പ്രതിഷേധങ്ങൾക്കൊടുവിൽ കോറോ ഹെൽത്ത് ഇന്ന് തുറക്കും ശമ്പള പ്രതിസന്ധിയിൽ ജൂലൈ 10 ന് മന്ത്രിതല ചർച്ച
തൊഴിലാളികളുടെ പ്രതിഷേധങ്ങൾക്കൊടുവിൽ എറണാകുളത്തെ കോറോ ഹെൽത്ത് കമ്പനി ഇന്ന് മുതൽ തുറന്ന് പ്രവർത്തിക്കും. ശമ്പള വിതരണം ഉൾപ്പെടെയുള്ള വിഷയങ്ങളിൽ ജൂലൈ 10 ന് തൊഴിൽ മന്ത്രി ബിന്ദു കൃഷ്ണയുടെ നേതൃത്വത്തിൽ കൊച്ചിയിൽ ചർച്ച നടക്കും
അനില എം കൃഷ്ണൻ 
പ്രതിഷേധങ്ങൾക്കൊടുവിൽ കോറോ ഹെൽത്ത് ഇന്ന് തുറക്കും; ശമ്പള പ്രതിസന്ധിയിൽ ജൂലൈ 10-ന് മന്ത്രിതല ചർച്ച
കൊച്ചി: ജീവനക്കാരുടെ ശക്തമായ പ്രതിഷേധങ്ങൾക്കും ആശങ്കകൾക്കും ഒടുവിൽ എറണാകുളത്തെ കോറോ ഹെൽത്ത് കമ്പനി ഇന്ന് (ജൂലൈ 7) രാവിലെ മുതൽ തുറന്ന് പ്രവർത്തിക്കും. തൊഴിൽ മന്ത്രി ബിന്ദു കൃഷ്ണയുടെ നിർദ്ദേശപ്രകാരം ഉമ തോമസ് എം.എൽ.എ, ലേബർ കമ്മീഷണർ സഫ്ന നസറുദ്ദീൻ എന്നിവരുടെ നേതൃത്വത്തിൽ ചേർന്ന അടിയന്തര യോഗത്തിലാണ് കമ്പനി തുറക്കാനുള്ള താത്കാലിക ധാരണയായത്.
മാനേജ്മെന്റ് പ്രതിനിധികൾ നേരിട്ട് യോഗത്തിൽ പങ്കെടുത്തില്ലെങ്കിലും, അവരുടെ നിയമോപദേഷ്ടാവും കമ്പനിയിലെ തൊഴിലാളി യൂണിയൻ ഭാരവാഹികളും തമ്മിൽ നടത്തിയ വിശദമായ ചർച്ചയിലാണ് ജീവനക്കാർക്ക് അനുകൂലമായ ഈ തീരുമാനമുണ്ടായത്. ജീവനക്കാർക്ക് ഓഫീസിൽ പ്രവേശിച്ച് ജോലി ചെയ്യാനുള്ള എല്ലാ സൗകര്യങ്ങളും ഇന്ന് രാവിലെ മുതൽ ഒരുക്കുമെന്ന് കമ്പനിയുടെ ലീഗൽ അഡ്വൈസർ വ്യക്തമാക്കിയതായി ഉമാ തോമസ് എം.എൽ.എ അറിയിച്ചു.
മുൻ ദിവസങ്ങളിലുണ്ടായതുപോലെയുള്ള അനിഷ്ട സംഭവങ്ങൾ ഒഴിവാക്കാനും ഓഫീസ് പ്രവർത്തനം സുഗമമായി നടക്കുന്നുണ്ടെന്ന് ഉറപ്പുവരുത്താനും ജില്ലാ ലേബർ ഓഫീസറും അസിസ്റ്റന്റ് ലേബർ ഓഫീസറും ഇന്ന് കമ്പനിയിൽ നേരിട്ടെത്തും.
ജൂലൈ 10-ന് നിർണ്ണായക ചർച്ച
കമ്പനിയുടെ ഭാവി പ്രവർത്തനങ്ങളും ജീവനക്കാരുടെ ശമ്പള വിതരണവും സംബന്ധിച്ച അന്തിമ തീരുമാനങ്ങൾക്കായി ജൂലൈ പത്താം തിയതി കൊച്ചിയിൽ നിർണ്ണായക ചർച്ച നടക്കും. തൊഴിൽ മന്ത്രി ബിന്ദു കൃഷ്ണ പങ്കെടുക്കുന്ന ഈ യോഗത്തിൽ കമ്പനിയുടെ ഡയറക്ടർ ബോർഡ് പ്രതിനിധികളും പങ്കെടുക്കുമെന്ന് അറിയിച്ചിട്ടുണ്ട്.
നിലവിൽ എറണാകുളത്ത് അറുന്നൂറിലധികവും (616) കോഴിക്കോട് മുന്നൂറോളം ജീവനക്കാരും ഈ സ്ഥാപനത്തെ ആശ്രയിച്ച് ജോലി ചെയ്യുന്നുണ്ട്. കോഴിക്കോട് ഡിവിഷനിലെ ജീവനക്കാരുടെ പ്രതിനിധികളും കഴിഞ്ഞ ദിവസം നടന്ന ചർച്ചകളുടെ ഭാഗമായിരുന്നു.
ഇൻഡസ്ട്രിയൽ ഡിസ്പ്യൂട്ട്സ് ആക്ട് പ്രകാരം വലിയൊരു വിഭാഗം ജീവനക്കാരുള്ള സ്ഥാപനങ്ങൾ അടച്ചുപൂട്ടുന്നതിന് 90 ദിവസം മുൻപ് സർക്കാരിനെ മുൻകൂട്ടി അറിയിക്കുകയും അനുമതി വാങ്ങുകയും ചെയ്യേണ്ടതുണ്ട്. ഇത്തരം ചട്ടങ്ങൾ പാലിക്കാതെ കമ്പനി അടച്ചിടാൻ ശ്രമിച്ച പശ്ചാത്തലത്തിൽ, നിലവിലെ പ്രതിസന്ധി പരിഹരിക്കാൻ പത്താം തിയതിയിലെ മന്ത്രിതല ചർച്ച വലിയൊരു വഴിത്തിരിവാകും.
