മെയ് 4 ലേക്ക് ഇനി ദിവസങ്ങൾ മാത്രം വോട്ടെണ്ണൽ നടപടികൾക്കായി ഉദ്യോഗസ്ഥർ സജ്ജം
നിയമസഭാ തിരഞ്ഞെടുപ്പ് വോട്ടെണ്ണലിനായി നിയോഗിച്ച 1,410 ഉദ്യോഗസ്ഥർക്ക് ജില്ലയിൽ പരിശീലനം ആരംഭിച്ചു. മെയ് നാലിന് വോട്ടെണ്ണൽ നടപടികൾ തുടങ്ങും. സുരക്ഷാ ക്രമീകരണങ്ങളും വോട്ടെണ്ണൽ രീതികളും പരിശീലനത്തിൽ ഉൾപ്പെടുന്നു.
അനില എം കൃഷ്ണൻ 
വോട്ടെണ്ണൽ ഡ്യൂട്ടി: ജില്ലയിൽ ഉദ്യോഗസ്ഥർക്കുള്ള പരിശീലനം തുടങ്ങി; 1,410 പേർ പങ്കെടുക്കുന്നു
തിരുവനന്തപുരം: നിയമസഭാ തിരഞ്ഞെടുപ്പിന്റെ വോട്ടെണ്ണൽ നടപടികൾക്കായി ജില്ലയിൽ നിയോഗിക്കപ്പെട്ട ഉദ്യോഗസ്ഥർക്കായുള്ള പരിശീലന പരിപാടികൾക്ക് തുടക്കമായി. വിവിധ മണ്ഡലങ്ങളിൽ നിന്നായി തിരഞ്ഞെടുക്കപ്പെട്ട കൗണ്ടിങ് അസിസ്റ്റന്റുമാർ, മൈക്രോ ഒബ്സർവർമാർ, കൗണ്ടിങ് സൂപ്പർവൈസർമാർ എന്നിവർക്കാണ് രണ്ട് ദിവസങ്ങളിലായി തീവ്രപരിശീലനം നൽകുന്നത്.
കലക്ടറേറ്റ് കോൺഫറൻസ് ഹാൾ, ജില്ലാ പ്ലാനിങ് ഹാൾ, താലൂക്ക് കോൺഫറൻസ് ഹാൾ എന്നിവിടങ്ങളിലായി നടക്കുന്ന പരിശീലനത്തിൽ 1,410 ഉദ്യോഗസ്ഥരാണ് പങ്കെടുക്കുന്നത്. വോട്ടെണ്ണൽ ദിനത്തിൽ പാലിക്കേണ്ട നടപടിക്രമങ്ങൾ, വോട്ടിങ് മെഷീനുകളുടെ (EVM) സുരക്ഷ, എണ്ണത്തിലെ കൃത്യത ഉറപ്പാക്കൽ എന്നിവയിലാണ് പ്രധാനമായും ക്ലാസുകൾ നൽകുന്നത്. ജില്ലാ തിരഞ്ഞെടുപ്പ് വിഭാഗത്തിന്റെ നേരിട്ടുള്ള മേൽനോട്ടത്തിലാണ് പരിശീലനം നടക്കുന്നത്.
ആദ്യദിന പരിശീലനത്തിന് നോഡൽ ഓഫീസർ സത്യജിത്ത്, സീനിയർ ക്ലർക്ക് വി. വാസുദേവ പ്രസാദ്, എസ്.സി ഡെവലപ്മെന്റ് ഓഫീസർ ഹരീഷ്, ജൂനിയർ സൂപ്രണ്ട് കെ. ബീന, വിജിലൻസ് ഫ്ലയിങ് സ്ക്വാഡ് ഓഫീസർ പി. രാധാകൃഷ്ണൻ, സി. ഷമീർ മോൻ തുടങ്ങിയവർ നേതൃത്വം നൽകി. മെയ് നാലിന് രാവിലെ എട്ട് മണിയോടെ വോട്ടെണ്ണൽ നടപടികൾ ആരംഭിക്കും.
