ.ഡി ടെക്നോ കൾച്ചറൽ ഫെസ്റ്റ് തരംഗ് 2K26 കപ്രശ്ശേരി എം.ടി.എച്ച്.എസ്.എസിൽ ഉന്നത വിദ്യാഭ്യാസ വകുപ്പ് മന്ത്രി ഡോ. ആർ. ബിന്ദു ഉദ്ഘാടനം ചെയ്തു. കലയും സാഹിത്യവും പുതുതലമുറയുടെ വ്യക്തിത്വ രൂപീകരണത്തിന് അത്യന്താപേക്ഷിതമാണെന്ന് മന്ത്രി പറഞ്ഞു
അനില എം കൃഷ്ണൻ 
സർഗാത്മക വേദികൾ മനുഷ്യബന്ധങ്ങളെ ദൃഢമാക്കും: മന്ത്രി ഡോ. ആർ. ബിന്ദു
കപ്രശ്ശേരി: കലയും സാഹിത്യവും ഉൾച്ചേരുന്ന സർഗാത്മക വേദികൾ ഇഴയടുപ്പമുള്ള മനുഷ്യബന്ധങ്ങൾ സൃഷ്ടിക്കുമെന്ന് ഉന്നത വിദ്യാഭ്യാസ വകുപ്പ് മന്ത്രി ഡോ. ആർ. ബിന്ദു. മോഡൽ ടെക്നിക്കൽ ഹയർ സെക്കൻഡറി സ്കൂൾ (എം.ടി.എച്ച്.എസ്.എസ്) കപ്രശ്ശേരിയിൽ സംഘടിപ്പിച്ച ഐ.എച്ച്.ആർ.ഡി ടെക്നോ കൾച്ചറൽ ഫെസ്റ്റ് 'തരംഗ് 2K26' ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.
യുവതലമുറയിലെ ഹിംസാത്മകമായ ചോദനകളെയും മൃഗീയ വാസനകളെയും സ്ഫുടം ചെയ്തെടുക്കാൻ കലയ്ക്കും സാഹിത്യത്തിനും സാധിക്കുമെന്ന് മന്ത്രി പറഞ്ഞു. "അക്ഷരമാണ് ലഹരി, വായനയാണ് ലഹരി, സർഗ്ഗാത്മകതയാണ് ലഹരി എന്ന മുദ്രാവാക്യമാണ് നാം ഉയർത്തുന്നത്. കുട്ടികളുടെ ഊർജ്ജത്തെ ശരിയായ ദിശയിലേക്ക് വഴിതിരിച്ചു വിടാനും എല്ലാവരെയും ഉൾക്കൊള്ളുന്ന വിശാല മാനവികതയിലേക്ക് വളരാനും ഇത്തരം വേദികൾ അത്യന്താപേക്ഷിതമാണ്," മന്ത്രി കൂട്ടിച്ചേർത്തു.
സാങ്കേതിക മികവും സാമൂഹിക പ്രതിബദ്ധതയും
വിദ്യാർത്ഥികളുടെ സർഗ്ഗശേഷി പ്രകടിപ്പിക്കാൻ മാത്രമല്ല, അവരുടെ നൂതന ആശയങ്ങളും അതുവഴി വികസിപ്പിച്ചെടുത്ത ഉൽപ്പന്നങ്ങളും പൊതുജനങ്ങൾക്ക് മുന്നിൽ പ്രദർശിപ്പിക്കാനുള്ള വേദിയായും 'തരംഗ്' മാറുന്നുണ്ട്. ക്യാമ്പസ് മതിലുകൾക്ക് പുറത്തുള്ള സാമൂഹിക പ്രശ്നങ്ങൾ കൂടി മനസ്സിലാക്കി പുതിയ സാങ്കേതിക വിദ്യകൾ ആവിഷ്കരിക്കാൻ കുട്ടികൾക്ക് ഇതിലൂടെ സാധിക്കുന്നു.
ഐ.എച്ച്.ആർ.ഡിയുടെ വളർച്ച
1987-ൽ ഗ്രാമപ്രദേശങ്ങളിലെ മിടുക്കരായ വിദ്യാർത്ഥികൾക്ക് സാങ്കേതിക പരിജ്ഞാനം നൽകാൻ ആരംഭിച്ച ഐ.എച്ച്.ആർ.ഡി ഇന്ന് 87 സ്ഥാപനങ്ങളുള്ള ബൃഹത്തായ പ്രസ്ഥാനമായി മാറിയത് കേരളത്തിന്റെ ഉന്നത വിദ്യാഭ്യാസ മേഖലയ്ക്ക് അഭിമാനമാണെന്ന് മന്ത്രി ചൂണ്ടിക്കാട്ടി. കൊട്ടാരക്കരയിൽ ആരംഭിച്ച ക്യാമ്പസ് ഇൻഡസ്ട്രിയൽ പാർക്കും സോഹോ (Zoho) പോലുള്ള അന്താരാഷ്ട്ര കമ്പനികളുമായുള്ള സഹകരണവും വിദ്യാർത്ഥികളുടെ നൈപുണ്യ വികസനത്തിന് മികച്ച ഉദാഹരണമാണെന്നും മന്ത്രി പറഞ്ഞു.
ചടങ്ങിൽ ദേശീയ-സംസ്ഥാന തലങ്ങളിൽ റിപ്പബ്ലിക് ദിന പരേഡിൽ പങ്കെടുത്ത വിദ്യാർത്ഥികളെ മന്ത്രി ആദരിച്ചു. ഫെബ്രുവരി 7, 8 തീയതികളിലായാണ് 'തരംഗ് 2K26' കപ്രശ്ശേരിയിൽ നടക്കുന്നത്.
അൻവർ സാദത്ത് എം.എൽ.എ ചടങ്ങിൽ അധ്യക്ഷനായി. ഐ.എച്ച്.ആർ.ഡി ഡയറക്ടർ ഡോ. വി.എ അരുൺകുമാർ, ചെങ്ങമനാട് ഗ്രാമപഞ്ചായത്ത് പ്രസിഡന്റ് ജെർളി കപ്രശ്ശേരി, പഞ്ചായത്ത് അംഗങ്ങളായ ആർ. സുനിൽ കുമാർ, പ്രമോദ് കുമാർ, ചെങ്ങമനാട് സഹകരണസംഘം പ്രസിഡന്റ് എം.കെ അസീസ്, എം.ജി സർവകലാശാല മുൻ സിൻഡിക്കേറ്റ് അംഗം ഡോ. എം.എസ് മുരളി, തരംഗ് കോർ കമ്മിറ്റി ചെയർമാൻ ഡോ. ഇ.എസ് ജയചന്ദ്രൻ തുടങ്ങിയവർ ചടങ്ങിൽ സംബന്ധിച്ചു
