മൂവാറ്റുപുഴയിൽ ഹരിത ബൂത്ത് തയ്യാർ

മൂവാറ്റുപുഴയിൽ 'ഹരിത ബൂത്ത്' തയ്യാർ: തിരഞ്ഞെടുപ്പ് പ്ലാസ്റ്റിക് മുക്തമാക്കും

​മൂവാറ്റുപുഴ: തദ്ദേശ സ്വയംഭരണ തിരഞ്ഞെടുപ്പിനെ ഹരിതാഭവും പൂർണ്ണമായും പ്ലാസ്റ്റിക് മുക്തവുമാക്കുക എന്ന ലക്ഷ്യത്തോടെ മൂവാറ്റുപുഴ നഗരസഭ ഹരിത ബൂത്ത് സജ്ജീകരിച്ചു. കുരുത്തോലകളും ചേമ്പിലകളും ഉപയോഗിച്ചാണ് ബൂത്ത് ആകർഷകമാക്കിയിരിക്കുന്നത്.

​നഗരത്തിലെ ടൗൺ യുപി സ്കൂളിലാണ് നഗരസഭ ഹെൽത്ത് വിഭാഗത്തിന്റെ നേതൃത്വത്തിൽ മാതൃകാപരമായ ഹരിത ബൂത്ത് ഒരുക്കിയത്. യുപി സ്കൂൾ സ്ഥിതി ചെയ്യുന്ന എട്ടാം വാർഡിലെ ഒന്നാം നമ്പർ പോളിംഗ് ബൂത്താണ് ഈ വേറിട്ട അലങ്കാരങ്ങൾക്കായി തിരഞ്ഞെടുത്തത്. ശുചിത്വ മിഷന്റെ സഹകരണവും ഇതിനു ലഭിച്ചു.

​ചേമ്പിലകളിൽ 'സ്വാഗതം' എന്ന് എഴുതിയ ബോർഡുകളും, കുരുത്തോലകളാൽ അലങ്കരിച്ച പ്രവേശന കവാടവും ഓലയും ചേമ്പിൻ താളുകളുമാണ് അലങ്കാരത്തിനായി ഉപയോഗിച്ചിരിക്കുന്നത്. പ്ലാസ്റ്റിക് വസ്തുക്കൾ ഇവിടെ പൂർണമായും ഒഴിവാക്കിയിട്ടുണ്ട്.

​വോട്ടർമാർക്കായി ദാഹജലം നൽകുന്നതിനായി 'തണ്ണീർപ്പന്തലും' ബൂത്തിൽ സജ്ജമാക്കിയിട്ടുണ്ട്. പ്രത്യേകമായി തയ്യാറാക്കിയ പന്തലിൽ മൺകൂജയിലാണ് കുടിവെള്ളം ഒരുക്കിയിരിക്കുന്നത്. വെള്ളം കുറയുന്ന മുറയ്ക്ക് നിറയ്ക്കുന്നതിനായി പ്രത്യേക ജോലിക്കാരെയും നഗരസഭ ചുമതലപ്പെടുത്തിയിട്ടുണ്ട്. മാലിന്യം നിക്ഷേപിക്കുന്നതിനായി ഈറ്റ കൊണ്ട് നിർമ്മിച്ച കുട്ടകളും ഇവിടെ ഒരുക്കിയിട്ടുണ്ട്.

​നഗരസഭയിലെ 30 വാർഡുകളിലെ പോളിംഗ് സ്റ്റേഷനുകളും ഹരിത ചട്ടം പാലിച്ചാണ് ക്രമീകരിച്ചിരിക്കുന്നതെന്ന് നഗരസഭ സെക്രട്ടറി സിനി എച്ച്. അറിയിച്ചു.