​വിറ്റുവരവിൽ റെക്കോർഡ് നേട്ടം 5500 കോടിയുടെ കരുത്തിൽ മൈജി ഇനി ആഗോള വിപണിയിലേക്ക്

​കോഴിക്കോട്: ദക്ഷിണേന്ത്യയിലെ പ്രമുഖ ഡിജിറ്റൽ ഗാഡ്‌ജെറ്റ്സ്, ഹോം ആൻഡ് കിച്ചൺ അപ്ലയൻസസ് റീട്ടെയ്ൽ ശൃംഖലയായ മൈജി (myG) കഴിഞ്ഞ സാമ്പത്തിക വർഷം (2025-26) കൈവരിച്ചത് റെക്കോർഡ് നേട്ടം. 5000 കോടി രൂപ ലക്ഷ്യമിട്ട സ്ഥാനത്ത് 5500 കോടി രൂപയുടെ വിറ്റുവരവ് സ്വന്തമാക്കാൻ സാധിച്ചതായി മൈജി ചെയർമാൻ എ.കെ. ഷാജി വാർത്താസമ്മേളനത്തിൽ അറിയിച്ചു.

​ലക്ഷ്യം 7500 കോടി; വിദേശത്തേക്ക് ചുവടുവെക്കുന്നു

നടപ്പു സാമ്പത്തിക വർഷം 7500 കോടി രൂപയുടെ വിറ്റുവരവാണ് കമ്പനി ലക്ഷ്യമിടുന്നത്. കേരളം, കർണാടക, തമിഴ്‌നാട് എന്നിവയ്ക്ക് പുറമെ ഇന്ത്യയിലെ മറ്റ് പ്രമുഖ സംസ്ഥാനങ്ങളിലേക്കും ജിസിസി രാജ്യങ്ങളിലേക്കും മൈജി പ്രവർത്തനം വ്യാപിപ്പിക്കും. ഇതിന്റെ ഭാഗമായി ഈ വർഷം 40 മുതൽ 50 വരെ പുതിയ ഷോറൂമുകൾ ആരംഭിക്കും. എല്ലാ ജില്ലകളിലും അത്യാധുനിക സൗകര്യങ്ങളോടു കൂടിയ 'എപിക് ഷോറൂമുകൾ' വരാനിരിക്കുകയാണ്.

​തൊഴിലവസരങ്ങൾ വർധിപ്പിക്കും

നിലവിൽ 5800 ജീവനക്കാരുള്ള മൈജി, പുതിയ വിപുലീകരണ പദ്ധതികളിലൂടെ ജീവനക്കാരുടെ എണ്ണം 10,000-ലേക്ക് ഉയർത്തും. കഴിഞ്ഞ ഓണക്കാലത്ത് മാത്രം 1600 കോടി രൂപയുടെ വിറ്റുവരവ് നേടാൻ കമ്പനിക്ക് സാധിച്ചിരുന്നു.

​സ്വന്തം ബ്രാൻഡുകളുമായി മൈജി

ഉപഭോക്താക്കൾക്ക് കുറഞ്ഞ വിലയിൽ മികച്ച ഉൽപ്പന്നങ്ങൾ നൽകാനായി മൈജി സ്വന്തം ബ്രാൻഡുകൾ വിപണിയിലിറക്കി. 'ജി ഡോട്ട്' (G Dot) എന്ന പേരിൽ ടിവികളും ഡിജിറ്റൽ അക്സസറികളും, 'ഗാഡ്മി' (Gadmi) എന്ന ബ്രാൻഡിൽ നോൺസ്റ്റിക് പാത്രങ്ങളും കിച്ചൺ അപ്ലയൻസസുകളും ഇപ്പോൾ ലഭ്യമാണ്. വൈകാതെ ഇവ പൊതുവിപണിയിലും പുറത്തിറക്കും.

​സേവന മികവും സാമൂഹിക പ്രതിബദ്ധതയും

മൈജി കെയർ സർവീസ് സെന്ററുകൾക്ക് പുറമെ അത്യാധുനിക ഹൈലെവൽ റിപ്പയർ സെന്ററുകളും (HLRC) കമ്പനി സ്ഥാപിക്കും. 'ഫോൺ വേണ്ട' ക്യാമ്പയിൻ, സ്ത്രീ സംരംഭകർക്കായുള്ള 'ഷി സ്റ്റാർട്ട്' (She Start) തുടങ്ങിയ സിഎസ്ആർ പ്രവർത്തനങ്ങൾക്കും മൈജി നേതൃത്വം നൽകുന്നുണ്ട്. ടൊവിനോ തോമസ്, മഞ്ജു വാര്യർ എന്നിവരാണ് ബ്രാൻഡ് അംബാസഡർമാർ.