കോട്ടയിൽ മൂന്ന് നില കെട്ടിടം തകർന്ന് വീണു 2 മരണം, നിരവധി പേർ കുടുങ്ങിക്കിടക്കുന്നു
രാജസ്ഥാനിലെ കോട്ടയിലുണ്ടായ കെട്ടിടം തകർച്ചയിൽ രണ്ട് മരണം. തൽവണ്ടിയിൽ റസ്റ്ററന്റ് പ്രവർത്തിച്ചിരുന്ന മൂന്ന് നില കെട്ടിടമാണ് തകർന്നത്. രക്ഷാപ്രവർത്തനം തുടരുന്നു.
Angel Varghese 
കോട്ടയിൽ മൂന്ന് നില കെട്ടിടം തകർന്ന് രണ്ട് മരണം; നിരവധി പേർ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നു
കോട്ട: രാജസ്ഥാനിലെ കോട്ടയിൽ മൂന്ന് നില കെട്ടിടം തകർന്നുണ്ടായ അപകടത്തിൽ രണ്ട് പേർ മരിച്ചു. ശനിയാഴ്ച രാത്രി ഒൻപത് മണിയോടെ തൽവണ്ടിയിലാണ് അപകടമുണ്ടായത്. റസ്റ്ററന്റായി പ്രവർത്തിച്ചിരുന്ന കെട്ടിടമാണ് പൂർണ്ണമായും തകർന്നുവീണത്. അപകടസമയത്ത് കെട്ടിടത്തിലുണ്ടായിരുന്ന പതിനഞ്ചോളം പേർ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായാണ് പ്രാഥമിക റിപ്പോർട്ടുകൾ.
രക്ഷാപ്രവർത്തകർ സ്ഥലത്തെത്തി അവശിഷ്ടങ്ങൾക്കിടയിൽ നിന്ന് എട്ട് പേരെ പുറത്തെടുത്ത് കോട്ട ജില്ലാ ആശുപത്രിയിൽ പ്രവേശിപ്പിച്ചു. ഇതിൽ ഒരു കുട്ടിയുൾപ്പെടെ അഞ്ച് പേരുടെ നില അതീവ ഗുരുതരമാണ്. മരിച്ചവരിൽ ഒരാൾ ബംഗാൾ സ്വദേശിയാണെന്ന് സ്ഥിരീകരിച്ചിട്ടുണ്ട്, എന്നാൽ ഇയാളെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല.
അപകടകാരണം അവ്യക്തം
കെട്ടിടം തകരാനുണ്ടായ കൃത്യമായ കാരണം ഇതുവരെ വ്യക്തമല്ലെങ്കിലും സമീപത്ത് നടക്കുന്ന മറ്റൊരു നിർമ്മാണ പ്രവർത്തനമാണ് അപകടത്തിന് പിന്നിലെന്ന് സംശയിക്കുന്നു. തൊട്ടടുത്ത് പുതിയ കെട്ടിടത്തിനായി കുഴിയെടുക്കുന്നതിനിടയിലുണ്ടായ പ്രകമ്പനമാകാം തകർച്ചയ്ക്ക് കാരണമെന്ന് അധികൃതർ വിലയിരുത്തുന്നുണ്ട്. എന്നാൽ, വലിയ സ്ഫോടന ശബ്ദത്തോടെയാണ് കെട്ടിടം തകർന്നതെന്ന് പ്രദേശവാസികൾ സാക്ഷ്യപ്പെടുത്തുന്നു. സംഭവത്തിൽ പോലീസ് വിശദമായ അന്വേഷണം ആരംഭിച്ചു.
