രാമനാട്ടുകര നഗരസഭയുടെ ഗോൾ 2026 വിദ്യാഭ്യാസ പദ്ധതിക്ക് തുടക്കമായി മന്ത്രി എന്. ഷംസുദ്ദീന് ഉദ്ഘാടനം ചെയ്തു
രാമനാട്ടുകര നഗരസഭയുടെ ഗോള് 2026 വിദ്യാഭ്യാസ പദ്ധതി മന്ത്രി എന് ഷംസുദ്ദീന് ഉദ്ഘാടനം ചെയ്തു. മികച്ച വിജയം നേടിയ വിദ്യാർത്ഥികളെയും നിപ പ്രതിരോധ പ്രവർത്തകരായ പിഎച്ച്സി ജീവനക്കാരെയും ചടങ്ങിൽ ആദരിച്ചു.
Mathew P M 
രാമനാട്ടുകര നഗരസഭയുടെ 'ഗോൾ 2026' വിദ്യാഭ്യാസ പദ്ധതിക്ക് തുടക്കമായി; മന്ത്രി എന്. ഷംസുദ്ദീന് ഉദ്ഘാടനം ചെയ്തു
കോഴിക്കോട്: രാമനാട്ടുകര നഗരസഭ നടപ്പിലാക്കുന്ന പുതിയ വിദ്യാഭ്യാസ പിന്തുണ പദ്ധതിയായ 'ഗോള് 2026' പൊതുവിദ്യാഭ്യാസ വകുപ്പ് മന്ത്രി എന്. ഷംസുദ്ദീന് ഉദ്ഘാടനം ചെയ്തു. നഗരസഭ ചെയര്പേഴ്സണ് കല്ലട മുഹമ്മദലി അധ്യക്ഷത വഹിച്ച ചടങ്ങിൽ അഡ്വ. പി. എ. മുഹമ്മദ് റിയാസ് എം.എല്.എ മുഖ്യാതിഥിയായിരുന്നു.
നഗരസഭയുടെ വിവിധ വിദ്യാഭ്യാസ നേട്ടങ്ങളെയും ജനക്ഷേമ പ്രവർത്തനങ്ങളെയും പ്രകീർത്തിക്കുന്നതായിരുന്നു ചടങ്ങ്. വിദ്യാഭ്യാസ സ്ഥിരം സമിതി അധ്യക്ഷന് കെ. പി. നാസര് ഉപഹാര സമര്പ്പണവും നഗരസഭ സെക്രട്ടറി പി. ശ്രീജിത്ത് പദ്ധതി സംബന്ധിച്ച റിപ്പോര്ട്ട് അവതരണവും നടത്തി.
വിവിധ പരീക്ഷകളിൽ മികച്ച വിജയം കൈവരിച്ച വിദ്യാർത്ഥികളെ അനുമോദിക്കാനും പ്രതിരോധ പ്രവർത്തകരെ ആദരിക്കാനുമുള്ള വേദിയായി ചടങ്ങ് മാറി. എസ്.എസ്.എല്.സി, പ്ലസ് ടു, എല്.എസ്.എസ്, യു.എസ്.എസ്, എന്.എം.എം.എസ് പരീക്ഷകളില് ഉന്നത വിജയം നേടിയവർക്കും, കേന്ദ്ര സർക്കാരിന്റെ 'മാനക്' ഇന്സ്പയര് അവാര്ഡ് കരസ്ഥമാക്കിയ വിദ്യാര്ഥിക്കുമുള്ള അനുമോദനം ചടങ്ങിൽ വച്ച് നടന്നു. കൂടാതെ നഗരസഭയിലെ അങ്കണവാടികളില് പുതുതായി പ്രവേശനം നേടിയ കുട്ടികള്ക്കുള്ള ഉപഹാര വിതരണവും, പ്രദേശത്ത് നിപ രോഗ പ്രതിരോധ പ്രവര്ത്തനങ്ങള്ക്ക് കരുത്തുറ്റ നേതൃത്വം നല്കിയ പി.എച്ച്.സി (Primary Health Centre) ജീവനക്കാരെ ആദരിക്കലും ഇതിനോടനുബന്ധിച്ച് സംഘടിപ്പിച്ചു.
നഗരസഭ വൈസ് ചെയര്പേഴ്സണ് വി. മിഥുഷ, സ്ഥിരം സമിതി അധ്യക്ഷരായ കെ. കെ. മുഹമ്മദ് കോയ, ഫൈസല് പള്ളിയാളി, ടി. സുമതി, സജ്ന റഷീദ്, കൗണ്സിലര് കെ. സുധീഷ് കുമാര് എന്നിവരും മുൻ ചെയർപേഴ്സൺമാരായ വി. എം. പുഷ്പ, ബുഷ്റ റഫീഖ് എന്നിവരും ചടങ്ങിൽ സംസാരിച്ചു. ആസൂത്രണ സമിതി ഉപാധ്യക്ഷന് എന്. സി. ഹംസക്കോയ, പ്രോഗ്രാം കമ്മിറ്റി കണ്വീനര് ടി. സി. ബാബുരാജന് മാസ്റ്റര്, കോഴിക്കോട് റൂറല് ഐ.സി.ഡി.എസ് സി.ഡി.പി.ഒ കെ. കെ. ഹസീന, ഇംപ്ലിമെന്റിങ് ഓഫീസര് പി. М. ജയരാജന് തുടങ്ങിയ പ്രമുഖരും ചടങ്ങിൽ സന്നിഹിതരായിരുന്നു.
