വധശ്രമക്കേസ് പ്രതിയെ കാപ്പ ചുമത്തി നാടുകടത്തി അങ്കമാലി സ്വദേശി ആഷിക്കിന് ആറുമാസത്തേക്ക് വിലക്ക്

വധശ്രമക്കേസ് പ്രതിയെ കാപ്പ ചുമത്തി നാടുകടത്തി; ആഷിക്കിന് ആറുമാസത്തേക്ക് എറണാകുളം റൂറൽ ജില്ലയിൽ പ്രവേശനമില്ല

​കൊച്ചി: നിരന്തരം കുറ്റകൃത്യങ്ങളിൽ ഏർപ്പെടുന്നവർക്കെതിരെയുള്ള കർശന നടപടികളുടെ ഭാഗമായി അങ്കമാലി സ്വദേശിയായ വധശ്രമക്കേസ് പ്രതിയെ കാപ്പ (KAAPA) ചുമത്തി നാടുകടത്തി. കറുകുറ്റി തോട്ടകം പാറക്കട വീട്ടിൽ ആഷിക്ക് (23) നെയാണ് ആറ് മാസക്കാലത്തേക്ക് എറണാകുളം റൂറൽ ജില്ലയിൽ നിന്നും നാടുകടത്തിയത്.

​എറണാകുളം റൂറൽ ജില്ലാ പോലീസ് മേധാവിയുടെ റിപ്പോർട്ടിൻ്റെ അടിസ്ഥാനത്തിൽ എറണാകുളം മേഖല ഡി.ഐ.ജി ജി.എച്ച് യതീഷ് ചന്ദ്രയാണ് ഇതുസംബന്ധിച്ച ഉത്തരവിറക്കിയത്. 2024, 2025, 2026 വർഷങ്ങളിലായി അങ്കമാലി, ചെങ്ങമനാട് പോലീസ് സ്റ്റേഷൻ പരിധികളിൽ നടന്ന മൂന്ന് വധശ്രമക്കേസുകളിൽ പ്രതിയാണ് ആഷിക്ക്.

​കഴിഞ്ഞ ഫെബ്രുവരി മാസം അവസാനം ചെങ്ങമനാട് കുറുമശ്ശേരി മാഞ്ഞാലി റോഡിലുള്ള ആലപ്പടി കള്ള് ഷാപ്പിന് മുൻവശം വച്ച് ഒരാളെ കുത്തി പരിക്കേൽപ്പിച്ച കേസിൽ ഇയാൾ പ്രതിയായിരുന്നു. ഈ സംഭവത്തിൽ ചെങ്ങമനാട് പോലീസ് രജിസ്റ്റർ ചെയ്ത കേസിൻ്റെ തുടരന്വേഷണങ്ങളുടെയും ക്രിമിനൽ പശ്ചാത്തലത്തിൻ്റെയും അടിസ്ഥാനത്തിലാണ് ഇപ്പോൾ കാപ്പ നിയമപ്രകാരമുള്ള കടുത്ത നടപടി സ്വീകരിച്ചിരിക്കുന്നത്. ക്രമസമാധാന പാലനത്തിൻ്റെ ഭാഗമായി വരും ദിവസങ്ങളിലും സാമൂഹിക വിരുദ്ധർക്കെതിരെ ശക്തമായ നടപടികൾ തുടരുമെന്ന് പോലീസ് അറിയിച്ചു.