30-ാമത് ഐഎഫ്എഫ്കെ നാളെ ടാഗോർ തിയറ്ററിൽ ആരംഭിക്കും
30-ാമത് ഐഎഫ്എഫ്കെ ഡെലിഗേറ്റ് കിറ്റ് വിതരണം നാളെ ടാഗോർ തിയറ്ററിൽ ആരംഭിക്കും .ആദ്യ ഡെലിഗേറ്റ് കിറ്റ് ചലച്ചിത്ര താരം ലിജോമോൾ ജോസ് ഏറ്റുവാങ്ങും
അനില എം കൃഷ്ണൻ 
30-ാമത് ഐഎഫ്എഫ്കെ: ഡെലിഗേറ്റ് കിറ്റ് വിതരണം നാളെ ടാഗോർ തിയറ്ററിൽ ആരംഭിക്കും
തിരുവനന്തപുരം: ലോക സിനിമയുടെ സമകാലികവും ചരിത്രപരവുമായ കാഴ്ചകൾ കോർത്തിണക്കി 30-ാമത് രാജ്യാന്തര ചലച്ചിത്രമേള (IFFK) തലസ്ഥാന നഗരിയിൽ ഡിസംബർ 12 മുതൽ 19 വരെ നടക്കാനിരിക്കെ, മേളയുടെ ഡെലിഗേറ്റ് കിറ്റ് വിതരണം നാളെ (ഡിസംബർ 11) ടാഗോർ തിയറ്ററിൽ ആരംഭിക്കും.
മലയാള ചലച്ചിത്ര താരം ലിജോമോൾ ജോസ് രാവിലെ 11 മണിക്ക് ആദ്യ ഡെലിഗേറ്റ് കിറ്റ് ഏറ്റുവാങ്ങും. 2024-ൽ മികച്ച സ്വഭാവ നടിക്കുള്ള സംസ്ഥാന ചലച്ചിത്ര അവാർഡ് നേടിയ താരമാണ് ലിജോമോൾ.
206 ചിത്രങ്ങൾ, 26 വിഭാഗങ്ങൾ
ഈ വർഷത്തെ മേളയിൽ 82 രാജ്യങ്ങളിൽ നിന്നുള്ള 206 ചിത്രങ്ങളാണ് പ്രദർശിപ്പിക്കുന്നത്. മൊത്തത്തിൽ 26 വ്യത്യസ്ത വിഭാഗങ്ങളിലായിട്ടാണ് ചിത്രങ്ങൾ ഉൾപ്പെടുത്തിയിരിക്കുന്നത്. ലോകമെമ്പാടുമുള്ള 57 സിനിമകൾ ഉൾപ്പെടുന്ന 'ലോക സിനിമ' വിഭാഗം ഇത്തവണത്തെ പ്രധാന ആകർഷണങ്ങളിൽ ഒന്നാണ്.
പലസ്തീൻ ജനതയുടെ പ്രതിരോധത്തിൻ്റെയും ചരിത്രത്തിൻ്റെയും ശക്തമായ അടയാളപ്പെടുത്തലുകളുമായി ആൻമേരി ജാസിർ സംവിധാനം ചെയ്ത 'പലസ്തീൻ 36' ആണ് മേളയുടെ ഉദ്ഘാടന ചിത്രം.
