ബൂത്തിൽ ഫോൺ വേണ്ട വോട്ടുപെട്ടിയിൽ മിണ്ടരുത് മൊബൈലുകൾ സുരക്ഷയ്ക്ക് ഇനി ഹരിത പൗച്ചുകൾ
നിയമസഭാ തിരഞ്ഞെടുപ്പിനോടനുബന്ധിച്ച് പോളിങ് ബൂത്തുകളിൽ മൊബൈൽ ഫോണിന് നിയന്ത്രണം. വോട്ടർമാരുടെ ഫോണുകൾ സൂക്ഷിക്കാൻ പ്രത്യേക സേഫ്റ്റി പൗച്ചുകൾ സജ്ജീകരിക്കും.
Angel Varghese 
വോട്ടെടുപ്പ് കേന്ദ്രങ്ങളിൽ മൊബൈൽ ഫോൺ വിലക്കി തിരഞ്ഞെടുപ്പ് കമ്മിഷൻ; ബൂത്തുകളിൽ പ്രത്യേക ഫോൺ കീപ്പിങ് പൗച്ചുകൾ
തിരുവനന്തപുരം: നിയമസഭാ തിരഞ്ഞെടുപ്പിന്റെ ഭാഗമായി വോട്ടെടുപ്പ് കേന്ദ്രങ്ങളിൽ കർശന നിയന്ത്രണങ്ങൾ ഏർപ്പെടുത്തി തിരഞ്ഞെടുപ്പ് കമ്മിഷൻ. വോട്ടിന്റെ രഹസ്യസ്വഭാവം ഉറപ്പുവരുത്തുന്നതിനും സുരക്ഷാ മുൻകരുതലിന്റെ ഭാഗമായും പോളിങ് ബൂത്തിനകത്ത് മൊബൈൽ ഫോൺ ഉപയോഗിക്കുന്നത് പൂർണ്ണമായും നിരോധിച്ചു. വോട്ടർമാർ ഫോണുകൾ വോട്ടെടുപ്പ് കേന്ദ്രത്തിന് പുറത്ത് സൂക്ഷിക്കണമെന്ന് അധികൃതർ നിർദേശിച്ചു.
മൊബൈൽ ഫോൺ സൂക്ഷിക്കാൻ പ്രത്യേക പൗച്ചുകൾ
ഫോണിലെ സ്വകാര്യ വിവരങ്ങളുടെ സുരക്ഷ കണക്കിലെടുത്ത് വോട്ടർമാർ ഫോണുകൾ വാഹനങ്ങളിലോ മറ്റ് സുരക്ഷിത ഇടങ്ങളിലോ സൂക്ഷിക്കാൻ ശ്രമിക്കണം. ഇതിന് സാധിക്കാത്തവർക്കായി ഓരോ പോളിങ് സ്റ്റേഷനിലും ജില്ലാ ഭരണകൂടത്തിന്റെ നേതൃത്വത്തിൽ 'ഹരിത മൊബൈൽ ഫോൺ കീപ്പിങ് പൗച്ചുകൾ' സജ്ജീകരിക്കും.
ബൂത്തിലേക്ക് കടക്കുന്നതിന് മുൻപ് ഫോൺ ഈ പൗച്ചിൽ നിക്ഷേപിച്ച് വളണ്ടിയർമാരിൽ നിന്ന് ടോക്കൺ കൈപ്പറ്റാം. വോട്ട് രേഖപ്പെടുത്തിയ ശേഷം ടോക്കൺ തിരികെ നൽകി ഫോൺ കൈപ്പറ്റാവുന്നതാണ്.
ഉദ്യോഗസ്ഥർക്ക് നിയന്ത്രണങ്ങളോടെ അനുമതി
തിരഞ്ഞെടുപ്പ് ഉദ്യോഗസ്ഥർക്ക് മാത്രമാണ് ബൂത്തിനകത്ത് ഫോൺ ഉപയോഗിക്കാൻ അനുമതിയുള്ളത്. എന്നാൽ ഇവർ നിർബന്ധമായും ഫോൺ സൈലന്റ് മോഡിൽ മാത്രമേ ഉപയോഗിക്കാവൂ എന്ന് നിർദേശമുണ്ട്. വോട്ടെടുപ്പ് സുഗമമായി നടക്കുന്നുവെന്ന് ഉറപ്പാക്കാൻ പൊതുജനങ്ങളും ഉദ്യോഗസ്ഥരും ഈ നിയന്ത്രണങ്ങളോട് സഹകരിക്കണമെന്ന് തിരഞ്ഞെടുപ്പ് കമ്മിഷൻ അറിയിച്ചു.
