കളമശ്ശേരിയിൽ വൻ ഫ്ലക്സ് വേട്ട 1650 മീറ്റർ നിരോധിത മെറ്റീരിയൽ പിടിച്ചെടുത്തു 40,000 രൂപ പിഴ
നിയമസഭാ തിരഞ്ഞെടുപ്പിന്റെ ഭാഗമായി കളമശ്ശേരിയിൽ നടത്തിയ പരിശോധനയിൽ 1650 മീറ്റർ നിരോധിത പ്ലാസ്റ്റിക് ഫ്ലക്സ് പിടികൂടി. 40,000 രൂപ പിഴ ചുമത്തി.
Angel Varghese 
കളമശ്ശേരിയിൽ വൻ ഫ്ലക്സ് വേട്ട: 1650 മീറ്റർ നിരോധിത മെറ്റീരിയൽ പിടിച്ചെടുത്തു; 40,000 രൂപ പിഴ
കൊച്ചി: നിയമസഭാ തിരഞ്ഞെടുപ്പിനോടനുബന്ധിച്ച് ഹരിതചട്ടം ലംഘിച്ച് നിർമ്മിച്ച നിരോധിത പ്ലാസ്റ്റിക് ഫ്ലക്സുകൾ കളമശ്ശേരിയിൽ പിടികൂടി. ജില്ലാ എൻഫോഴ്സ്മെന്റ് സ്ക്വാഡ് നടത്തിയ മിന്നൽ പരിശോധനയിൽ വിവിധ പ്രിന്റിംഗ് പ്രസ്സുകളിൽ നിന്നായി 1650 മീറ്റർ ഫ്ലക്സ് മെറ്റീരിയലാണ് കണ്ടെടുത്തത്. നിയമലംഘനം നടത്തിയ സ്ഥാപനങ്ങളിൽ നിന്ന് ആകെ 40,000 രൂപ പിഴ ഈടാക്കി.
തിരഞ്ഞെടുപ്പ് പ്രചാരണത്തിന് പി.വി.സി (PVC) കലർന്ന ഫ്ലക്സുകൾ ഉപയോഗിക്കരുതെന്ന തിരഞ്ഞെടുപ്പ് കമ്മീഷന്റെ കർശന നിർദ്ദേശം നിലനിൽക്കെയാണ് വ്യാപകമായ തോതിൽ ഇവ അച്ചടിക്കുന്നത് കണ്ടെത്തിയത്. പിടിച്ചെടുത്ത സാമഗ്രികൾ തുടർനടപടികൾക്കായി കളമശ്ശേരി നഗരസഭയ്ക്ക് കൈമാറി.
കർശന നിർദ്ദേശങ്ങൾ:
പ്രചാരണ ബോർഡുകൾക്കും ബാനറുകൾക്കും കോട്ടൺ തുണി, പേപ്പർ തുടങ്ങിയ പ്രകൃതിദത്ത വസ്തുക്കൾ മാത്രമേ ഉപയോഗിക്കാവൂ.
പുനരുപയോഗിക്കാൻ കഴിയുന്ന പോളിഎത്തീലിൻ ഉപയോഗിക്കുമ്പോൾ അതിൽ റീസൈക്കിൾ ലോഗോ, പി.സി.ബി സർട്ടിഫിക്കറ്റ്, പ്രിന്റിംഗ് സ്ഥാപനത്തിന്റെ പേര് എന്നിവ നിർബന്ധമായും ഉണ്ടായിരിക്കണം.
പി.വി.സി കോട്ടിംഗ് ഉള്ള ഫ്ലക്സുകൾ, പോളിസ്റ്റർ തുണികൾ എന്നിവയ്ക്ക് പൂർണ്ണ നിരോധനമുണ്ട്.
വരും ദിവസങ്ങളിൽ ജില്ലയിലെ എല്ലാ നിയോജക മണ്ഡലങ്ങളിലും പരിശോധന ശക്തമാക്കുമെന്നും നിയമലംഘകർക്കെതിരെ കർശന നടപടി സ്വീകരിക്കുമെന്നും ജില്ലാ എൻഫോഴ്സ്മെന്റ് സ്ക്വാഡ് അറിയിച്ചു.
