ലഹരിക്കെതിരെ റൂറൽ സ്‌ട്രൈക്ക് അഞ്ചു മാസത്തിനിടെ 475 കേസുകൾ കോടികളുടെ ഹെറോയിനും കഞ്ചാവും പിടികൂടി

എറണാകുളം റൂറൽ ജില്ലയിൽ മയക്കുമരുന്ന് കടത്തിന് തടയിട്ട് പോലീസ്. ജില്ലാ പോലീസ് മേധാവി കെ.എസ്. സുദർശന്റെ നേതൃത്വത്തിൽ ഈ വർഷം ഇതുവരെ 475 കേസുകളിലായി 588 പേരെ അറസ്റ്റ് ചെയ്തു. അങ്കമാലിയിലെ റെക്കോർഡ് വേട്ടയടക്കം വൻ ലഹരിമരുന്ന് ശേഖരമാണ് പിടിച്ചെടുത്തത്.

അനില എം കൃഷ്ണൻ

May 12, 2026 - 14:47

ലഹരിക്കെതിരെ റൂറൽ സ്‌ട്രൈക്ക് അഞ്ചു മാസത്തിനിടെ 475 കേസുകൾ കോടികളുടെ ഹെറോയിനും കഞ്ചാവും പിടികൂടി

അങ്കമാലിയിൽ ഹെറോയിൻ പിടികൂടിയ അന്വേഷണ സംഘം

ആലുവ: എറണാകുളം റൂറൽ ജില്ലയിൽ മയക്കുമരുന്ന് കടത്തും വിപണനവും തടയുന്നതിനായി ജില്ലാ പോലീസ് മേധാവി കെ.എസ്. സുദർശന്റെ നേതൃത്വത്തിൽ പരിശോധന കർശനമാക്കുന്നു. ഈ വർഷം ഇതുവരെ ജില്ലയിൽ 475 മയക്കുമരുന്ന് കേസുകൾ രജിസ്റ്റർ ചെയ്തു. വിവിധ സംഭവങ്ങളിലായി 588 പേരെ പോലീസ് അറസ്റ്റ് ചെയ്തു.

പിടിക്കപ്പെട്ടവരിൽ 13 പേർ വാണിജ്യ അടിസ്ഥാനത്തിൽ (Commercial Quantity) മയക്കുമരുന്ന് കടത്തിയവരാണ്. 24 മീഡിയം ക്വാണ്ടിറ്റി കേസുകളും 168 സ്മോൾ ക്വാണ്ടിറ്റി കേസുകളും ഈ വർഷം റിപ്പോർട്ട് ചെയ്തിട്ടുണ്ട്.

കഞ്ചാവ് വേട്ട: അങ്കമാലിയിൽ വൻ സ്രാവുകൾ വലയിൽ

ഈ വർഷം ഇതുവരെ 340 കിലോ കഞ്ചാവാണ് റൂറൽ പോലീസ് പിടിച്ചെടുത്തത്. ഇതിൽ ഏറ്റവും വലുത് അങ്കമാലിയിൽ ആഡംബര കാറിൽ കടത്തുകയായിരുന്ന 62 കിലോ കഞ്ചാവാണ്. കാറിന്റെ പിൻസീറ്റിൽ പ്രത്യേക അറകൾ നിർമ്മിച്ച് 31 പൊതികളിലായാണ് ഇത് സൂക്ഷിച്ചിരുന്നത്.

ഇതര സംസ്ഥാന തൊഴിലാളികൾ കേന്ദ്രീകരിച്ചും കഞ്ചാവ് വിൽപ്പന വ്യാപകമാണ്. വാഴക്കുളത്ത് നിന്ന് 51 കിലോയും, മാറമ്പിള്ളിയിൽ നിന്ന് 32 കിലോയും കഞ്ചാവ് പിടികൂടി. പുത്തൻകുരിശ്, അയ്യമ്പുഴ, മുളന്തുരുത്തി, കാലടി എന്നിവിടങ്ങളിലും വലിയ തോതിൽ കഞ്ചാവ് വേട്ട നടന്നു.

രാസലഹരിയും ഹെറോയിനും: അന്തർസംസ്ഥാന ബന്ധങ്ങൾ

ബംഗളൂരുവിൽ നിന്നും മറ്റും എത്തുന്ന മാരക രാസലഹരിയായ എം.ഡി.എം.എ (MDMA) പിടികൂടുന്നതിലും പോലീസ് വിജയിച്ചു. ഈ വർഷം ഇതുവരെ 765 ഗ്രാം എം.ഡി.എം.എ പിടിച്ചെടുത്തു. അങ്കമാലിയിൽ ഫ്ലാസ്ക്കിനുള്ളിൽ ഒളിപ്പിച്ച് കടത്തിയ 550 ഗ്രാം എം.ഡി.എം.എ പിടികൂടിയതാണ് ഏറ്റവും വലിയ വേട്ട. പറവൂർകവല, വരാപ്പുഴ എന്നിവിടങ്ങളിൽ നിന്നും യുവാക്കൾ രാസലഹരിയുമായി പിടിയിലായിട്ടുണ്ട്.

അടുത്തിടെ അങ്കമാലിയിൽ നടന്ന 609 ഗ്രാം ഹെറോയിൻ വേട്ട കേരളത്തിലെ തന്നെ ഏറ്റവും വലിയ ഹെറോയിൻ വേട്ടകളിലൊന്നാണ്. ഇതിന് അന്താരാഷ്ട്ര വിപണിയിൽ ഏകദേശം ഒരു കോടി രൂപയോളം വില വരും. ബർമ്മയിൽ നിന്ന് എത്തിച്ച ഈ മാരക ലഹരിയുമായി മൂന്ന് അസം സ്വദേശികളാണ് പിടിയിലായത്.

മയക്കുമരുന്ന് ശൃംഖലയുടെ വേരറുക്കാൻ ശക്തമായ അന്വേഷണം തുടരുമെന്നും വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകുമെന്നും ജില്ലാ പോലീസ് മേധാവി കെ.എസ്. സുദർശൻ അറിയിച്ചു.